រដ្ឋមន្ត្រីការបរទេសអូស្ត្រាលី នឹងបំពេញទស្សនកិច្ចនៅប្រទេសជប៉ុន ចិន និងកូរ៉េខាងត្បូង ក្នុងសប្តាហ៍នេះ ដើម្បីពិភាក្សាអំពីសន្តិសុខថាមពល ចំពេលមានការរំខានដល់ចង្វាក់ផ្គត់ផ្គង់បង្កឡើងដោយជម្លោះនៅតំបន់មជ្ឈិមបូព៌ា

ស៊ីដនី៖ បើតាមការចេញផ្សាយដោយទីភ្នាក់ងារសារព័ត៌មាន Reuters រដ្ឋមន្ត្រីការបរទេសអូស្ត្រាលី លោកស្រី ភេននី វ៉ុង (Penny Wong) នាថ្ងៃអាទិត្យ បានប្រកាសថា លោកស្រីនឹងបំពេញទស្សនកិច្ចនៅប្រទេសជប៉ុន ចិន និងកូរ៉េខាងត្បូង ក្នុងសប្តាហ៍នេះ ដើម្បីពិភាក្សាអំពីសន្តិសុខថាមពល ចំពេលមានការរំខានដល់ចង្វាក់ផ្គត់ផ្គង់ដែលបង្កឡើងដោយជម្លោះនៅតំបន់មជ្ឈិមបូព៌ា។

នៅក្នុងទីក្រុងតូក្យូ លោកស្រី វ៉ុង នឹងជួបពិភាក្សាជាមួយរដ្ឋមន្ត្រីការបរទេសជប៉ុន លោក តូស៊ីមីតស៊ូ ម៉ូតេហ្គី (Toshimitsu Motegi) អំពីស្ថិរភាពឥន្ធនៈ និងស្ថានភាពជម្លោះនៅមជ្ឈិមបូព៌ា។ បន្ទាប់មក លោកស្រីនឹងបន្តដំណើរទៅកាន់ទីក្រុងប៉េកាំង ដើម្បីចូលរួមកិច្ចសន្ទនាយុទ្ធសាស្ត្រ និងការបរទេសអូស្ត្រាលី-ចិន លើកទី៨ ជាមួយរដ្ឋមន្ត្រីការបរទេសចិន លោក វ៉ាង យី (Wang Yi) ក្នុងគោលបំណងគ្រប់គ្រងភាពខុសគ្នា និងជំរុញផលប្រយោជន៍រួមនៃប្រទេសទាំងពីរ។

ដោយឡែក ក្នុងដំណើរទស្សនកិច្ចនៅទីក្រុងសេអ៊ូល លោកស្រីនឹងជួបជាមួយរដ្ឋមន្ត្រីការបរទេសកូរ៉េខាងត្បូង លោក ចូ ហ្យុន (Cho Hyun) ដោយលោកស្រីបានគូសបញ្ជាក់ថា កូរ៉េខាងត្បូងគឺជាប្រភពផ្គត់ផ្គង់ប្រេងចម្រាញ់ដ៏សំខាន់បំផុតមួយសម្រាប់អូស្ត្រាលី។

គួរបញ្ជាក់ថា ប្រទេសអូស្ត្រាលីដែលពឹងផ្អែកយ៉ាងខ្លាំងលើការនាំចូលប្រេងឥន្ធនៈពីបរទេស បានជួបប្រទះនូវបញ្ហាកង្វះខាតក្នុងស្រុកជាបន្តបន្ទាប់ ចាប់តាំងពីសង្គ្រាមនៅមជ្ឈិមបូព៌ាបានផ្ទុះឡើងកាលពីខែកុម្ភៈមក៕