ឯកឧត្តម តូច ចាន់នី អំពាវនាវដល់ពលរដ្ឋ អនុវត្តឲ្យបានខ្ជាប់ខ្ជួន នូវវិធានការការពារ ៣កុំ ៣ការពារ និងបន្តចូលរួមទទួលវ៉ាក់សាំងដូសជំរុញទី៣ ទី៤ និងទី៥

ភ្នំពេញ៖ ឯកឧត្តម តូច ចាន់នី អគ្គនាយក នៃអគ្គនាយកដ្ឋានសេវាសង្គមកិច្ច នៃក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមការងារថ្នាក់ជាតិចុះជួយឃុំកណ្តោលជ្រុំ នៅថ្ងៃទី១១ ខែកញ្ញា ឆ្នាំ២០២២ បានអំពាវនាវដល់ប្រជាពលរដ្ឋទាំងអស់ អនុវត្តឲ្យបានខ្ជាប់ខ្ជួននូវវិធានការការពារ ៣កុំ ៣ការពារ និងបន្តចូលរួមទទួលវ៉ាក់សាំងកូវីដ-១៩ ដូសជំរុញទី៣ ទី៤ និងទី៥ តាមសេចក្តីអំពាវនាវរបស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងការបន្តចូលរួមចលនាជាតិទប់ស្កាត់ និងគ្រប់គ្រងកូវីដ-១៩ សំដៅបង្កលក្ខណៈល្អប្រសើរកាន់តែខ្លាំងក្លារឹងមាំដល់ការបើកសេដ្ឋកិច្ច និងសង្គមជាតិ ក្នុងពេលដែលជំងឺដ៏កាចសាហាវនេះនៅមិនទាន់ត្រូវបានលុបបំបាត់ចោលទាំងស្រុងនៅឡើយ។

ឯកឧត្តម តូច ចាន់នី បានលើកឡើងបែបនេះខណៈឯកឧត្តម រួមជាមួយសហការី បានចុះទៅចូលរួមពិធីបុណ្យកាន់បិណ្ឌប្រពៃណីជាតិ បិណ្ឌ១ បាននាំយកនូវទេយ្យទាន និងបច្ច័យមួយចំនួន ដើម្បីប្រគេនព្រះចៅអធិការ និងព្រះសង្ឃដែលគង់ចាំព្រះវស្សាក្នុងវត្តកណ្តោលជ្រុំ និងផ្តល់ថវិកាជូន យាយជី តាជី និងកូនសិស្សស្នាក់នៅក្នុងវត្ត សរុបចំនួន ៨០នាក់ និងពុទ្ធបរិស័ទ។

នៅព្រឹកថ្ងៃដដែល ឯកឧត្តម តូច ចាន់នី បានពាំនាំអំណោយដ៏ថ្លៃថ្លា របស់ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមការងារថ្នាក់កណ្តាលចុះជួយស្រុកពញាក្រែក ខេត្តត្បូងឃ្មុំ និងឃុំជាច ស្រុកកំចាយមារ ខេត្តព្រៃវែង នូវថវិកា និងរទេះជនពិការ ចំនួន ៣គ្រឿង ជូនដល់ចាស់ជរាពិការ សម្រាប់ប្រើប្រាស់ និងបានផ្តល់បន្ថែមជា អង្ករ គ្រឿងបរិភោគជូនគ្រួសារក្រីក្រ ចំនួន ២គ្រួសារផងដែរ។

ឯកឧត្តម តូច ចាន់នី បានពាំនាំការសួរសុខទុក្ខពីសំណាក ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមការងារថ្នាក់កណ្តាលចុះជួយស្រុកពញាក្រែក ខេត្តត្បូងឃ្មុំ និងឃុំជាច ស្រុកកំចាយមារ ខេត្តព្រៃវែង ក្នុងនោះឯកឧត្តម បានថ្លែងមតិកោតសរសើរលើកទឹកចិត្តផងដែរ ដល់មន្រ្តីមូលដ្ឋានយើងគ្រប់លំដាប់ថ្នាក់ ដែលបានបន្តចូលរួមអនុវត្តយ៉ាងសកម្មនូវរាល់ភារកិច្ចនយោបាយសំខាន់ៗក្នុងការថែរក្សាសន្តិសុខ សណ្ដាប់ធ្នាប់ និងប្រក្រតីភាព ជីវភាពរស់នៅរបស់ប្រជាពលរដ្ឋតាមភូមិ ឃុំ ដោយឡែក ឃុំកណ្តោលជ្រុំ ខិតខំពុះពារឆ្លងកាត់ការលំបាក និងដោះស្រាយផលប៉ះពាល់ទាំងឡាយដែលបង្កឡើងដោយជំងឺកូវីដ-១៩ ៕