បាត់ដំបង៖ មានករណីហិង្សាដោយចេតនាមានស្ថានទម្ងន់ទោស (ដែកត្បែង) មួយបានកើតឡើងបង្កដោយជនសង្ស័យជាកូនប្រុស ប្រដាប់ដោយដែកត្បែងធ្វើសកម្មភាពវាយទៅលើជនរងគ្រោះជាឪពុកបង្កើតឈ្មោះ ម៉ុក ម៉ាញ់ ភេទប្រុស អាយុ៧១ឆ្នាំ រស់នៅចំណុចកើតហេតុ (ជរាពិការភាព) ចំនួន១ដែកត្បែង ចំលើក្បាលខាងឆ្វេងបណ្តាលអោយរងរបួសមធ្យម។
ករណីខាងលើនេះបានកើតឡើងកាលពីថ្ងៃទី១៦ ខែសីហា ឆ្នាំ២០២២ វេលាម៉ោង២២និង៣៥នាទី ត្រង់ចំណុចក្រុមទី២៧ ភូមិជ្រៃ២ ឃុំជ្រៃ ស្រុកមោងឫស្សី ខេត្តបាត់ដំបង។
ដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង ក៏ដូចជាយោបល់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ និងដោយមានការសម្របសម្រួលនីតិវិធីពីឯកឧត្តម កែវ សុជាតិ ព្រះរាជអាជ្ញាអមសាលាដំបូងខេត្ត លោកវរសេនីយ៍ឯក ស គឹមឡុង អធិការនគរបាលស្រុកមោងឫស្សី បានធ្វើការដឹកនាំកម្លាំងក្នុងអង្គភាពធ្វើការស៊ើបអង្កេតស្រាវជ្រាវនិងឃាត់ខ្លួនជនសង្ស័យម្នាក់ឈ្មោះ ម៉ាញ់ មាន ភេទប្រុស អាយុ៣៣ឆ្នាំ នៅថ្ងៃទី១៧ ខែសីហា ឆ្នាំ២០២២ វេលាម៉ោង០៧និង៣០នាទី ត្រង់ចំណុចក្រុមទី២៧ ភូមិជ្រៃ២ ឃុំជ្រៃ ស្រុកមោងឫស្សី ខេត្តបាត់ដំបង ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានប្រើដែកត្បែងវាយទៅលើជនរងគ្រោះជាឪពុកបង្កើតខ្លួនពិតប្រាកដមែន ក្រោមមូលហេតុផឹកស្រាស្រវឹង។
ករណីនេះ ជនដៃដល់ខាងលើត្រូវបានសមត្ថកិច្ចជំនាញកសាងសំណុំរឿងបញ្ជូនទៅសាលាដំបូងខេត្ត ដើម្បីផ្តន្ទាទោសតាមច្បាប់៕
