សាខាមូលនិធិជាតិជំនួយសង្គមខេត្តបន្ទាយមានជ័យ បើកវគ្គបណ្តុះបណ្តាលស្តីពី ការអនុវត្តកម្មវិធីអន្តរាគមន៍សម្រាប់ស្ការជីវភាព និងស្តារលំនៅឋានខូចខាត ជូនគ្រួសារភៀសសឹក

បន្ទាយមានជ័យ៖ សាខាមូលនិធិជាតិជំនួយសង្គមខេត្តបន្ទាយមានជ័យ បានបើកវគ្គបណ្តុះបណ្តាលស្តីពី ការអនុវត្តកម្មវិធីអន្តរាគមន៍សម្រាប់ស្ការជីវភាព និងស្តារលំនៅឋានខូចខាត ជូនគ្រួសារភៀសសឹកដែលបានវិលត្រលប់ទៅលំនៅឋានវិញ និងការអនុវត្តកម្មវិធីគាំពារសង្គមសម្រាប់ទ្រទ្រង់ជីវភាពគ្រួសារភៀសសឹកដែលមិនទាន់អាចវិលត្រលប់ទៅលំនៅឋានវិញ ក្រោមអធិបតីភាព លោក លី សុវណ្ណារិទ្ធ អភិបាលរងខេត្ត តំណាងឯកឧត្តម អ៊ុំ រាត្រី អភិបាល នៃគណៈអភិបាលខេត្ត។

ពិធីនេះប្រារព្ធធ្វើនៅសាលប្រជុំមន្ទីរសង្គមកិច្ច អតីត យុទ្ធជន និងយុវនីតិសម្បទាខេត្ត នៅថ្ងៃសុក្រ ទី២៧ ខែកុម្ភៈ ឆ្នាំ២០២៦ ព្រមទាំងមានអញ្ជើញចូលរួម លោក លោកស្រី ប្រធានសាខាមូលនិធិជាតិជំនួយសង្គម តំណាងមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត តំណាងអង្គការដៃគូ តំណាងអភិបាលក្រុង ស្រុក ប្រធានការិយាល័យសង្គមកិច្ច និងសុខុមាលភាពសង្គម ក្រុង ស្រុកគោលដៅ មេឃុំ ចៅសង្កាត់ និងប្រធានមណ្ឌលភៀសសឹក។

លោក ដុំ ចាន់ធុល លើកឡើងថាវគ្គបណ្តុះ បណ្តាលនេះ រៀបចំឡើងក្នុងគោលបំណងដើម្បីពង្រឹងសមត្ថភាព បញ្ជាបការយល់ដឹងជូនដល់ រដ្ឋបាលក្រុង ស្រុក ឃុំ សង្កាត់ ដែល ជាតួអង្គប្រតិបត្តិករក្នុងការអនុវត្តតាមដានការផ្សព្វផ្សាយ ការបើក ផ្តល់ដល់គ្រួសារគោលដៅដែលត្រូវទទួលផលពីកម្មវិធីជំនួយសង្គមពិសេសរបស់រាជរដ្ឋាភិបាលសម្រាប់ ជនភៀសសឹក អោយបានយល់ច្បាស់ពីនីតិវិធី អត្ថប្រយោជន៍ និងទទួលផលអោយបានគ្រប់ៗគ្នា។ ដើម្បីធានាបាននូវប្រសិទ្ធិភាពនៃការបើកផ្តល់របស់គ្រួសារទទួលផល និងអាចទប់ស្កាត់ភាពមិនប្រក្រតី ឬបញ្ហាប្រឈមនានាក្នុងពេលបើកផ្តល់ មូលនិធិជាតិជំនួយសង្គម បានត្រៀមរួចរាល់នូវសកម្មភាពចំបងៗ សម្រាប់អនុវត្តកម្មវិធី ទី១ បានរៀបចំសេចក្តីព្រៀងនៃការអនុវត្តកម្មវីធី ទី២ បានរៀបចំបដា និងខិត្តបណ្ណផ្សព្វផ្សាយនានា និងទី៣គឺយន្តការ និងប្រព័ន្ធនៃការបើកផ្តល់ជូនគ្រួសារទទួលផល។ បន្ទាប់ពីបញ្ចប់វគ្គបណ្តុះបណ្តាលក្រុម ការងារសាខាមូលនិធិជាតិជំនួយសង្គមខេត្ត នឹងរៀបចំផែនការ ចុះត្រួតពិនិត្យ តាមដានការបើកផ្តល់នៅតាមមូលដ្ឋាន ដើម្បីសម្របសម្រួលជាមួយឃុំ សង្កាត់ និងអ្នកទទួលផលក្នុងការបើកសាច់ប្រាក់។

លោក លី សុវណ្ណារិទ្ធ មានប្រសាសន៍ថា ជម្លោះប្រដាប់អាវុធនៅតាមព្រំដែន ដែលបង្កឡើងដោយការឈ្លានពានពីប្រទេសថៃ មកលើ ព្រះរាជាណាចក្រកម្ពុជា បានបង្កភាពអសន្តិសុខយ៉ាងខ្លាំង ពិសេស នៅតំបន់ដែលស្ថិតនៅជាប់ព្រំដែនកម្ពុជា-ថៃ ដោយមានការជម្លៀសជនភៀសសឹកទៅរកទីតាំងសុវត្ថិភាព ដើម្បីស្នាក់នៅបណ្តោះអាសន្ន។ មនុស្សវ័យចាស់ ជនមាន ពិការភាព ទារក និងកុមារតូចៗ គឺពិតជាមានការលំបាកណាស់ ដោយសារការរស់នៅបែបប្រមូលផ្តុំច្រើនគ្រួសារផង ការបរិភោគអាហារមិនសូវមានជីវជាតិគ្រប់គ្រាន់ផង ការសិក្សាក៏មិនបានពេញលេញ ព្រមជាមួយគ្នានោះ មិនមានទីតាំង សមស្រប ធ្វើឱ្យការផ្តល់សេវាសុខភាពមិនបានគ្រប់ជ្រុងជ្រោយ ពិសេស សម្រាប់ស្ត្រីមានផ្ទៃពោះ ឬស្ត្រីសម្រាលកូន។ បើទោះបីជា មានបទឈប់បាញ់នៅថ្ងៃទី២៧ ខែធ្នូ ឆ្នាំ២០២៥ក៏ដោយ ក៏ភូមិសាស្ត្រមួយចំនួននៅតែប្រឈម ដោយសារ កាកសំណល់គ្រាប់មិនទាន់ផ្ទុះ ផ្ទះសម្បែងខូចខាត និងភូមិសាស្ត្រមួយចំនួន ត្រូវបានថែហ៊ុំព័ទ្ធ ដែលធ្វើឱ្យគ្រួសារទាំងនោះ ត្រូវបន្តរស់នៅតាមមណ្ឌលភៀសសឹក ឬផ្ទះសាច់ញាតិ ឬទីតាំងសុវត្ថិភាពនានា ហើយបើទោះបីជា មានការគិតគូរពី សំណាក់រាជរដ្ឋាភិបាល អាជ្ញាធរ សប្បុរសជន តាមរយៈការឧបត្ថម្ភជាថវិកាក្តី ស្បៀង សម្ភារ គ្រឿងបរិក្ខា គ្រឿងឧបភោគ បិរភោគច្រើនសន្ធឹកសន្ធាប់យ៉ាងណាក្តី ជាក្ដីបារម្មណ៍របស់រាជរដ្ឋាភិបាល គឺប្រជាពលរដ្ឋនឹងប្រឈមទៅនឹងការធ្លាក់ចុះ នូវកម្រិតស្ថានភាពជីវភាព ដោយសារ ការបោះបង់ចោលដំណាំកសិកម្ម សត្វពាហនៈ រួមទាំងការបាត់បង់នៅចំណូល ប្រចាំថ្ងៃ ហើយបែរជាបង្កើនការចំណាយច្រើនទៅវិញ។ ផ្អែកតាមស្ថានភាពនេះ រាជរដ្ឋាភិបាលបានបង្កើតនូវសំណាញ់ សុវត្ថិភាព ដើម្បីអន្តរាគមន៍ទាំងការស្តារជីវភាព ស្តារហេដ្ឋារចនាសម្ព័ន្ធ ផ្ទះសម្បែង រក្សាលំនឹងជីវភាព ហើយបន្ថែមពីនេះ គឺគិតគូរដល់ការផ្តល់ជាដើមទុន ក្នុងការកសាង និងរក្សានៅនិរន្តរភាពសម្រាប់ការរស់នៅផងដែរ។

លោកអភិបាលរងខេត្តបានបន្ថែមទៀតថា តាមកិច្ចប្រជុំរបស់ក្រុមការងារចំពោះកិច្ច រៀបចំ និងគ្រប់គ្រងការស្តារជីវភាព និងហេដ្ឋារចនាសម្ព័ន្ធ ដែលខូចខាតពីជម្លោះព្រំដែនកម្ពុជា-ថៃ ដែលដឹកនាំដោយ ឯកឧត្តម ចន ណារិទ្ធ រដ្ឋលេខាធិការនៃក្រសួងសេដ្ឋ កិច្ច និងហិរញ្ញវត្ថុ និងជាប្រធានក្រុមការងារចំពោះកិច្ច តាមប្រព័ន្ធអនឡាញ ហ្សូម បានឱ្យដឹងថា រាជរដ្ឋាភិបាលដែល មានសម្តេចមហាបវរធិបតី ហ៊ុន ម៉ាណែត ជាប្រមុខ បានផ្តល់ការគិតគូរ និងឯកភាពដាក់ឱ្យអនុវត្តនូវ កម្មវិធីអន្តរាគមន៍ សម្រាប់គ្រួសារភៀសសឹកដែលរងផលប៉ះពាល់ក្នុងភូមិសាស្ត្រជម្លោះព្រំដែន នៃខេត្តទាំង ៥ មាន ខេត្តព្រះវិហារ ខេត្តឧត្តរមានជ័យ ខេត្តបន្ទាយមានជ័យ ខេត្តពោធិ៍សាត់ និងខេត្តបាត់ដំបង រួមមាន៖១. កម្មវិធីអន្តរាគមន៍សម្រាប់ស្តារជីវភាព និងស្តារលំនៅឋានខូចខាត ជូនគ្រួសារភៀសសឹកដែល បានវិលត្រលប់ទៅលំនៅឋានវិញ និង២.កម្មវិធីគាំពារសង្គមសម្រាប់ទ្រទ្រង់ជីវភាពគ្រួសារភៀសសឹក ដែលមិនទាន់អាចវិលត្រឡប់ទៅ លំនៅឋានវិញ
សម្រាប់ខេត្តបន្ទាយមានជ័យ រដ្ឋបាលខេត្ត បានធ្វើការស្រង់ពិនិត្យផ្ទៀងផ្ទាត់ ដោយទទួលបាននូវទិន្នន័យ ផ្លូវការរួមមាន៖ ១. ទិន្នន័យគ្រួសារដែលរងការខូចខាតផ្ទះសម្បែង សរុបចំនួន ៥៥៨គ្រួសារ ក្នុងនោះ៖
– កម្រិតស្រាល ចំនួន ៣៥៦គ្រួសារ
– កម្រិតមធ្យម ចំនួន ១២៨គ្រួសារ
– កម្រិតធ្ងន់ ឬទាំងស្រុង ចំនួន ៧៤គ្រួសារ

២. ទិន្នន័យគ្រួសារដែលកំពុងបន្តស្នាក់នៅបណ្តោះអាសន្ន នៅតាមមណ្ឌលភៀសសឹក ដែល អាជ្ញាធររៀបចំ ឬនៅតាមទីសុវត្ថិភាពនានា ឬផ្ទះសាច់ញាតិ សរុបចំនួន ២ ៨០៥គ្រួសារ ស្មើនឹង ១១ ៣៧៣នាក់៕