សម្តេចធិបតី៖ គម្រោងព្រែកជីកហ្វូណនតេជោ កំពុងដំណើរការតាមការគ្រោងទុក ដែលអនុញ្ញាតឱ្យទំនិញកម្ពុជា មានច្រកទៅកាន់ផ្លូវសមុទ្រដោយផ្ទាល់ និងកាត់បន្ថយការពឹងផ្អែកលើការឆ្លងកាត់ប្រទេសទី៣

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាក់ថា គម្រោងព្រែកជីកហ្វូណនតេជោ កំពុងដំណើរការ តាមការគ្រោងទុក ដែលការណ៍នេះ អនុញ្ញាតឱ្យទំនិញរបស់កម្ពុជា មានច្រកទៅកាន់ផ្លូវសមុទ្រដោយផ្ទាល់ និងកាត់បន្ថយការពឹងផ្អែក លើការឆ្លងកាត់ប្រទេសទី៣។

សម្ដេចបានលើកឡើងបែបនេះ ក្នុងឱកាសអញ្ជើញជាអធិបតីបើកកិច្ចប្រជុំកំពូលធុរកិច្ច អាស៊ាន កម្ពុជាឆ្នាំ២០២៦ ប្រធានបទ «បរិវត្តកម្មអាស៊ាន៖ នវានុវត្តន៍ សមាហរណកម្ម និងការវិវត្តន៍ឧស្សាហកម្ម»នៅព្រឹកថ្ងៃទី៤ ខែមីនា ឆ្នាំ២០២៦។

ពិធីបើកកិច្ចប្រជុំកំពូលនេះមានការអញ្ជើញចូលរួមពីសំណាក់បណ្ឌិត កៅ គឹមហួន អគ្គលេខាធិការអាស៊ាន, លោក ចូអ៊ី ខនសិបសិន ប្រធានក្រុមប្រឹក្សាពិគ្រោះ យោបល់ធុរកិច្ចអាស៊ានឆ្នាំ២០២៦ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា និងបណ្តាក្រុមហ៊ុនជាតិ និងអន្តរជាតិ សរុប ៣០៦ ក្រុមហ៊ុន និងធុរជនជាតិ និងអន្តរជាតិជិត ៧០០នាក់។ វេទិកានេះនឹងផ្តល់នូវឱកាសសម្រាប់ការផ្គូរផ្គងអាជីវកម្មយ៉ាងទូលំទូលាយ លើកកម្ពស់ការយល់ដឹងគ្នាទៅវិញទៅមកកាន់តែស៊ីជម្រៅ និងពង្រឹងភាពជាដៃគូសហការក្នុងតំបន់។

សម្ដេចធិបតី បានថ្លែងអំណរគុណចំពោះសភាពាណិជ្ជកម្មកម្ពុជា និងសភាពាណិជ្ជកម្មអន្តរជាតិ និងសមាគមពាណិជ្ជកម្មទាំងអស់ សម្រាប់ការរៀបចំព្រឹត្តិការណ៍តំបន់ដ៏សំខាន់នេះ។

សម្តេចធិបតី បានគូសបញ្ជាក់ថា កម្ពុជា បាននិងកំពុងជំរុញយ៉ាងសកម្ម នូវការអភិវឌ្ឍសមត្ថភាព Logistics របស់ខ្លួន ដើម្បីបំពេញបន្ថែមដល់កិច្ចព្រមព្រៀងពាណិជ្ជកម្មអន្តរជាតិ។

សម្ដេចនាយករដ្ឋមន្ត្រីបន្ថែមថា ការដាក់ឱ្យដំណើការ អាកាសយានដ្ឋានអន្តរជាតិតេជោ ដែលជាអាកាសយានដ្ឋានលំដាប់4F បង្ហាញពីមហិច្ចតារបស់កម្ពុជា ក្នុងការប្រែក្លាយជាមជ្ឈមណ្ឌលឈានមុខ ក្នុងពិភពលោក សម្រាប់វិស័យLogistics និងទេសចរណ៍៕