មន្ត្រីជាន់ខ្ពស់ក្រសួងធម្មការ៖ គិតមកដល់ពេលនេះវត្តអារាមក្រោមការដឹកនាំរបស់រាជរដ្ឋាភិបាលគឺមានរហូតទៅដល់ ៥១០៤វត្ត
ភ្នំពេញ៖ រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា ឯកឧត្តម បណ្ឌិត សេង សុមុនី បានលើកឡើងថា បើគិតមកដល់ពេលនេះវត្តអារាមក្រោមការដឹកនាំរបស់រាជរដ្ឋាភិបាលគឺមានការកើនឡើងរហូតទៅដល់ ៥១០៤វត្ត។
ថ្លែងនៅក្នុងសន្និសីទសារព័ត៌មានដែលរៀបចំដោយអង្គភាពអ្នកនាំពាក្យរាជរដ្ឋបាល ស្ដីពីសមិទ្ធផលសម្រេចបានរយ:ពេល៥ឆ្នាំកន្លងមករបស់ ក្រសួងធម្មការ និងសាសនា នារសៀលថ្ងៃទី២៩ ខែកញ្ញា ឆ្នាំ២០២២ ឯកឧត្តម បណ្ឌិត សេង សុមុនី បានឲ្យដឹងថា ដោយលែកទាក់ទងទៅនិងចំនួនព្រះសង្ឃគឺមានការកើនឡើងរហូតទៅដល់ ៧០៩០០អង្គ ដែលក្នុងនោះមានគណៈមហានិកាយ និងគណៈធម្មយុត្តិ ដែលមានមហានិកាយប្រមាណជា ៦៨៤៧៦អង្គ។
ឯកឧត្តមបន្តថា ទាក់ទងទៅនិងបញ្ហាព្រះសង្ឃនេះគឺស្ថិតក្នុងស្ថានភាពកូវីតក្នុងអំឡុងប៉ុន្មានឆ្នាំកន្លងទៅនេះគឺយើងមានការប្រគេនឬក៏ផ្ដល់ជូននូវវ៉ាក់សាំងដោយរាជរដ្ឋាភិបាលផ្ដល់ជូនប្រគេនដល់ព្រះសង្ឃបាន ៦៤៨៦៤អង្គ ស្មើនឹង៩៣% នៃចំនួនព្រះសង្ឃទូទៅ។
ឯកឧត្តម បណ្ឌិត បានបន្ថែមថា ទាក់ទងទៅនិងអាស្រមដ្ឋានរបស់ព្រះពុទ្ធសាសនាគឺមានមណ្ឌលវិបស្សនាធុរៈហើយនៅក្នុងនោះមានអាចារ្យ អាចារិនី តាជី យាយជី ផ្សេងទៀតដែលរស់នៅតាមវត្តអារាម។មកដល់ពេលនេះអាស្រមក្នុងព្រះរាជាណាចក្រកម្ពុជារបស់យើងគឺមានចំនួន ១៤៤កន្លែង ហើយមណ្ឌលវិបស្សនាគឺមាន ១៤៤កន្លែង អាចារ្យ អាចារិនី មានចំនួន ១៥១២៤រូប ហើយតាជីដែលស្នាក់នៅក្នុងវត្តមានចំនួន ៩៩៥៣រូប និងយាយជីមានចំនួន ៣០៦៣រូប សិស្សនិស្សិតដែលស្នាក់នៅតាមវត្តទូទាំងព្រះរាជាណាចក្រកម្ពុជាគឺយើងស្រង់បានចំនួន ៧៧៨៥រូប គឺក្នុងនោះមានក្មេងកំព្រាចំនួន ២២០១រូប និងជនគ្មានទីពឹងមានចំនួន ៥៨៨រូប ហើយគណកម្មការវត្តទូទាំងប្រទេសដែលមានរៀបចំជាក្រុមគណកម្មការគឺមានចំនួន ៣៧០០០រូប និងពុទ្ធបរិស័ទទូទាំងប្រទេសបើគិតជាភាគរយស្មើនឹង៩៥%គឺលេខនៅកំណត់ជាក់លាក់នៅឡើយ៕
