កូរ៉េខាងត្បូងប្ដេជ្ញា នឹងពង្រឹងភាពជាដៃគូឱ្យកាន់តែខ្លាំងជាមួយអាស៊ាន នៅក្នុងកិច្ចពិភាក្សាថ្នាក់រដ្ឋមន្ត្រីការបរទេស

ភ្នំពេញ៖ អ្នកការទូតកំពូលរបស់ទីក្រុងសេអ៊ូលបាននិយាយក្នុងអំឡុងពេលនៃកិច្ចប្រជុំជាក្រុមមួយក្នុងទីក្រុងភ្នំពេញជាមួយសមភាគីរបស់លោកមកពីសមាជិកអាស៊ានកាលពីថ្ងៃព្រហស្បតិ៍ថា កូរ៉េខាងត្បូងនឹងពង្រឹងកិច្ចសន្ទនាជាយុទ្ធសាស្ត្រជាមួយអាស៊ានទៅលើបញ្ហាប្រឈមនានាក្នុងតំបន់។

លោក ផាក ជីន រដ្ឋមន្ត្រីការបរទេសទីមួយនៃរដ្ឋបាលលោក យូន ស៊ុកយុល នាព្រឹកថ្ងៃទី០៥ ខែសីហា ឆ្នាំ២០២២ បានសង្កត់ធ្ងន់ក្នុងអំឡុងពេលនៃកិច្ចប្រជុំថ្នាក់រដ្ឋមន្ត្រីអាស៊ាន-កូរ៉េខាងត្បូងថា «ភាពជាដៃគូរបស់យើង (ជាមួយអាស៊ាន) នឹងផ្តោតសំខាន់ទៅលើការពង្រឹងទំនាក់ទំនងយុទ្ធសាស្ត្រក្នុងវិស័យសេដ្ឋកិច្ច និងលើសពីនេះទៀត»។ សម័យប្រជុំប្រចាំឆ្នាំត្រូវបានប្រារព្ធឡើងជារៀងរាល់ឆ្នាំចាប់តាំងពីឆ្នាំ១៩៩៧ មក។

លោក ផាក កំពុងធ្វើសេចក្តីសង្ខេបជូនសមាជិកអាស៊ានអំពីគោលនយោបាយក្នុងតំបន់របស់រដ្ឋាភិបាល លោក យូន ដែលមានរយៈពេលតិចជាងបីខែ បន្ទាប់ពីវាបានជំនួសឱ្យគោកនយោបាយរបស់រដ្ឋបាលលោក មូន ចេអ៊ីន ដែលបានធ្វើយុទ្ធនាការសម្រាប់គោលនយោបាយភាគខាងត្បូងថ្មីក្នុងគោលបំណងពង្រឹងទំនាក់ទំនងជាយុទ្ធសាស្ត្ររបស់ទីក្រុងសេអ៊ូលជាមួយអាស៊ាន និងឥណ្ឌា។ ប្រទេសមីយ៉ាន់ម៉ាត្រូវបានគ្រប់គ្រងដោយរបបយោធា ហើយបានអវត្តមានពីព្រឹត្តិការណ៍នេះនៅក្នុងឆ្នាំនេះ។

រដ្ឋមន្ត្រីរូបនេះបានចង្អុលបង្ហាញពីផែនការដែលបានបញ្ជាក់របស់ទីក្រុងសេអ៊ូលក្នុងការដើរតួនាទីកាន់តែសកម្មក្នុងការលើកកម្ពស់សេរីភាព សន្តិភាព និងវិបុលភាពនៅទូទាំងពិភពលោក ក្នុងឋានៈជាប្រទេសស្នូលរបស់សកលលោក។

លោកបាននិយាយថា «នៅក្នុងន័យនេះ អាស៊ានដែលជាផ្នែកស្នូលនៃតំបន់ឥណ្ឌូប៉ាស៊ីហ្វិក នឹងក្លាយជាមជ្ឈមណ្ឌលនៃគំនិតផ្តួចផ្តើមថ្មីរបស់កូរ៉េខាងត្បូង»។

លោកបាននិយាយបន្ថែមថា សម្រាប់អាស៊ាន កូរ៉េខាងត្បូងគឺជាដៃគូដែលគួរឱ្យទុកចិត្ត និងអាចទុកចិត្តបាន។

លោក ផាក ក៏បានពន្យល់ផងដែរអំពីវិធីសាស្រ្តរបស់រដ្ឋបាលលោក យូន ចំពោះកូរ៉េខាងជើង និងបានស្នើសុំការគាំទ្រពីសមាជិកអាស៊ានសម្រាប់កិច្ចខិតខំប្រឹងប្រែងដើម្បីបន្ធូរបន្ថយភាពតានតឹងនៅឧបទ្វីបកូរ៉េ និងដោះស្រាយបញ្ហានុយក្លេអ៊ែរ៕