មន្រ្តីរាជការនៃក្រសួង ស្ថាប័នចំនួន១២ បានទទួលការបណ្តុះបណ្តាល និងការចែករំលែកបទពិសោធការធ្វើជំរឿនមន្រ្តី ពីគណៈកម្មការធ្វើជំរឿនមន្រ្តីនៃក្រសួងមុខងារសាធារណៈ

ភ្នំពេញ៖ ក្នុងការអនុវត្ត និងជំរុញកិច្ចការធ្វើជំរឿនមន្រ្តីថ្នាក់ជាតិឱ្យបានកាន់តែឆាប់រហ័ស និងមានប្រសិទ្ធភាព គណៈកម្មការធ្វើជំរឿនមន្រ្តីនៃក្រសួងមុខងារសាធារណៈ បានបន្តរៀបចំសិក្ខាសាលាផ្សព្វផ្សាយស្តីពី «ការប្រើប្រាស់ប្រព័ន្ធធ្វើបច្ចុប្បន្នភាពរចនាសម្ព័ន្ធ និងជំរឿនមន្រ្តីជាក់ស្តែង នៅតាមរចនាសម្ព័ន្ធរបស់ក្រសួង ស្ថាប័នចំណុះអង្គការនីតិប្រតិបត្តិ» ជូនក្រសួង ស្ថាប័នម្តងមួយៗដាច់ដោយឡែកជាបន្តបន្ទាប់។

ជាមួយគ្នានេះដែរ នាព្រឹកថ្ងៃទី៣ ខែមីនា ឆ្នាំ២០២៦ គណៈកម្មការធ្វើជំរឿនមន្រ្តីនៃក្រសួងមុខងារសាធារណៈ បានសហការជាមួយក្រសួងរ៉ែ និងថាមពល រៀបចំសិក្ខាសាលាផ្សព្វផ្សាយស្តីពី «ការប្រើប្រាស់ប្រព័ន្ធធ្វើបច្ចុប្បន្នភាពរចនាសម្ព័ន្ធ និងជំរឿនមន្រ្តីជាក់ស្តែង នៅតាមរចនាសម្ព័ន្ធរបស់ក្រសួងរ៉ែ និងថាមពល» ជូនដល់ថ្នាក់ដឹកនាំ និងមន្រ្តីបច្ចេកទេសនៃក្រសួងរ៉ែ និងថាមពល។

ដូចសព្វមួយដង របៀបវារៈនៃសិក្ខាសាលាតែងមានរៀបចំកម្មវិធីបណ្តុះបណ្តាលជូនដល់ថ្នាក់ដឹកនាំ និងមន្រ្តីបច្ចេកទេសទាំងអស់(មន្រ្តីរាជការនៃក្រសួងរ៉ែ និងថាមពល) ពីដំណើរការប្រតិបត្តិការ និងការប្រើប្រាស់ប្រព័ន្ធធ្វើជំរឿនមន្រ្តី តាមរយៈបទបង្ហាញរបស់វាគ្មិនក្រុមការងារបច្ចេកទេសនៃគណៈកម្មការធ្វើជំរឿន រួមទាំងការអនុវត្តសាកល្បងដោយផ្ទាល់ទៅលើការប្រើប្រាស់ប្រព័ន្ធគ្រប់គ្រងជំរឿនមន្រ្តីនៅថ្នាក់ជាតិ និងការប្រើប្រាស់ប្រព័ន្ធធ្វើបច្ចុប្បន្នភាពរចនាសម្ព័ន្ធ និងជំរឿនមន្រ្តីជាក់ស្តែងនៅតាមរចនាសម្ព័ន្ធរបស់ក្រសួង ស្ថាប័នចំណុះអង្គការនីតិប្រតិបត្តិ ដើម្បីធានាដល់ដំណើរការនៃការធ្វើជំរឿនមន្ត្រីជាក់ស្តែងប្រកបដោយភាពរលូន ឆាប់រហ័ស ទទួលទិន្នន័យច្បាស់លាស់ និងមានប្រសិទ្ធភាព។

សិក្ខាសាលានេះបានប្រព្រឹត្តទៅមានរយៈពេល១ថ្ងៃពេញ នៅថ្ងៃទី៣ ខែមីនា ឆ្នាំ២០២៦ នៅទីស្តីការក្រសួងរ៉ែ និងថាមពល ក្រោមសហអធិបតីភាព លោកជំទាវ ឈី វិជ្ជរ៉ា រដ្ឋលេខាធិការក្រសួងមុខងារសាធារណៈ និង ឯកឧត្តម ស៊ុយ ឌីម៉ង់ រដ្ឋលេខាធិការក្រសួងរ៉ែ និងថាមពល។

សូមជម្រាបផងដែរថា គិតមកដល់ពេលនេះគណៈកម្មការធ្វើជំរឿនមន្រ្តីនៃក្រសួងមុខងារសាធារណៈ បានរៀបចំសិក្ខាសាលាផ្សព្វផ្សាយស្តីពី «ការប្រើប្រាស់ប្រព័ន្ធធ្វើបច្ចុប្បន្នភាពរចនាសម្ព័ន្ធ និងជំរឿនមន្រ្តីជាក់ស្តែង នៅតាមរចនាសម្ព័ន្ធរបស់ក្រសួង ស្ថាប័នចំណុះអង្គការនីតិប្រតិបត្តិ» ជាបន្តបន្ទាប់សរុបបានចំនួន ១២ក្រសួង ស្ថាប័នរួចមកហើយ ហើយកំពុងបន្តរៀបចំជាបន្តបន្ទាប់ទៀត ក្នុងន័យពន្លឿនល្បឿននៃការធ្វើបច្ចុប្បន្នភាពរចនាសម្ព័ន្ធ និងជំរឿនមន្រ្តីជាក់ស្តែង នៅតាមរចនាសម្ព័ន្ធក្រសួង ស្ថាប័ន ឱ្យបានចប់រួចរាល់ទៅតាមផែនការដែលបានគ្រោងទុក៕