ក្រសួងទេសចរណ៍ ចូលរួមពិព័រណ៍ទេសចរណ៍អន្តរជាតិនៅក្រុងហូជីមិញ ដើម្បីទាក់ទាញទេសចរមកកម្ពុជា

ភ្នំពេញ៖ ឯកឧត្ដម ថោង ខុន រដ្ឋមន្ត្រីក្រសួងទេសចរណ៍ បានដឹកនាំប្រតិភូក្រសួងទេសចរណ៍ ព្រមទាំងសិល្បករ ក្រុមហ៊ុនឯកជនប្រមាណជាង១០០នាក់ ចូលរួមតាំងពិព័រណ៍ទេសចរណ៍ អន្ដរជាតិឆ្នាំ២០២២ ឬហៅកាត់ថា ITE HCMC 2022 នៅទីក្រុងហូជីមិញ ប្រទេសវៀតណាម ដើម្បីបង្កើនការផ្សព្វផ្សាយពីគោលដៅទេសចរណ៍កម្ពុជា សំដៅទាក់ទាញទេសចរឱ្យមកទស្សនា កម្ពុជាបន្ថែមទៀត។

ព្រឹត្តិការណ៍តាំងពិព័រណ៍ទេសចរអន្តរជាតិឆ្នាំ២០២២ (International Travel Expo Ho Chi Minh City 2022) ធ្វើឡើងចាប់ពីថ្ងៃទី៦-១១ ខែកញ្ញា ឆ្នាំ២០២២ ដោយមានការចូលរួមពីក្រុមហ៊ុនអន្តរជាតិជាង៣០០ស្តង់ អ្នកសារព័ត៌មាន និងអ្នកទិញអន្តរជាតិប្រមាណជាង១៥០នាក់ មកពីបណ្តាប្រទេសជាង៥០ក្នុង តំបន់និងពិភពលោក ដើម្បីជំរុញការផ្សព្វផ្សាយគោលដៅទេសចរណ៍រួមគ្នា វៀតណាម កម្ពុជា ឡាវ មីយ៉ាន់ម៉ា ក៏ដូចជាបណ្ដាប្រទេសក្នុងតំបន់អាស៊ានដទៃទៀតឱ្យកាន់តែទូលំទូលាយ ដែលជាកិច្ចសហ ប្រតិបត្តិការរួមគ្នាបើកទទួលទេសចរអន្តរជាតិឡើងវិញ។

នៅថ្ងៃទី៨ ខែកញ្ញា ឆ្នាំ២០២២ គឺជាថ្ងៃកាត់ខ្សែបូរបើកសម្ពោធជាផ្លូវការនៃពិព័រណ៍ទេសចរណ៍អន្ដរជាតិ (ITE HCMC 2022) ហើយបន្ទាប់ពីពិធីកាត់ខ្សែបូររួចមក ក៏មានការដើរទស្សនកិច្ចរបស់ថ្នាក់ដឹកនាំជាន់ខ្ពស់ (VIP Tour) ទស្សនាតាមស្តង់នៃបណ្តាប្រទេសនីមួយៗដែលបានចូលរួមក្នុងពិព័រណ៍នេះ ក្នុងនោះក៏បាន មកទស្សនាស្ដង់ពិព័រណ៍របស់កម្ពុជាផងដែរ។

លោក ប្រាក់ វុទ្ធី ប្រធាននាយកដ្ឋានសិក្សាទីផ្សារនិងផ្សព្វផ្សាយទេសចរណ៍ក្រៅប្រទេស នៃក្រសួងទេសចរណ៍ បានឱ្យដឹងថា សម្រាប់កម្ពុជា ក្រៅពីការផ្សព្វផ្សាយពីគោលដៅទេសចរណ៍ រួមទាំងមូល ក៏មានការផ្សព្វផ្សាយអំពីគោលដៅទេសចរណ៍ម៉ាយស៍ (MICE) និងផ្សព្វផ្សាយ «កម្ពុជាជាគោលដៅទេសចរណ៍កីឡា» តាមរយៈព្រឹត្តិការណ៍ស៊ីហ្គេមឆ្នាំ២០២៣ (SEA Games 2023) អាស៊ានប៉ារ៉ាហ្គេម (ASEAN Para Games) និងព្រឹត្តិការណ៍កីឡាយុវជនអាស៊ីឆ្នាំ២០២៩ (Asian Youth Games 2029) ដែលកម្ពុជានឹងធ្វើជាម្ចាស់ផ្ទះ។

លោក ប្រាក់ វុទ្ធី បានបន្តថា នេះគឺជាលើកទី១៦ហើយដែលកម្ពុជាបានចូលរួមពិព័រណ៍ទេសចរណ៍ អន្ដរជាតិនៅប្រទេសវៀតណាម ដោយមានពន្លារបស់ព្រះរាជាណាចក្រកម្ពុជា រៀបចំតុបតែងនិងមានរចនាបថជារូបពហុកីឡដ្ឋានជាតិមរតតេជោ ក្នុងគោលបំណងផ្សព្វផ្សាយ ព្រឹត្តិការណ៍ប្រកួត កីឡាស៉ីហ្គេមឆ្នាំ២០២៣ និងគោលដៅទេសចរណ៍សំខាន់ៗរបស់កម្ពុជា ព្រមទាំងមានការចូលរួម ពីផ្នែកឯកជន (Co-Exhibitors) ចំនួន១២ក្រុមហ៊ុន ដើម្បីផ្តល់ព័ត៌មាននិង ផ្សព្វផ្សាយលក់កញ្ចប់ ទស្សនកិច្ចរបស់ខ្លួន ជាមួយអថិតិជនដោយផ្ទាល់។

លោកបន្តទៀតថា នៅពន្លារបស់កម្ពុជាគឺមានការសម្តែងរបាំជូនពរស្វាគមន៍ និងផ្តល់ជូននូវវត្ថុអនុស្សាវរីយ៍ ដល់ប្រតិភូជាន់ខ្ពស់ទាំងអស់ដែលបានអញ្ជើញមកទស្សនាពន្លាកម្ពុជា ព្រមទាំងថតរូបភាពជាមួយ សិល្បករ/សិល្បការិនីទុកជាអនុស្សាវរីយ៍។

នៅក្នុងពន្លារបស់កម្ពុជាក៏មានការចាក់វីដេអូស្ប៉តបង្ហាញពីតំបន់គោលដៅទេសចរណ៍សំខាន់ៗ និងមានការសម្តែងរបាំជូនភ្ញៀវទស្សនាជាប្រចាំ ហើយចំពោះផ្នែកឯកជនដែលមាន១២ក្រុមហ៊ុន ក៏មានសកម្មភាពណាត់ជួបជាមួយដៃគូផ្តល់ព័ត៌មាន និងលក់កញ្ចប់ទស្សនកិច្ចមកទស្សនាកម្ពុជាជូនភ្ញៀវ ទេសចរវៀតណាម និងទេសចរអន្តរជាតិនៃបណ្តាប្រទេសក្នុងតំបន់និងពិភពលោកផងដែរ។

ប្រធាននាយកដ្ឋានរូបនេះបានបង្ហាញសុទិដ្ឋិនិយមថា តាមរយៈព្រឹត្តិការណ៍ខាងលើ ក្រសួងទេសចរណ៍ មានការរំពឹងថាកម្ពុជានឹងអាចទាក់ទាញភ្ញៀវទេសចរ និងវិនិយោគិនវៀតណាមឱ្យមកទស្សនា ប្រទេសកម្ពុជាកាន់តែច្រើនថែមទៀតនៅឆ្នាំ២០២២-២០២៣ ដែលជាដំណាក់កាលស្តារឡើងវិញនៃ វិស័យទេសចរណ៍កម្ពុជា៕