ក្រុមមន្ត្រី៖ រយៈពេល ៦ថ្ងៃដំបូងនៃសង្រ្គាមប្រឆាំងអ៉ីរ៉ង់ អាមេរិកបានចំណាយលុយអស់យ៉ាងហោច ១១.៣ពាន់លានដុល្លារ

វ៉ាស៊ីនតោន៖ បើតាមការចេញផ្សាយដោយទីភ្នាក់ងារសារព័ត៌មាន Reuters ក្រុមមន្ត្រីមកពីរដ្ឋបាលលោកប្រធានាធិបតីអាមេរិក ដូណាល់ ត្រាំ បានវាយតម្លៃអំឡុងការជូនដំណឹងត្រួសៗទៅកាន់សភាអាមេរិកក្នុងសប្ដាហ៍នេះថារយៈពេល ៦ថ្ងៃដំបូងនៃសង្រ្គាមប្រឆាំងអ៉ីរ៉ង់ សហរដ្ឋអាមេរិកបានចំណាយលុយអស់យ៉ាងហោច ១១.៣ពាន់លានដុល្លារ។

តួលេខខាងលើដែលត្រូវបានបង្ហើបឱ្យដឹងអំឡុងជំនួបបិទទ្វារមួយរបស់ក្រុមសមាជិកព្រឹទ្ធសភាអាមេរិកកាលពីថ្ងៃអង្គារសប្ដាហ៍នេះ មិនបានរាប់បញ្ចូលការចំណាយទាំងស្រុង លើសង្រ្គាមនោះទេ ប៉ុន្តែត្រូវបានផ្ដល់ឱ្យនូវការវាយតម្លៃពីការចំណាយមួយផ្នែក ដោយសារតែមានការទាមទារពីអ្នកតំណាងរាស្ត្រអាមេរិក។

បន្ថែមពីលើនេះ ក្រុមមន្ត្រីនៃសភាអាមេរិកជាច្រើននាក់បាននិយាយថាពួកគេរំពឹងថាសេតវិមាននឹងដាក់សំណើទៅកាន់សភាអាមេរិកឆាប់ៗដើម្បីស្នើសុំកញ្ចប់ថវិកាបន្ថែមសម្រាប់ធ្វើសង្រ្គាម ដោយក្នុងនោះ មន្ត្រីខ្លះអះអាងថាសេតវិមានអាចនឹងស្នើសុំកញ្ចប់ថវិកា ៥០ពាន់លានដុល្លារ ខណៈខ្លះទៀតថាអាចនឹងតិចជាងនេះ៕