ឯកឧត្ដម គង់ សោភ័ណ្ឌ អញ្ជើញប្រកាសសុពលភាព សមាជិកក្រុមប្រឹក្សាឃុំ អាណត្តិទី៥ នៃរដ្ឋបាលឃុំភ្នំបាត ស្រុកពញាឮ

ភ្នំពេញ៖ ឯកឧត្ដម គង់ សោភ័ណ្ឌ អភិបាលខេត្តកណ្ដាល នាព្រឹកថ្ងៃទី៧ ខែកក្កដា ឆ្នាំ២០២២ អញ្ជើញប្រកាសសុពលភាព សមាជិកក្រុមប្រឹក្សាឃុំ អាណត្តិទី៥ នៃរដ្ឋបាលឃុំភ្នំបាត ស្រុកពញាឮ ខេត្តកណ្តាល ។

ក្នុងឱកាសនោះឯកឧត្ដម គង់ សោភ័ណ្ឌ ក៏បានពាំនាំនូវការអបអរសាទរ ការផ្តាំផ្ញើសេចក្តីនឹករលឹកអំពី សម្តេចតេជោ ហ៊ុន សែន នាយករដ្ឋមន្រ្តីកម្ពុជា សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកពញាឮ និងថ្នាក់ដឹកនាំគ្រប់លំដាប់ថ្នាក់ ក្នុងឱកាសនៃកិច្ចប្រជុំដំបូង និងពិធីប្រកាសសុពលភាពសមាជិកក្រុមប្រឹក្សាឃុំភ្នំបាត អាណត្តិទី៥ ឆ្នាំ២០២២ ដែលត្រូវបានទទួលស្គាល់ដោយប្រកាសលេខ ៣០១០ ប្រក ចុះថ្ងៃទី២៧ ខែមិថុនា ឆ្នាំ២០២២ របស់ក្រសួងមហាផ្ទៃ។

ជាមួយគ្នានេះ ឯកឧត្ដម គង់ សោភ័ណ្ឌ ក៏បានសំដែងនូវការកោតសរសើរ ចំពោះការខិតខំអស់ពីកម្លាំងកាយចិត្តរបស់លោក លោកស្រី ជាសមាជិកក្រុមប្រឹក្សាឃុំទាំងអស់ ដែលបានខិតខំអនុវត្តតួនាទី មុខងាររបស់ខ្លួន សម្រេចបាននូវសមិទ្ធិផលជាច្រើន សម្រាប់ជាផលប្រយោជន៍របស់ប្រជាពលរដ្ឋនៅមូលដ្ឋាន សម្រាប់អាណត្តិការងារ ក្នុងអាណត្តិទី៤កន្លងមក ហើយសមិទ្ធផលទាំងនេះ នឹងបន្តជាមូលដ្ឋានសម្រាប់ក្រុមប្រឹក្សាឃុំ អាណត្តិទី៥ បន្តពង្រីក និងពង្រឹងថែមទៀត ដើម្បីកិច្ចអភិវឌ្ឍន៍ភូមិ ឃុំ របស់ខ្លួនប្រកបដោយចីរភាព សមធម៌ និងបរិយាប័ន្ន។

ទន្ទឹមនេះ ដើម្បីជាការឆ្លើយតបទៅនឹងការគាំទ្ររបស់ប្រជាពលរដ្ឋដែលបានសម្តែងនូវឆន្ទៈតាមរយៈការបោះឆ្នោតជ្រើសរើសក្រុមប្រឹក្សាឃុំ កាលពីថ្ងៃទី៥ ខែមិថុនា ឆ្នាំ២០២២ ដែលស្របតាមគោលការណ៍លិទ្ធិប្រជាធិបតេយ្យ សេរី ពហុបក្ស និងយុត្តិធម៌ ឯកឧត្ដម គង់ សោភ័ណ្ឌ ក៏បានអំពាវនាវឲ្យសមាជិកក្រុមប្រឹក្សាឃុំទាំងអស់ ខិតខំផ្តល់សេវាសាធារណៈ ការអភិវឌ្ឍមូលដ្ឋាន ជូនប្រជាពលរដ្ឋក្នុងមូលដ្ឋានរបស់ខ្លួនឱ្យបានល្អប្រសើរ ប្រកបដោយក្រមសីលធម៌ វិជ្ជាជីវៈ និងកែលម្អឥរិយាបថក្នុងការប្រាស្រ័យទាក់ទងជាមួយប្រជាពលរដ្ឋ ដោយចាត់ទុកខ្លួនយើងជាអ្នកបម្រើប្រជាពលរដ្ឋដ៏ស្មោះត្រង់ មានតម្លាភាព គណនេយ្យភាព និងយុត្តិធម៌ ដោយមិនត្រូវមានការរើសអើង ការបែងចែកបក្សពួក គ្រួសារ និយម និងនិន្នាការនយោបាយ អនុវត្ដឱ្យស្របតាមច្បាប់ និងលិខិតបទដ្ឋានគតិយុត្តជាធរមាន និងត្រូវអនុវត្តឱ្យបានម៉ឺងម៉ាត់ និងបំផុសប្រជាពលរដ្ឋក្នុងមូលដ្ឋានឃុំឱ្យចូលរួមអនុវត្តគោលនយោបាយ “ភូមិ ឃុំ សង្កាត់មានសុវត្ថិភាព” របស់រាជរដ្ឋាភិបាលកម្ពុជា ៕