បន្ទាយមានជ័យ៖ នៅរសៀលថ្ងៃទី០៨ ខែកុម្ភៈ ឆ្នាំ ២០២៦ សហភាពអឺរ៉ុប តាមរយៈអង្គការ UNICEF បានផ្តល់ជំនួយមនុស្សធម៌ ជាសម្ភារជូនដល់បងប្អូនជនភៀសសឹក នៅមណ្ឌលសុវត្ថិភាពស្រុកថ្មពួក ដែលកំពុងស្នាក់នៅជម្រកបណ្តោះអាសន្ន ដែលមិនទាន់អាចវិលត្រលប់ទៅលំនៅឋានបាន ក្រោយយោធាថៃ ដាក់ទូកុងតឺន័ បន្លាលួស ព័ទ្ធយកដីផ្ទះរបស់ពលរដ្ឋ រំលោភដែនអធិបតេយ្យភាពរ របស់កម្ពុជា ក្រោយបទឈប់បាញ់ចូលជាធរមានកាលពីថ្ងៃទី២៧ ខែធ្នូ ឆ្នាំ ២០២៥កន្លងទៅ។
ពិធីប្រគល់-ទទួលក៏មានការចូលរួមពីលោក Igor Driesmans ឯកអគ្គរដ្ឋទូតសហភាពអឺរ៉ុបប្រចាំកម្ពុជា ឯកឧត្ដម ឌិត ទីណា រដ្ឋមន្ត្រី ក្រសួង កសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ អមដំណើរ ដោយ ឯកឧត្ដម ប្លែក វ៉ារី ប្រធាន ក្រុមប្រឹក្សា ខេត្ត ឯកឧត្ដម អ៊ុំ រាត្រី អភិបាល នៃ គណៈអភិបាលខេត្តបន្ទាយមានជ័យផងដែរ។
ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ ក៏បានបញ្ជាក់ជូនឯកអគ្គរដ្ឋទូតសហភាពអឺរ៉ុបប្រចាំកម្ពុជា នៅហេតុការណ៍ដែលបានកើតឡើងនៅក្នុងខេត្តបន្ទាយមានជ័យ កាលពីការផ្ទុះអាវុធរយៈពេល២១ថ្ងៃ ក្រោយពីមានបទឈប់បាញ់នៅថ្ងៃទី២៧ ខែធ្នូ ឆ្នាំ២០២៥កន្លងទៅ យោធាថៃបានរំលោភបំពានលើដែនអធិបតេយ្យភាពរបស់កម្ពុជា ដោយបានដាក់នៅពេលកុងតឺន័រ បន្លាលួស យកដីនិងផ្ទះប្រជាពលរដ្ឋនៅស្រុកអូរជ្រៅ ចំនួនពីរ ភូមិ និង ស្រុកថ្មពួក នៅតំបន់បឹងត្រកួន ចំនួន៤ភូមិ ដោយប្រជាពលរដ្ឋមិនទាន់អាចត្រឡប់ទៅលំនៅឋានវិញបានប្រមាណជិត៣០០០គ្រួសារ។ ព្រមទាំងបានបន្សល់ទុកនូវគ្រាប់យុទ្ធភណ្ឌមិនទាន់ផ្ទុះជាច្រើនម៉ឺនគ្រាប់ ហេដ្ឋារចនាសម្ព័ន្ធ ក៏ដូចជាផ្ទះសម្បែង របស់ពលរដ្ឋត្រូវបានយោធាថៃបំផ្លាញចោលគ្មានសល់។
លោក Igor Driesmans បានសម្តែងនៅការសោកស្តាយចំពោះបងប្អូនជនភៀសសឹកដែលបាត់បង់ផ្ទះសំបែង ដោយសារយោធាថៃព័ទ្ធយកដីផ្ទះរំលោភដែនអធិបតេយ្យភាពររបស់កម្ពុជា។
លោកបញ្ជាក់ថា ការប៉ះទង្គិចតាម ព្រំដែនពិតជាមានផលប៉ះពាល់យ៉ាងខ្លាំងទៅដល់ជីវភាពរស់នៅរបស់បងប្អូនប្រជាពលរដ្ឋកម្ពុជា ជាពិសេសនៅតាមព្រំដែន។
លោកបន្តថា ការផ្តល់ជំនួយនេះ គឺជាការបញ្ជាក់ពីការយកទឹកទុកដាក់ចំពោះបងប្អូនជនភៀសសឹក ហេីយក៏មានការផ្តល់សេវាប្រឹក្សាសុខភាព ហេីយលោកយល់ពីអារម្មណ៍របស់របស់ជនភៀសសឹក ដែលត្រូវបាត់បង់ផ្ទះសំបែង ដែលមិនអាចវិលត្រលប់ទៅភូមិឋានវិញបាន។ ការផ្តល់ជំនួយនេះសម្បុរសធម៌នេះ ពិតជាមាន័យសម្រាប់បងប្អូនភៀសសឹក មានជាជម្រកសម្រាប់បងប្អូនស្នាក់នៅបណ្តោះអាសន្ន មានទឹកស្អាតជាដេីម។ លោកក៏បានសារជូនដល់បងប្អូនកម្ពុជា ថាក្នុងនាមសហភាពអ៉ឺរ៉ប ក៏ដូចជាភាគីពាក់ព័ន្ធ លោកបង្ហាញនៅស្មារតីសាមគ្គីជាមួយគ្នា ត្បិតតែសហភាពអឺរ៉ុប នៅឆ្ងាយពីគ្នាក៏ពិតមែន សហភាពអឺរ៉ុប នឹង ឈរជាមួយកម្ពុជា មានភារកិច្ច កាព្វកិច្ច ក្នុងពេលជួបការលំបាក់បែបនេះ គឺលះបង់បង់ដេីម្បីជួយគ្នាទៅវិញទៅមក និងគាំទ្រនូវដំណេីរការរៀបចំ ក៏ដូចជាអនុវត្តកិច្ចព្រមព្រៀងបទឈប់បាញ់ បន្តថានូវកិច្ចការងារនេះបន្តទៀត។
ជាមួយគ្នានោះឯកឧត្តម ឌិត ទី ណា ក៏បានថ្លែងអំណរគុណសហភាពអឺរ៉ុបសម្រាប់ការផ្ដល់ជំនួយមនុស្សធម៌ ជូនបងប្អូនជនភៀសសឹក ពិសេសពិសេសផ្ដោតទៅលើកុមារដែលកំពុងតែស្នាក់នៅជំរំភៀសសឹក បណ្តោះអាសន្ន ដែលអាជ្ញាធរបានរៀបចជូន។
ឯកឧត្ដមបញ្ជាក់ ថា ការប្រគល់ជំនួយមនុស្សធម៌ នេះដែរ គឺជាការកត់សម្គាល់ដ៏សំខាន់មួយក្នុងការពង្រឹងភាពជាដៃគូ និងការលើកកម្ពស់ការ ផ្តល់សេវាសម្រាប់កុមារ និងសហគមន៍ដែលរងផលប៉ះពាល់ដោយសារវិបត្តិនៃជម្លោះនៅតាមព្រំដែនកាលពីពេលថ្មីៗនេះ។ ការគាំទ្រនេះមិនត្រឹមតែសម្រាប់ខេត្តបន្ទាយមានជ័យប៉ុណ្ណោះទេប៉ុន្តែក៏ នឹងផ្តល់ដល់ខេត្តឧត្តរមានជ័យ ព្រះវិហារ និងសៀមរាប ដោយរួមចំណែកឆ្លើយតបដល់តម្រូវការ បន្ទាន់ ព្រមទាំងពង្រឹងភាពធន់រយៈពេលវែងផងដែរ៕
