ឯកឧត្ដម ហ៊ុន ម៉ានី អញ្ជើញគោរពវិញ្ញាណក្ខន្ធសព លោកវរសេនីយ៍ត្រី ឌុល ដេត វីរយុទ្ធជនឈរជើងនៅទិសប្រាសាទតាមាន់ ដែលទទួលមរណភាពដោយសាររបួសពីសមរភូមិ

កំពង់ស្ពឺ៖ ឯកឧត្ដម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ តំណាងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅថ្ងៃទី១៦ ខែមេសា ឆ្នាំ២០២៦ បានអញ្ជើញទៅគោរពវិញ្ញាណក្ខន្ធសព លោកវរសេនីយ៍ត្រី ឌុល ដេត វីរយុទ្ធជនឈរជើងនៅទិសប្រាសាទតាមាន់ ខេត្តឧត្តរមានជ័យ ដែលបានទទួលមរណភាពដោយសាររបួសពីសមរភូមិ។

សពលោកវរសេនីយ៍ត្រី ឌុល ដេត ត្រូវបានតម្កល់ធ្វើបុណ្យតាមប្រពៃណី នៅគេហដ្ឋាន នៃសព ស្ថិតក្នុងភូមិអន្លង់ថ្នឹង ឃុំមហាសាំង ស្រុកភ្នំស្រួច ខេត្តកំពង់ស្ពឺ។

ស្ថិតក្នុងបរិយាកាសដ៏សែនក្រៀមក្រំនេះ ឯកឧត្តម ហ៊ុន ម៉ានី សូមរំលែកនូវមរណទុក្ខជាមួយក្រុមគ្រួសារ សាច់ញាតិ និងយុទ្ធមិត្តរួមអាវុធរបស់ លោកវរសេនីយ៍ត្រី ឌុល ដេត។

ជាមួយគ្នានោះដែរ ឯកឧត្ដមសូមសម្តែងនូវការគោរព និងដឹងគុណដ៏ខ្ពង់ខ្ពស់ចំពោះពលិកម្មដ៏ធំធេងរបស់វីរយុទ្ធជន ដែលបានបូជាអាយុជីវិតក្នុងបុព្វហេតុការពារជាតិ និងទឹកដី៕