អភិបាលខេត្តមណ្ឌលគិរី ណែនាំដល់មន្ត្រីជំនាញ អាជ្ញាធរឃុំ-សង្កាត់ ត្រូវខិតខំបំពេញសេវាឲ្យបានឆាប់រហ័ស និងឆ្លើយតបគ្រប់តម្រូវការចាំបាច់របស់ប្រជាពលរដ្ឋ
ភ្នំពេញ៖ ឯកឧត្តម ថង សាវុន អភិបាលខេត្តមណ្ឌលគិរី ណែនាំដល់មន្ត្រីជំនាញ អាជ្ញាធរឃុំ-សង្កាត់ ត្រូវខិតខំបំពេញសេវាឲ្យបានឆាប់រហ័ស និងឆ្លើយតបគ្រប់តម្រូវការចាំបាច់របស់ប្រជាពលរដ្ឋនៅមូលដ្ឋាន។
ឯកឧត្តម បានលើកឡើងបែបនេះ នៅក្នុងកិច្ចប្រជុំសាមញ្ញលើកទី៣៩ អាណត្តិទី ៣ របស់ក្រុមប្រឹក្សាខេត្តមណ្ឌលគិរី ដែលបានប្រព្រឹត្តទៅក្រោមអធិបតីភាព ឯកឧត្ត ម៉ែន ង៉ុយ ប្រធានក្រុមប្រឹក្សាខេត្ត ដោយមានការអញ្ជើញចូលរួមពី ឯកឧត្តម លោកជំទាវសមាជិកក្រុមប្រឹក្សាខេត្ត លោក លោកស្រីអភិបាលរងខេត្តចំនួន ៨ រូប នាយក នាយករងរដ្ឋបាលសាលាខេត្ត ប្រធាន អនុប្រធាន មន្ទីរអង្គភាពជុំវិញខេត្ត មេបញ្ជាការកងកម្លាំងប្រដាប់អាវុធទាំងបីប្រភេទ អភិបាល អភិបាលរងក្រុង-ស្រុកទាំង៥ នៅអាគារក្រុមប្រឹក្សាខេត្តមណ្ឌលគិរី នៅរសៀលថ្ងៃទី ០១ ខែកញ្ញា ឆ្នាំ ២០២២ ។
ឯកឧត្តមអភិបាលខេត្ត ក៏បានជម្រាបជូនអង្គប្រជុំពីសកម្មភាពការងារប្រចាំខែសីហា របស់គណ:អភិបាលខេត្ត និងសមិទ្ធផលថ្មីៗដែលខេត្តបានរៀបចំ ដើម្បីលើកកម្ពស់សោភ័ណភាព អត្តសញ្ញាណខេត្ត និងជំរុញការទាក់ទាញភ្ញៀវទេសចរណ៍សម្រាប់ក្រុងសែនមនោរម្យ ។
ឯកឧត្តមបានបញ្ជាក់ថា សមិទ្ធផលថ្មីៗទាំងនោះមាន ការកសាងរង្វង់មូលដំរី នៅចំនុចផ្លូវប្រសប់ក្បែរវិមានឯករាជ្យ ការកសាងស្លាក ” ខេត្តមណ្ឌលគិរីសូមស្វាគមន៍ ” ដោយមានរូបដំរី២ទ្រពីក្រោម និងកសាងស្លាក ” អរគុណសន្តិភាព ” ជាដើម ដែលការចំណាយទាំងអស់នេះ បានមកពីការចូលរួមរបស់សប្បុរសជននានា តាមរយៈការគៀងគរ ដើម្បីចូលរួមអភិវឌ្ឍន៍ខេត្តមណ្ឌលគិរី ។ ម្យ៉ាងវិញទៀត រដ្ឋបាលខេត្ត នឹងរៀបចំជួសជុលផ្លូវ កែលម្អសោភ័ណភាព រៀបចំដាំដើមឈើ ដាក់ភ្លើងបំភ្លឺតាមដងផ្លូវសំខាន់ៗក្នុងក្រុងសែនមនោរម្យផងដែរ ។ហើយមន្ត្រីជំនាញ អាជ្ញាធរឃុំ-សង្កាត់ ត្រូវខិតខំបំពេញការងារផ្តល់សេវាឲ្យបានឆាប់រហ័ស និងឆ្លើយតបគ្រប់តម្រូវការចាំបាច់របស់ប្រជាពលរដ្ឋនៅមូលដ្ឋាន ។
ក្រៅពីនេះ ឯកឧត្តម ថង សាវុន ណែនាំដល់សមត្ថកិច្ចជំនាញនិងអាជ្ញាធរមូលដ្ឋាន ត្រូវរួមសហការគ្នាដើម្បីការពារធនធានធម្មជាតិ ជាពិសេសទប់ស្កាត់បទល្មើសទន្ទ្រានកាន់កាប់ដីដោយខុសច្បាប់ ធ្វើយ៉ាងណារក្សាការពារដីសាធារណ:របស់រដ្ឋឱ្យបានគង់វង្ស ទុកសម្រាប់ប្រើប្រាស់ជាប្រយោជន៍សាធារណៈនៅពេលអនាគត។
ឯកឧត្ត ម៉ែន ង៉ុយ ប្រធានក្រុមប្រឹក្សាខេត្ត បានណែនាំដល់ស្នងការដ្ឋាននគរបាលខេត្ត ត្រូវជំរុញការចុះធ្វើអត្តសញ្ញាណប័ណ្ណជូនប្រជាពលរដ្ឋនៅទូទាំងខេត្ត ឱ្យបានឆាប់រហ័សតាមផែនការកំណត់ ដើម្បីឲ្យប្រជាពលរដ្ឋ មានសិទ្ធិចូលរួមបោះឆ្នោតជ្រើសរើសតំណាងរាស្ត្រនៅពេលខាងមុខ ។
ឯកឧត្តមប្រធានក្រុមប្រឹក្សាខេត្ត បានជំរុញដល់មន្ទីរសុខាភិបាល ត្រូវរៀបចំផែនការ ចុះចាក់វ៉ាក់សាំងការពារជំងឺកូវីដ- ១៩ ជូនប្រជាពលរដ្ឋនៅតាមមូលដ្ឋាន និងបន្តការផ្សព្វផ្សាយឲ្យពលរដ្ឋបន្តអនុវត្តវិធានការការពារជំងឺកូវីដ-១៩ ព្រមទាំងស្នើសុំឱ្យមានពេទ្យឆ្មបនៅគ្រប់ប៉ុស្តិ៍សុខភាព នីមួយៗផងដែរ៕
