ឯកឧត្តម អ៊ុយ រី និងឯកឧត្តម សុខ លូ អញ្ជើញជាអធិបតីភាពក្នុងវេទិកាស្ដីពីការពិគ្រោះយោបល់ ពង្រឹងកិច្ចសហប្រតិបត្តិការភាពជាដៃគូរវាងរដ្ឋបាលខេត្តបាត់ដំបង និងអង្គការសង្គមស៊ីវិល ដែលកំពុងប្រតិបត្តិការនៅក្នុងខេត្តបាត់ដំបង
ភ្នំពេញ៖ ឯកឧត្តម អ៊ុយ រី ប្រធានក្រុមប្រឹក្សាខេត្ត និងឯកឧត្តម សុខ លូ អភិបាលខេត្តបាត់ដំបង នៅព្រឹកថ្ងៃទី០៩ ខែសីហា ឆ្នាំ២០២២ បានអញ្ជើញជាអធិបតីភាព ក្នុងវេទិកាស្ដីពីការពិគ្រោះយោបល់ ពង្រឹងកិច្ចសហប្រតិបត្តិការភាពជាដៃគូរវាងរដ្ឋបាលខេត្តបាត់ដំបង និងអង្គការសង្គមស៊ីវិល ដែលកំពុងប្រតិបត្តិការនៅក្នុងខេត្តបាត់ដំបង នៅសាលប្រជុំអគារE សាលាខេត្តបាត់ដំបង ឦ
ក្នុងឱកាសនោះដែរ ឯកឧត្តម សុខ លូ បានមានប្រសាសន៍លើកឡើងថា នៅក្នុងខេត្តបាត់ដំបង មានសមាគម និងអង្គការមិនមែនរដ្ឋាភិបាលចំនួន ៣៥៦ ប៉ុន្តែជាក់ស្ដែងមានតែអង្គការ សមាគមចំនួន ១៤៧ប៉ុណ្ណោះ ដែលបាននឹងកំពុងប្រតិបត្តិការសកម្មភាព លើវិស័យនានាដូចជា វិស័យកសិកម្ម វិស័យដីធ្លី វិស័យសំណង់ វិស័យច្បាប់ ធនធានធម្មជាតិ អភិបាលកិច្ចល្អ អប់រំ កុមារស្រ្ដី យេនឌ័រ សុខាភិបាល សង្គមកិច្ច និងសេដ្ឋកិច្ច វប្បធម៌ជាដើម ។
ឯកឧត្តមបន្តថា រដ្ឋបាលខេត្ត តែងតែបានបង្កលក្ខណៈងាយស្រួលផ្ដល់កិច្ចសហការល្អ និងតែងតែសម្របសម្រួលឱ្យសមាគម និងអង្គការមិនមែនរដ្ឋាភិបាល ដេលចុះបញ្ជីស្របច្បាប់នៃព្រះរាជាណាចក្រកម្ពុជា មានសិទ្ធិសេរីភាពពេញលេញ ក្នុងការធ្វើសកម្មភាពរបស់ខ្លួន នៅតាមបណ្ដាមូលដ្ឋានក្នុងខេត្តបាត់ដំបង ។
ក្នុងនោះ ឯកឧត្តមក៏បានស្នើដល់អាជ្ញាធរដែនដី មន្ទីរអង្គភាព សមត្ថកិច្ចពាក់ព័ន្ធ បន្តសហការគ្នាឱ្យបានល្អជាំមួយបណ្ដាសមាគម អង្គការមិនមែនរដ្ឋាភិបាល ឬសហគមន៍ដែលបានចុះបញ្ជីត្រឹមត្រូវ និងបានអនុវត្តសកម្មភាពស្របតាមលក្ខន្ដិកៈ ។
ឯកឧត្តម ក៏បានអនុញ្ញាតិឱ្យអ្នកតំណាងសមាគម អង្គការមិនមែនរដ្ឋាភិបាល ឬសហគមន៍ ដើម្បីឡើងផ្ដល់ជាមតិយោបល់ ចោទជាសំណួរ និងសំណូមពរដល់រដ្ឋបាលខេត្តបាត់ដំបង អំពីបញ្ហាប្រឈមដែលតែងតែជួបប្រទះកន្លងមក ដើម្បីធ្វើការកែលម្អឱ្យបានប្រសើរជាងមុន ក្នុងន័យដើម្បីសហការគ្នាកាន់តែល្អជាងមុនបន្ថែមទៀត ។
ឆ្លៀតក្នុងឱកាសនោះដែរ ឯកឧត្តម សុខ លូ ក៏បានលើកឡើងអំពីបញ្ហាសណ្ដាប់ធ្នាប់ក្នុងខេត្តបាត់ដំបង ក៏ដូចជាបញ្ហាអនាម័យដែលកំពុងតែធ្វើការដោះស្រាយយ៉ាងមមាញឹកនាពេលបច្ចុប្បន្ន ។
ឯកឧត្តមបានមានប្រសាសន៍ថ្លែងអំណរគុណយ៉ាងជ្រាលជ្រៅចំពោះប្រជាពលរដ្ឋ ដែលជាម្ចាស់លំនៅដ្ឋាន បានធ្វើការស្ម័គ្រចិត្តរុះរើសំយ៉ាបផ្ទះ ផ្ទាំងប៉ាណូផ្សព្វផ្សាយ តាមការការណែនាំរដ្ឋបាលខេត្តបាត់ដំបង ដើម្បីចូលរួមក្នុងការលើកកម្ពស់សោភ័ណភាពនៅក្នុងក្រុងបាត់ដំបងឱ្យស័ក្ដិសម ជាទីក្រុងទេសចរណ៍ស្អាត អាស៊ាន ហើយក៏ជាគោលដៅទេសចរណ៍ប្រកបដោយគុណភាព និងភាពទាក់ទាញ់ដល់ភ្ញៀវទេសចរជាតិ និងអន្តរជាតិ ដែលចូលមកកម្សាន្ដនៅក្នុងក្រុងបាត់ដំបង និងខេត្តបាត់ដំបង ដែលអាចគយគន់សម្រស់សំណង់អគារបុរាណដ៏ចំណាស់ ដែលមានអាយុកាលរាប់រយឆ្នាំមកហើយ ។
ឯកឧត្តមបានមានប្រសាសន៍ថា បើថ្ងៃខាងមុខទៀតយើងបន្តចូលរួមក្នុងការស្ដារសណ្ដាប់ធ្នាប់ក្នុងក្រុងឱ្យកាន់តែស្រស់ស្អាតជាងនេះទៀតនោះ ទីក្រុងបាត់ដំបង នឹងក្លាយជាទីក្រុងវៃឆ្លាត(Smart-City)នាពេលអនាគតផងដែរ៕
