ឯកឧត្តម ស៊ឹង សុគង់ ដឹកនាំកិច្ចប្រជុំពិនិត្យវឌ្ឍនភាពការងារសម្រាប់ត្រៀមអនុវត្តក្នុងពេលដំណើរការអាជីវកម្មផ្លូវល្បឿនលឿនតភ្ជាប់ពីភ្នំពេញ-ព្រះសីហនុ

ភ្នំពេញ៖ ឯកឧត្តម ស៊ឹង សុគង់ អនុរដ្ឋលេខាធិការក្រសួងសាធារណការ និងដឹកជញ្ជូន នាថ្ងៃទី៩ ខែសីហា ឆ្នាំ២០២២ បានអញ្ជើញដឹកនាំកិច្ចប្រជុំពិនិត្យវឌ្ឍនភាពការងារសម្រាប់ត្រៀមអនុវត្តក្នុងពេលដំណើរការអាជីវកម្មផ្លូវ ល្បឿនលឿនតភ្ជាប់ពីរាជធានីភ្នំពេញទៅក្រុងព្រះសីហនុ ដោយមានការអញ្ជើញចូលរួមពីប្រធាន អនុប្រធានក្រុមការងារទទួលបន្ទុកទាំង៥ក្រុម។

កិច្ចប្រជុំនេះធ្វើឡើងក្នុងគោលបំណងពិនិត្យ វឌ្ឍនភាពរបស់ក្រុមការងារ និងពិភាក្សាផ្តល់ជាអនុសាសន៍បន្ថែមសំដៅជំរុញការងារឱ្យបានឆាប់រហ័ស ពិនិត្យលើការរៀបចំទម្រង់លិខិតបទដ្ឋានគតិយុត្ត គ្រប់គ្រងផ្លូវល្បឿនលឿន ការរៀបចំផែនការផលិតវីដេអូអំពីការដាក់ដំណើរការ និងការប្រើប្រាស់ផ្លូវល្បឿន ការឆ្លើយតបនឹងគ្រោះមហន្តរាយធម្មជាតិ និងគ្រោះថ្នាក់ចរាចរណ៍ ការរៀបចំចងក្រងសេចក្តីណែនាំលើ ការងារគ្រប់គ្រងការដឹកជញ្ជូនលើសទម្ងន់កម្រិតកំណត់ដោយច្បាប់ ការងាររៀបចំពង្រាងឯកសារពាក់ព័ន្ធ និងការសាងសង់រូបសំណាកតាមការណែនាំដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល និងការងារ សម្របសម្រួលនិងរៀបចំកម្រៃសេវាប្រមូលចំណូល និងទូទាត់ផ្សេងៗលើការប្រើប្រាស់ផ្លូវល្បឿនលឿនផងដែរ៕ ស៊ឹង សុគង់