សម្ដេច ស ខេង៖ មជ្ឈដ្ឋានជាតិ អន្តរជាតិ វាយតម្លៃថាជាការបោះឆ្នោតឃុំសង្កាត់ មានលក្ខណៈសេរីត្រឹមត្រូវយុត្តិធម៌ ចំណែកអ្នកបោះឆ្នោតក៏កាន់តែមានការយល់ដឹងពីដំណើរការបោះឆ្នោត

ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈបញ្ជាការ សន្តិសុខអចិន្ត្រៃយ៍សម្រាប់ការបោះឆ្នោត បានលើកឡើងថា មជ្ឈដ្ឋានជាតិ និងអន្តរជាតិ បានវាយតម្លៃជាទូទៅថាជាការបោះឆ្នោតជ្រើសរើសក្រុមប្រឹក្សាឃុំសង្កាត់ប្រព្រឹត្តទៅប្រកបដោយលក្ខណៈសេរី ត្រឹមត្រូវ យុត្តិធម៌ ស្របតាមគោលការណ៍នៃប្រជាធិបតេយ្យ ចំណែកអ្នកបោះឆ្នោតវិញ ក៏កាន់តែមានការយល់ដឹងអំពីដំណើរការបោះឆ្នោត។

ក្នុងឱកាសអញ្ជើញបិទសន្និបាត បូកសរុបការងារបោះឆ្នោត ជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ របស់ គ.ជ.ប រៀបចំចាប់ពីថ្ងៃទី៦-៧ ខែកក្កដា ឆ្នាំ២០២២នេះ នៅខេត្តព្រះសីហនុ សម្តេចក្រឡាហោម ស ខេង បានសម្តែងនូវការកោតសរសើរដោយស្មោះ និងវាយតម្លៃខ្ពស់ចំពោះថ្នាក់ដឹកនាំ និងមន្ត្រីគណៈកម្មការជាតិរៀបចំការបោះឆ្នោតគ្រប់លំដាប់ថ្នាក់ អាជ្ញាធរកងកម្លាំងមានសមត្ថ គណបក្សនយោបាយនានា អ្នកសង្កេតការណ៍ជាតិ អន្តរជាតិ អ្នកពាក់ព័ន្ធនានា ព្រមទាំងប្រជាពលរដ្ឋដែលបានចូលរួមធ្វើឲ្យការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥នេះទទួលបាននូវលទ្ធផលដ៏ល្អប្រសើរ។

សម្ដេចបន្តថាគ្រប់ដំណាក់កាលនៃការបោះឆ្នោត កម្ពុជាតែងតែបានយកចិត្តទុកដាក់កែលម្អដំណើរការបោះឆ្នោតទាំងក្របខណ្ឌច្បាប់ និងបច្ចេកទេស ដោយឈរលើមូលដ្ឋាននៃអនុសាសន៍ និងធាតុចូលពីគ្រប់មជ្ឈដ្ឋាន ព្រមទាំងការតាំងចិត្តចូលរួមដោះស្រាយបញ្ហាប្រឈមនានាប្រកបដោយភាពស្មោះត្រង់ពីគ្រប់ភាគីពាក់ព័ន្ធ ក្នុងនោះ គ.ជ.ប វិញ ក៏បានកែសម្រួលរចនាសម្ព័ន្ធ អគ្គលេខាធិការដ្ឋានរបស់ខ្លួនដើម្បីធ្វើឲ្យអង្គភាពនេះ បំពេញភារៈកិច្ចកាន់តែមានប្រសិទ្ធភាពខ្ពស់ និងបានធ្វើទំនើបកម្មដំណើរការរៀបចំការបោះឆ្នោតបន្ថែមទៀត ដោយយកចិត្តទុកដាក់លើការបង្កើតកម្មវិធីគ្រប់គ្រងការចុះបញ្ជីបេក្ខជន ព្រមទាំងការងារមួយចំនួនទៀតពាក់ព័ន្ធនឹងបច្ចេកវិទ្យា។

សម្ដេចក្រឡាហោម ស ខេង បានបន្តថារាជរដ្ឋាភិបាលកម្ពុជាមានការទទួលខុសត្រូវខ្ពស់ក្នុងការលើកកម្ពស់ដំណើរការប្រជាធិបតេយ្យសេរីពហុបក្ស និងការបោះឆ្នោតដោយសេរី ត្រឹមត្រូវ យុត្តិធម៌នៅកម្ពុជា ក្នុងនោះសម្ដេចបានកត់សម្គាល់ពីការទទួលខុសត្រូវចម្បងៗដូចជា ការធានារក្សាពង្រឹងសន្តិភាព ស្ថិរភាពនយោបាយនិងការអភិវឌ្ឍសង្គមលើគ្រប់វិស័យ, ការធានាឯករាជភាពនិងស្វ័យភាពរបស់ស្ថាប័នរៀបចំការបោះឆ្នោត និងអំពីការការកំណត់កាលបរិច្ឆេទបោះឆ្នោត។

នាឱកាសនោះដែរ សម្ដេចក៏បានមានប្រសាសន៍ទៅកាន់អង្គសន្និបាតអំពីកិច្ចសហការរវាងរាជរដ្ឋាភិបាល ជាមួយ គ.ជ.ប, កិច្ចសហការដើម្បីរក្សាសន្តិសុខបោះឆ្នោតរួមទាំងសន្តិសុខសុវត្ថិភាពដល់គណបក្សនយោបាយនិងបេក្ខជននានាដែលចូលរួមប្រកួតប្រជែងការបោះឆ្នោត សកម្មភាពយុទ្ធនាការឃោសនាបោះឆ្នោត សមត្ថភាពកន្លែងបោះឆ្នោត កន្លែងរាប់សន្លឹកឆ្នោត និងសម្ភារៈបរិក្ខារបម្រើឲ្យការបោះឆ្នោតនិងការរាប់សន្លឹកឆ្នោត, ការធានាដល់ធនធានថវិកាសសម្រាប់គ.ជ.ប ចាត់ចែងកិច្ចការនានាក្នុងដំណើរការបោះឆ្នោតប្រកបដោយស្តង់ដារ និងគុណភាព និងណើរការបោះឆ្នោតក្នុងស្ថានភាពកូវីដ-១៩ ៕