ឧត្តមសេនីយ៍ទោ សោម ស៊ុន បន្តនាំយកទេយ្យទាន ជាអំណោយរបស់ឯកឧត្តម ហ៊ុន ម៉ាណែត និងលោកជំទាវ ទៅប្រគេនព្រះសង្ឃគង់ចាំព្រះវស្សា នៅវត្តព្រះពន្លាជ័យ ក្នុងស្រុកស្ទោង

ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ប្រធានក្រុមការងាររបស់រាជរដ្ឋាភិបាលថ្នាក់ខេត្ត ចុះជួយមូលដ្ឋានឃុំបន្ទាយស្ទោង ស្រុកស្ទោងខេត្តកំពង់ធំ នៅថ្ងៃទី៧ ខែសីហា ឆ្នាំ២០២២ បានដឹកនាំសហការី ក្រុមការងាររបស់រាជរដ្ឋាភិបាល នាំយកទេយ្យទានដែលជាអំណោយដ៏ថ្លៃថ្លារបស់ឯកឧត្ដមបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី ទៅប្រគេនព្រះសង្ឃដែលកំពុងគង់ចាំវស្សា ហើយ មាន ការខ្វះខាត ចង្ហាន់ និង អាហារសម្រាប់លោកយាយលោកតាដែលស្នាក់អាស្រ័យនៅក្នុងវត្តព្រះពន្លាជ័យ ឃុំបន្ទាយស្ទោង ស្រុកស្ទោង ខេត្តកំពង់ធំ ។

លោកតា សាន់ ណឹង គណៈកម្មការអាចារ្យវត្តព្រះពន្លាជ័យ បានមានប្រសាសន៍ថា បច្ចុប្បន្ននេះព្រះសង្ឍដែលគង់ចាំព្រះវស្សានៅក្នុងវត្តព្រះពន្លាជ័យមានចំនួន២០អង្គ ហើយកំពុងមានការខ្វះខាតចង្ហាន់ដោយសារពុទ្ធបរិស័ទ មួយចំនួនមិនបានយកចង្ហាន់មកប្រគេនព្រះសង្ឃ ហើយការនិមន្តបិណ្ឌបាតនៅតាមភូមិក៏មិនសូវបានចង្ហាន់សម្រាប់ព្រះសង្ឃគ្រប់គ្រាន់ និងសម្រាប់លោកតានិងលោកយាយដែលស្នាក់អាស្រ័យ ក្នុង វត្ត ព្រមទាំង ក្រុម ជាងសំណង់ ដែល កំពុង សាងសង់ សាលពុទ្ឋិក: បឋមសិក្សានៅក្នុងវត្តនេះផងដែរ ។

ឧត្តមសេនីយ៍ទោ សោម ស៊ុន បានមានប្រសាសន៍ថានៅគ្រប់កាលៈទេសៈ ក្រុមការងាររបស់រាជរដ្ឋាភិបាលរួមជាមួយនឹងអាជ្ញាធរដែនដី រួមគ្នាបន្តដោះស្រាយរាល់ការលំបាករបស់ប្រជាពលរដ្ឋក៏ដូចជាព្រះសង្ឃដែលគង់ចាំព្រះវស្សានៅក្នុងទីវត្តអារាមនានានៅក្នុងឃុំបន្ទាយស្ទោងស្រុកស្ទោង ខេត្តកំពង់ធំ ជាបន្តបន្ទាប់មិនដែលអាក់ខាន ឡើយ ដោយមិនទុកឲ្យព្រះសង្ឃ និង លោកយា យ លោកតា ដាច់ ចង្ហាន់ និង អាហារ ប្រចាំថ្ងៃ ដែល បាន ដឹង ហើយ មិន បានដោះស្រាយនោះឡើយ ។

ឧត្តមសេនីយ៍ទោ សោម ស៊ុន បានបញ្ជាក់ថា ទេយ្យទាន ដែលបានយកមកអង្ករគ្រឿងឧបភោគបរិភោគនិងទឹកសុទ្ធ ប្រគេនសង្ឍដែលគង់ចាំព្រះវស្សា និង លោក យាយ លោកតា នៅក្នុងវត្តព្រះពន្លាជ័យនេះ ។

ព្រះតេជគុណ សែប ប្រុស ព្រះគ្រូចៅអធិការវត្ត បានថ្លែងអំណរគុណដ៏ជ្រាលជ្រៅជាទីបំផុតចំពោះឯកឧត្តមបណ្ឌិត ហ៊ុន ម៉ាណែត និងលោកជំទាវ តាមរយៈឧត្តមសេនីយ៍ទោ សោម ស៊ុន ប្រធានក្រុមការងាររបស់រាជរដ្ឋាភិបាលថ្នាក់ខេត្ត ចុះជួយមូលដ្ឋានឃុំបន្ទាយស្ទោង ស្រុកស្ទោង ខេត្តកំពង់ធំ ដែលជានិច្ចកាលតែងតែយកចិត្តទុកដាក់ដោះស្រាយរាល់ការលំបាកខ្វះខាតជូនប្រជាពលរដ្ឋនៅក្នុងឃុំបន្ទាយស្ទោងនិងព្រះសង្ឃនៅតាមទីវត្តអារាមនានានៅក្នុងឃុំបន្ទាយស្ទោងផងដែរ៕