គ្រឿងឧបភោគបរិភោគ ជាអំណោយរបស់ឧត្ដមសេនីយ៍ឯក ហ៊ុន ម៉ាណែត និងលោកជំទាវ ត្រូវបានប្រគល់ជូនតំបន់ប្រតិបត្តការសឹករងព្រះវិហារ
ភ្នំពេញ៖ គ្រឿងឧបភោគបរិភោគរួមមាន អង្ករចំនួន ១០តោន មីចំនួន ២០០កេស និងត្រីខ ចំនួន ១០០កេស ជាអំណោយរបស់ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក និងលោកជំទាវ ពេជ ច័ន្ទមុន្នីជូនតំបន់ប្រតិបត្តការសឹករង ព្រះវិហារសម្រាប់ចែកជូនដល់សមាជិកសមាគមអតីតយុទ្ធជនកម្ពុជាក្នុងខេត្តព្រះវិហារ ដែលមានជីវភាពទីទ័ល និងជួយដល់ប្រជាពលរដ្ឋដែលជួបការលំបាក ឬដោយគ្រោះមហន្តរាយផ្សេងៗ ត្រូវបានក្រុមការងារជំនួយការឯកឧត្តមមេបញ្ជាការកងទ័ពជើងគោក បានប្រគល់ជូន លោកវរសេនីយ៍ឯក ម៉ៅ សុវណ្ណ មេបញ្ជាការរង នាយសេនាធិការតំបន់ប្រតិបត្តិការសឹករងព្រះវិហារ និងជាអនុប្រធានសមាគមអតីតយុទ្ធជនកម្ពុជា ។
ជំនួសមុខឲ្យឧត្តមសេនីយ៍ទោ ច័ន្ទ សុភ័ក្ត្រា មេបញ្ជាការតំបន់ប្រតិបត្តិការសឹករងព្រះវិហារ និងក្នុងនាមនាយទាហាន នាយទាហានរង និងពលទាហាន នៃតំបន់ប្រតិបត្តការសឹករងព្រះវិហារ លោកវរសេនីយ៍ឯក ម៉ៅ សុវណ្ណ បានគោរពថ្លែងអំណរគុណយ៉ាងជ្រាលជ្រៅបំផុត ជូនចំពោះ ឯកឧត្តម ហ៊ុន ម៉ាណែត និងលោកជំទាវ ដែលតែងតែយកចិត្តទុកដាក់គិតគូរដល់សុខទុក្ខ និងការរស់នៅ របស់យោធិន និងបងប្អូនអតីតយុទ្ធជន សំដៅលើកកម្ពស់គុណភាព ការរស់នៅរបស់កងទ័ពឲ្យកាន់តែប្រសើ ក៏ដូចជាប្រជាជនដែលរងគ្រោះមហន្តរាយផ្សេងៗ៕
