អភិបាលខេត្តឧត្ដរមានជ័យ៖ ស្មារតី «សមរភូមិក្រោយ គាំទ្រសមរភូមិមុខ» គឺជាកម្លាំងចលករយ៉ាងសំខាន់ ក្នុងការជួយជំរុញឱ្យវីរកងទ័ពកាន់តែមានសេចក្តីក្លាហាន និងភាពកក់ក្តៅក្នុងការបំពេញភារកិច្ចការពារជាតិមាតុភូមិ

ឧត្ដរមានជ័យ៖ ឯកឧត្តម មាន ចាន់យ៉ាដា អភិបាលខេត្តឧត្ដរមានជ័យ ដឹកនាំក្រុមការងារ ទទួលស្វាគមន៍ចំពោះ វត្តមាន ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ក្នុងឱកាសអញ្ជើញសំណេះសំណាល និងសួរសុខទុក្ខវីរកងទ័ពនៃកងការពារព្រំដែន គោកលេខ៤០២ លេខ៤០៣ និងបញ្ជាការដ្ឋានកាំភ្លើងធំ អគ្គបញ្ជាការដ្ឋាន ដើម្បីពង្រឹងស្មារតី និងចំណងសម្ព័ន្ធមេត្រីភាពឱ្យកាន់តែស្អិតរមួត នៅបរិវេណសាលាខេត្ត នៅរសៀលថ្ងៃទី០៧ខែមេសាឆ្នាំ២០២៦នេះ។

ឯកឧត្តម មាន ចាន់យ៉ាដា បានលើកឡើងថា ស្មារតី «សមរភូមិក្រោយ គាំទ្រសមរភូមិមុខ» គឺជាកម្លាំងចលករយ៉ាងសំខាន់ ក្នុងការជួយជំរុញឱ្យវីរកងទ័ពកាន់តែមានសេចក្តីក្លាហាន និងភាពកក់ក្តៅក្នុងការបំពេញភារកិច្ចការពារជាតិមាតុភូមិ។

ឯកឧត្ដមបានបញ្ជាក់ថា សកម្មភាពនេះមិនត្រឹមតែជួយសម្រួលដល់ជីវភាពខ្វះខាតរបស់កងទ័ពប៉ុណ្ណោះទេ ប៉ុន្តែថែមទាំងបានពង្រឹងនូវចំណងសម្ព័ន្ធមេត្រីភាពរវាងរដ្ឋបាលខេត្ត ក្រសួងស្ថាប័នស៊ីវិល និងអង្គភាពកងទ័ព ឱ្យកាន់តែរឹងមាំដូចដែកថែប ដើម្បីបុព្វហេតុការពារបូរណភាពទឹកដីឱ្យបានគង់វង្សជារៀងរហូតតទៅ៕