ឯកឧត្តម នេត្រ ភក្ត្រា អញ្ជើញប្រគល់ទទួលធុងសំរាមចំនួន ១០ ពីក្រុមហ៊ុនមីជាតិ ប្រគេនដល់ព្រះសង្ឃ គង់នៅវត្តមឧត្តមសាមគ្គី និងសាលាបឋមសិក្សាឈើទាល

ភ្នំពេញ៖ ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន នៅរសៀលថ្ងៃទី៣០ ខែសីហា ឆ្នាំ២០២២ បានអញ្ជើញប្រគល់ទទួលធុងសំរាមចំនួន ១០ ពីក្រុមហ៊ុនមីជាតិដើម្បី ប្រគេនដល់ព្រះសង្ឃគង់នៅវត្ត មឧត្តមសាមគ្គីនិងសាលាបឋមសិក្សាឈើទាល ស្ថិតក្នុងស្រុកមុខកំពូល ខេត្តកណ្តាល។

ឯកឧត្តម នេត្រ ភក្ត្រា បានលើកឡើងថា ក្រុមហ៊ុនមីជាតិនិងក្រុមហ៊ុនវីតាល់បានចូលរួមយ៉ាងសកម្ម ជាមួយក្រសួងបរិស្ថានក្នុងកិច្ចការសង្គមជាពិសេសការចូលរួមដាំដើមកោងកាងបង្កើតភាពបៃតងនៅតំបន់សមុទ្របន្ស៊ាំនឹងការប្រែប្រួលអាកាសធាតុ និងឥឡូវនេះបានចូលរួមផ្តល់ធុងសំរាមដើម្បីប្រគេនដល់ ព្រះសង្ឃដើម្បីដាក់នៅក្នុងទីធ្លាវត្តនិងសាលារៀនចូលរួមសម្អាតអនាម័យបរិស្ថាន។

ឯកឧត្តមរដ្ឋលេខាធិការបានថ្លែងអំណរគុណចំពោះក្រុមហ៊ុនមីជាតិដែលបានផ្តល់ការឧបត្ថម្ភធុងសំរាមនេះ ឆ្លើយតបនឹងសំណូមពររបស់ព្រះសង្ឃ។

ជាមួយគ្នានេះ ឯកឧត្តម នេត្រ ភក្ត្រា បានថ្លែងអំណរគុណព្រះសង្ឃវត្តឧត្តមសមាគ្គីដែល បានចូលរួម ប្រតិបត្តិមេត្រីបរិស្ថាន រៀបចំឱ្យមានធុងសំរាមដាក់តាមទីធ្លាវត្តនិងសាលា បឋមសិក្សាដើម្បីងាយស្រួល ដល់ពុទ្ធបរិស័ទនិងសិស្សានុសិស្សទុក ដាក់សំណល់រឹងសំរាមឱ្យបានត្រឹមត្រូវ និងថែរក្សាបាន សោភ័ណភាពល្អ អនាម័យបរិស្ថានស្អាត និងទាំងវត្តអារាម និងសាលារៀនមានផាសុកភាពសម្រាប់ ព្រះសង្ឃគង់ ពុទ្ធបរិស័ទមកធ្វើបុណ្យ និងសិស្សានុសិស្សរៀនសូត្រ៕