ភ្នំពេញ៖ នៅទីបញ្ជាការវរសេនាតូចថ្មើរជើងលេខ២១៣ កងពលតូចថ្មើរជើងលេខ២១ បានប្រារព្ធពិធីបិទវគ្គហ្វឹកហ្វឺនបំប៉នពង្រឹងវរសេនាតូច ស្ថិតក្រោមអធិបតីភាពលោក ឧត្តមសេនីយ៍ត្រី សេង សុផាត មេបញ្ជាការរងកងពលតូចថ្មើរជើងលេខ២១ នាព្រឹកថ្ងៃទី៧ ខែកក្កដា ឆ្នាំ២០២២ ។
របាយការណ៍ហ្វឹកហ្វឺនបញ្ជាក់ឱ្យដឹងថាលទ្ធផលដែលសម្រេចបានមាន សិក្ខាកាមចំនួន១០០នាក់ គ្រូ១០នាក់។ក្រោយបញ្ចប់វគ្គសិក្ខាកាមទទួលបាននិទ្ទេសដូចខាងក្រោម៖ និទ្ទេសល្អ ចំនួន០៨នាក់ ស្មើ០៨% ,និទ្ទេសគ្រាន់បើ ចំនួន៤២នាក់ ស្មើ៤២% និងប្រភេទសំណូមពរ ចំនួន៥០នាក់ ស្មើ៥០% ។
ក្នុងនាមឧត្តមសេនីយ៍ទោ អ៊ិន ស៊ីដារ៉ា មេបញ្ជាការកងពលតូចថ្មើរជើងលេខ២១ យោធភូមិភាគទី២ ឧត្តមសេនីយ៍ត្រី សេង សុផាត មេបញ្ជាការរងកងតូចថ្មើរជើងលេខ២១ បានប្រគល់ប័ណ្ណសរសើរ និងលិខិតសរសើរដល់សិក្ខាកាមបានវគ្គជាបន្តបន្ទាប់ ។ ឧត្តមសេនីយ៍ត្រី សេង សុផាត បានសម្តែងនូវការកោត សរសើរ និងវាយតម្លៃខ្ពស់ ចំពោះការយកចិត្តទុកដាក់ខិតខំប្រឹងប្រែង ហ្វឹកហាត់ រៀនសូត្រ របស់សិក្ខាកាមទាំងអស់រហូតបានដល់បញ្ចប់វគ្គ ។
ឧត្តមសេនីយ៍ត្រី សេង សុផាត បានគូសបញ្ជាក់ថាការហ្វឹកហ្វឺនក្ន្លងមកនេះគឺជាការឆ្លើយតបដ៏សមស្របទាន់ពេលវេលាទៅនឹងគោល នយោបាយ របស់រាជរដ្ឋាភិបាល ក្នុងការកសាងធនធានមនុស្ស ប្រកបដោយសមត្ថភាព គុណភាពខ្ពស់ ដើម្បីបំពេញភារកិច្ច បម្រើជាតិ មាតុភូមិរបស់យើង ជាពិសេស ការពារបាននូវច្បាប់រដ្ឋធម្មនុញ្ញ ការពារព្រះមហាក្សត្រ និងការពាររាជរដ្ឋាភិបាលស្របច្បាប់អោយបានដាច់ខាត ។
ឧត្តមសេនីយ៍ត្រី សេង សុផាត បានផ្តាំផ្ញើរដល់សិក្ខាកាមពេលវិលទៅអង្គភាពវិញត្រូវបន្តផ្សព្វផ្សាយដល់មិត្តរួមអាជីព និងប្រើប្រាស់ជូនអង្គភាពឲ្យចំគោលដៅ និងមានប្រសិទ្ធភាព៕
