ឯកឧត្ដម នេត សាវឿន៖ ការងារលើបរិស្ថាន គឺមានទំហំធំធេងណាស់ ដូច្នេះទាមទាការចូលរួមពីសង្គមទាំងមូលទើបទទួលបានជោគជ័យ

ភ្នំពេញ៖ ក្នុងឱកាសលោកអញ្ជើញ បិទសន្និបាតបូកសរុបលទ្ធផលការងារក្រសួងបរិស្ថាន ឆ្នាំ២០២៥ និងលើកទិសដៅការងារឆ្នាំ២០២៦ របស់ក្រសួងរិស្ថាន ឯកឧត្ដមសន្តិបណ្ឌិត នេត សាវឿន ឧបនាយករដ្ឋមន្ត្រី ទទួលបន្ទុកជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាតំណាងសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា ការងារលើបរិស្ថាន គឺមានទំហំធំធេងណាស់ ដូច្នេះដើម្បីឱ្យវិស័យបរិស្ថានទទួលបានជោគជ័យបាន មិនមែនតែក្រសួងបរិស្ថានធ្វើការងារតែម្នាក់ឯងបាននោះទេ ពោលគឺត្រូវការការចូលរួមពីសង្គមទាំងមូលប្រកៀកស្មាគ្នា ទើបឱ្យធ្វើបរិស្ថានទទួលបានជោគជ័យ។

ឯកឧត្ដមបញ្ជាក់ថា “កិច្ចការងារបរិស្ថាន គឺធំណាស់ មិនមែនក្រសួង (បរិស្ថាន) ធ្វើម្នាក់ឯងបាននោះទេ គឺរួមសង្គមទាំងមូលទើបបរិស្ថានទទួលបានជោគជ័យ […] យើងទទួលខុសត្រូវទាំងអស់គ្នា ដើម្បីរក្សាបរិស្ថាននៅកម្ពុជា បរិស្ថាន គឺជាដង្ហើមរស់ នេះជារឿងមួយដែលចាំបាច់បំផុត”។

ឯកឧត្ដមឧបនាយករដ្ឋមន្ត្រីបន្តថា ក្រសួងបរិស្ថាន បានបំពេញការងារច្រើនជាក់ស្តែងការគ្រប់គុណភាពខ្យល់ គុណភាពទឹក សំណល់រឹង សំរាមប្លាស្ទិក ភាពស្អាត ភាពបៃតង ជាតិពុល ព្រមទាំងការងារអភិរក្សធនធានធម្មជាតិ ព្រៃឈើ សត្វព្រៃ។ល។ និង។ល។ ដូច្នេះ ដើម្បីអនុវត្តភារកិច្ចរបស់ខ្លួនដែលជាសេនាធិការរបស់រាជរដ្ឋាភិបាល លើវិស័យបរិស្ថាន គឺចាំបាច់ខ្លាំងណាស់ ត្រូវពង្រឹងការងារផ្សព្វផ្សាយព័ត៌មាន ជាមួយគ្រប់ភាគីពាក់ព័ន្ធទាំងអស់ ដើម្បីឱ្យការងារបរិស្ថានទទួលបានជោគជ័យ។

ឧបនាយករដ្ឋមន្ត្រី នេត សាវឿន បានគូសបញ្ជាក់ថា ការងារចំនួន២ សំខាន់ដែលអាចឱ្យសម្រេចជោគជ័យលើការងារបរិស្ថាន គឺទី១៖ ការអប់រំ និងទី២៖ ការអនុវត្តច្បាប់ ឱ្យបានតឹងរ៉ឹង។ ជាក់ស្តែងបច្ចុប្បន្ននេះ នៅតាមដងផ្លូវសាធារណៈនានា មិនឃើញមានសំរាម ឬថង់ប្លាស្ទិក ហោះពាសវាល ពាសកាលនោះទេ ជាពិសេសអ្នកធ្វើដំណើរតាមផ្លូវបានរួមគ្នារក្សាអនាម័យ ដោយបានបោះចោលសំរាម បានយ៉ាងត្រឹមត្រូវនៅធុងសំរាម និងទីកន្លែងទុកដាក់សំរាមជាដើម។

ឧបនាយករដ្ឋមន្ត្រី នេត សាវឿន បានគូសបញ្ជាក់ថា សង្គមជាតិទាំងមូលចូលរួម មន្ត្រីជំនាញរបស់ក្រសួងបរិស្ថាន ត្រូវបន្តធ្វើការងារអប់រំផ្សព្វផ្សាយពីផលប៉ះពាល់ដែលបណ្តាលមកពីសំរាម ថង់ប្លាស្ទិក ដែលរស់នៅតាមដងផ្លូវនានា ឱ្យបានយល់ដឹង និងចូលរួមចំណែកកាត់បន្ថយការបំពុលដោយប្លាស្ទិកជាដើម៕