ភ្នំពេញ៖ កងយោធពលខេមរៈភូមិន្ទ មកពីតាមភូមិភាគ មាន៩អង្គភាពមានចំនួនជាង២០០នាក់ ចំណុះឱ្យបញ្ជាការដ្ឋានជើងគោក កំពុងធ្វើការហ្វឹកហ្វឺនលើជំនាញបោសម្អាតមីន ជំនាញសង្គ្រោះបឋម ជំនាញផែនទី ជំនាញកម្ទេចគ្រាប់ និងជំនាញបើកបររយន្តធំ ដើម្បីចុះទៅធ្វើការបោសសម្អាតមីនជាកស្តែងនៅតំបន់ដែលមានមីន ដើម្បីឱ្យប្រទេសកម្ពុជាគ្មានមីន នៅត្រឹមឆ្នាម២០២៥ខាង។
ក្នុងដំណើរចុះទៅពិនិត្យលើការហ្វឹកហ្វឺនជំនាញខាងលើនេះ នៅថ្ងៃទី១៩ ខែសីហា ឆ្នាំ២០២២ ឯកឧត្តម នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព អមដំណើរដោយឯកឧត្តម លោកជំទាវ ជាអគ្គនាយករង និងប្រធាននាយកដ្ឋាន នៃមជ្ឈមណ្ឌលជាតិរក្សាសន្តិភាព បានថ្លែងថា សិក្ខាកាមដែលជាយោធាមកពី៩អង្គភាព ចំណុះឱ្យបញ្ជាការដ្ឋានជើងគោកនេះ គឺត្រូវធ្វើហ្វឹកហ្វឺនផ្នែកទ្រឹស្តី និងអនុវត្តនៅទីវាល គឺមានរយៈពេល៥សប្តាហ៍។
ក្រោយសិក្ខាការបញ្ចប់វគ្គសិក្សា មជ្ឈមណ្ឌលជាតិនឹងធ្វើការបំពាក់នូវសម្ភារ ឧបករណ៍ និងរថយន្ត សម្រាប់ចុះទៅអនុវត្តជាក់ស្តែងនៅតំបន់ដែលមានមីន។ ឯកឧត្តម នាយឧត្តមសេនីយ៍ បញ្ជាក់ឱ្យទៀតថា ផែនការហ្វឹកហ្វឺនលើជំនាញបោសសម្អាតមីនសម្រាប់សិក្ខាកាមទ័ពចំណុះឱ្យបញ្ជាការដ្ឋានកងទ័ពជើងគោកមានចំនួន៤៧វគ្គទើបបញ្ចប់ ដែលមានសិក្ខាកាមយោធាជាង១០,០០នាក់៕
