នគរបាលក្រុងប៉ោយប៉ែត បញ្ជូនជនសង្ស័យ៣នាក់ ជាមុខសញ្ញាឆក់ ទៅសាលាដំបូងខេត្ត បន្ទាប់ពីឃាត់ខ្លួន

ភ្នំពេញ៖ ដើម្បីភូមិ ឃុំ សង្កាត់មាន សុវត្ថិភាព លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ តែងតែដាក់បទបញ្ជាយ៉ាងម៉ឺងម៉ាត់ដល់អធិការនគរបាល ក្រុង ស្រុក ទាំង០៩ ត្រូវយកចិត្តទុកដាក់បង្រ្កាបរាល់បទល្មើសកើតឡើងក្នុងមូលដ្ឋានរបស់ខ្លួនឲ្យខាងតែបាន ។

ជាលទ្ធផល ក្រោយពីមានបណ្តឹងពីជនរងគ្រោះក្នុងករណីចោរឆក់កាបូប នៅវេលាម៉ោង០,៥០ រំលងអាធ្រាត ឈានចូលថ្ងៃទី១០ ខែកញ្ញា ឆ្នាំ២០២២ នៅមុខអាហារដ្ឋានវ៉ាយ ស្ថិតក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត កម្លាំងនគរបាលបានឃាត់ខ្លួនជនសង្ស័យបានចំនួន០៣នាក់ ជាបន្តបន្ទាប់ក្នុងចំណោមបក្ខពួកគេ០៤នាក់ បញ្ជូនទៅស្នងការដ្ឋាននគរបាលខេត្តចាត់បន្តតាមនិតិវិធី ។

លោកវរសេនីយ៍ឯល សៅ សារឿន អធិការនគរបាល ក្រុងប៉ោយប៉ែត បានឲ្យដឹងថា៖ ជនរងគ្រោះឈ្មោះ ផន សិលា ភេទស្រី អាយុ២១ឆ្នាំ មុខរបរបុគ្គលិកកាស៊ីណូ ស្នាក់នៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ។មុនពេលកើតហេតុ នារីរងគ្រោះ បានជិះម៉ូតូក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើ ស្រាប់តែមានជនសង្ស័យចំនួន៤នាក់ជិះម៉ូតូចំនួន២គ្រឿង មកពីក្រោយជនរងគ្រោះគឺស្រមទិសគ្នា បានធ្វើសកម្មភាពឆក់កាបូបតែពុំបានសម្រេច ក្នុងនោះមានម៉ូតូជនសង្ស័យដែលធ្វើសកម្មភាពឆក់នោះ១គ្រឿងម៉ាកហុងដាឌ្រីម ពណ៌ខ្មៅ ស៊េរីឆ្នាំ២០២២ ពាក់ផ្លាក់លេខ1X-6454 បន្ទាយមានជ័យ បើកបរដោយឈ្មោះផេង ភេទប្រុស (គេចខ្លួន) និងឈ្មោះញ៉ា ភេទប្រុស ជិះពីក្រោយជាអ្នកឆក់ (គេចខ្លួន) ក៏ជ្រុលទៅបុកគូទឡានគេចតទុក បណ្ដាលអោយដួលរត់ចោល ម៉ូតូ។

លោកអធិការបានបញ្ជាក់ថា ក្រោយពីទទួលបានព័ត៌មាន កម្លាំងប៉ុស្ដិ៍នគរបាលរដ្ឋបាលប៉ោយ ប៉ែត បានចុះទៅដល់កន្លែងកើតហេតុ ហើយក៏ប្រទះឃើញមុខសញ្ញាគួរសង្ស័យចំនួន២នាក់ ជិះម៉ូតូម៉ាកហុងដាហ្សូម័អិច ពណ៌ទឹកក្រូច-ស មកក្បែរកន្លែងកើតហេតុ ទើបកម្លាំងយើងធ្វើការឃាត់ខ្លួន រួមទាំងម៉ូតូចំនួន២គ្រឿងខាងលើ មកសាកសួរ មាន៖ឈ្មោះម៉ុន ផានិត និងឈ្មោះណាន ថៃហៀង ពួកគេទាំង០២នាក់ នៅភូមិក្បាលស្ពាន២ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ។ជនសង្ស័យក៏បានឆ្លើយសារភាពថាខ្លួននិងបក្សពួកចំនួន២នាក់ទៀតពិតជាបានធ្វើសកម្មភាពឆក់កាបូបគេពិតប្រាកដមែន។ចំណែកឈ្មោះ ខេង លាភហេង ហៅ ផេងនិងឈ្មោះញ៉ា ក្រោយជិៈទៅបុកឡានពួកគេទុកម៉ូតូចោលរត់គេចខ្លួន ។

លោក អធិការក្រុងបានបញ្ជាក់ថា ក្រោយពីទទួលបានចម្លើយសារភាពនិងកំណត់បានពីមុខសញ្ញា ហើយនោះ នៅវេលាម៉ោង១០ព្រឹក ថ្ងៃដដែលកម្លាំងប៉ុស្ដិ៍នគរបាលរដ្ឋបាលប៉ោយប៉ែត បានឈានដល់ការឃាត់ខ្លួនជនសង្ស័យម្នាក់ទៀតឈ្មោះ ខេង លាភហេង ហៅ ផេង ស្នាក់នៅបន្ទប់ជួល ខាងកើតវត្ដត្រាច ភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្ដបន្ទាយមានជ័យ ។បច្ចុប្បន្នជនសង្ស័យទាំង០៣នាក់ និងវ្តថុតាងម៉ូតូជិៈធ្វើសកម្មភាព នគរបាលជំនាញផ្នែកព្រហ្មទណ្ឌ បានរៀបចំសំណុំរឿងបញ្ជូនទៅស្នងការដ្ឋាននគរបាលខេត្តនិងបានបញ្ជូនបនតទៅសាលាដំបូងខេត្តចាត់ការតាមនិតិវិធីហើយដែរ។ចំណែកបក្ខពួក០១នាក់ឈ្មោះញ៉ា កំពុងគេចខ្លួននោះកម្លាំងនគរបាលជំនាញ កំពុងស្រាវជ្រាវ ចាប់ខ្លួនយក មកផ្តន្ទាទោសផងដែរ៕