ឯកឧត្តម ដុំ យុហៀន និងលោកជំទាវ អញ្ជើញចូលរួមក្នុងពិធីកាន់បិណ្ឌវេនទី១ នៅវត្តទេពនិមិត្ត ក្នុងក្រុងខេមរភូមិន្ទ
ភ្នំពេញ៖ ដើម្បីជួយផ្គត់ផ្គង់ទំនុកបម្រុងដល់ព្រះសង្ឃ និងរួមចំណែកថែរក្សាពិធីបុណ្យប្រពៃណីជាតិដែលមានតាំងពីបុរាណកាលមកឲ្យបានស្ថិតស្ថេរគង់វង្សនោះ ក្នុងរដូវបុណ្យកាន់បិណ្ឌភ្ជុំបិណ្ឌឆ្នាំនេះ ឯកឧត្តម ដុំ យុហៀន តំណាងរាស្ត្រមណ្ឌលខេត្តកោះកុង និងជាសមាជិកគណៈកម្មការទី៥ នៃរដ្ឋសភា និងលោកជំទាវ ដោយមានការចូលរួមពីលោកជំទាវ ឯកឧត្តមក្រុមប្រឹក្សាខេត្ត លោក លោកស្រីក្រុមប្រឹក្សា គណៈអភិបាលក្រុង លោក លោកស្រីក្រុមប្រឹក្សាសង្កាត់ លោក លោកស្រីមន្ត្រីរាជការ បងប្អូនប្រជាពលរដ្ឋក្នុងក្រុងខេមរភូមិន្ទបានចូលរួមក្នុងពិធីកាន់បិណ្ឌថ្ងៃដំបូងគឺជាថ្ងៃកាន់បិណ្ឌវេនទី១ នៅវត្តទេពនិមិត្ត(ហៅវត្តថ្មី) ស្ថិតក្នុងក្រុងខេមរភូមិន្ទ ខេត្តកោះកុង។
ពិធីបុណ្យកាន់បិណ្ឌភ្ជុំបិណ្ឌនេះ ត្រូវបានប្រជាពលរដ្ឋខ្មែរជាពុទ្ធសាសនិកជនប្រារព្ធធ្វើឡើងក្នុងគោលបំណង ដើម្បីរៀបចំសង្ឃភត្តទំនុកបម្រុងដល់ព្រះសង្ឃក្នុងរដូវវស្សាពីព្រោះរដូវនេះមានភ្លៀងធ្លាក់បង្កឲ្យមានការលំបាកដល់ព្រះសង្ឃក្នុងការនិមន្តបិណ្ឌបាត្រ។ ម្យ៉ាងទៀតក៏ដើម្បីឧទ្ទិសកុសលដល់វិញ្ញាណក្ខន្ធបុព្វការីជនរបស់ពួកគាត់ឲ្យបានទៅកាន់សុគតិភពផងដែរ។ ក្នុងពិធីបុណ្យកាន់បិណ្ឌវេនទី១ នៅវត្តទេពនិមិត្ត (ហៅវត្តថ្មី)នេះ ឯកឧត្តម ដុំ យុហៀន និងលោកជំទាវ រួមនឹងពុទ្ធបរិស័ទទាំងអស់ បាននាំយកចង្ហាន់ទេយ្យទានផ្សេងៗទៅវេរប្រគេនដល់ព្រះសង្ឃក្នុងវត្តនេះ ដើម្បីឧទ្ទិសកុសលដល់បុព្វការីជនដែលបានលាចាកលោកទៅកាន់លោកខាងមុខ ក៏ដូចជាវិញ្ញាណក្ខន្ធបុព្វបុរសស្នេហាជាតិទាំងអស់ បានមកទទួលយកកុសលផលបុណ្យតាមជំនឿបែបព្រះពុទ្ធសាសនាដែលជាសាសនារបស់រដ្ឋ ព្រមទាំងបានធ្វើកិច្ចបែបសាសនាស្របតាមទំនៀមទម្លាប់នៃពិធីបុណ្យកាន់បិណ្ឌភ្ជុំបិណ្ឌនេះផងដែរ។
ក្នុងឱកាសនោះដែរ ឯកឧត្តម និងលោកជំទាវ បានចូលរួមបច្ច័យសម្រាប់ចង្ហាន់ និងទេយ្យទានប្រគេនដល់ព្រះសង្ឃ និងសូមឧទ្ទិសកុសលផលបុណ្យដល់ញាតិសន្តាន ដែលបានចែកឋានទៅហើយ ព្រមទាំងបានចែកអំណោយជូនដល់លោកយាយ លោកតាចាស់ព្រឹទ្ធាចារ្យ កុមារកំព្រា ជនមានផ្ទុកមេរោគអេដស៍ក្នុងមណ្ឌលផងដែរ ៕
