ស្នងការខេត្តព្រះសីហនុ អំពាវនាវដល់ភ្ញៀវទេសចរណ៍ ម្ចាស់ទូកអាជីវកម្ម ប្រជានេសាទ មានការប្រុងប្រយ័ត្នខ្ពស់ ចំពោះបញ្ហាអាកាសធាតុ

ភ្នំពេញ៖ ស្នងការនគរបាលខេត្តព្រះសីហនុ អំពាវនាវដល់ភ្ញៀវទេសចរណ៍ ម្ចាស់ទូកអាជីវកម្ម ប្រជានេសាទ មានការប្រុងប្រយ័ត្នខ្ពស់ ចំពោះបញ្ហាអាកាសធាតុ ដែលក្រសួងធនធានទឹកបានជូនដំណឹង។

នៅថ្ងៃទី៩ ខែសីហា ឆ្នាំ២០២២ ដោយមានការចង្អុលបង្ហាញ ពីសំណាក់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានចាត់ឲ្យលោកវរសេនីយ៍ឯក សួន គីមហេង ស្នងការរងទទួលជួយ ដឹកនាំការងារការិយាល័យទេសចរណ៍ និងការិយាល័យចរាចរណ៍ផ្លូវទឹក បានដឹកនាំកម្លាំងការិយាល័យទាំង២ ចុះផ្សព្វផ្សាយ ពីអាកាសធាតុតាមការណែនាំរបស់ ក្រសួងធនធានទឹក និងឧតុនិយម ក្នុងអំឡុង ថ្ងៃទី១០-១៦ ខែសីហា ឆ្នាំ២០២២។

ចន្លោះថ្ងៃទី១០-១៣ ខែសីហា ប្រទេសកម្ពុជា នឹងទទួលរងឥទ្ធិពល ពីជ្រលងនៃប្រព័ន្ធសម្ពាធទាប (ITCZ) មកពីភាគខាងជើងប្រទេសជិតខាង រួមជាមួយនឹងឥទ្ធិពលព្យុះទី៧ឈ្មោះ មូឡាន (MULAN) ដែលមានដំណើរ ឆ្ពោះទៅទិសខាងជើងប្រទេសវៀតណាម នៅថ្ងៃទី១១ ខែសីហា ដែលនឹងមានខ្យល់មូសុងនិរតីបក់ខ្លាំងមកលើ តំបន់សមុទ្រ ដែលបណ្តាអោយខេត្តជាប់មាត់សមុទ្រ នឹងអាចមានភ្លៀងធ្លាក់ច្រើន លាយឡំផ្គរ រន្ទះ ខ្យល់កន្រ្តាក់ ព្រមទាំងរលកសមុទ្រមានកំពស់ខ្ពស់ និងបន្តមានភ្លៀងធ្លាក់ពីតិចទៅមធ្យម។

សូមអំពាវនាវដល់ ម្ចាស់ទូកអាជីវកម្ម ប្រជានេសាទ មានការប្រុងប្រយ័ត្នខ្ពស់ ទាំងប្រព័ន្ធបច្ចេកទេស និងសំភារសុវត្ថិភាពផ្សេងៗ និងស្តាប់តាមការណែនាំរបស់អាជ្ញាធរមានសមត្តកិច្ចអោយបានខ្ជាប់ខ្ជួន ពិសេសភ្ញៀវទេសចរណ៍ សូមមានការប្រុងប្រយ័ត្នខ្ពស់ ប្រើប្រាស់អាវពោងទាំងពេលធ្វើដំណើរតាមទូក ទេសចរណ៍ និងពេលចុះលេងទឹក ព្រមទាំងចៀសវាងកុំទៅលេងដល់ទឹកជ្រៅ៕