រដ្ឋបាលខេត្តក្រចេះ រៀបចំពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦

ក្រចេះ៖ នៅព្រឹកថ្ងៃទី២២ ខែមករា ឆ្នាំ២០២៦ ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្ត និងឯកឧត្តម វ៉ា ថន អភិបាលខេត្តក្រចេះ អញ្ជើញចូលរួមពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលខេត្តក្រចេះ ក្រោមអធិបតីភាព ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ នៅសាលមហោស្រពខេត្ត។

អង្គសន្និបាតក៏មានការអញ្ជើញចូលរួមពី ឯកឧត្ដម បណ្ឌិត ស៊ាង ប៊ុនលាង រដ្ឋលេខាធិការក្រសួងមហាផ្ទៃ ឯកឧត្តម អនុប្រធានក្រុមការងាររាជរដ្ឋាភិបាលចុះមូលដ្ឋានខេត្ត ប្រធាន អនុប្រធានក្រុមការងាររាជរដ្ឋាភិបាលចុះមូលដ្ឋានក្រុង ស្រុក ឯកឧត្តម លោកជំទាវ ប្រតិភូក្រសួងមហាផ្ទៃ សមាជិកក្រុមប្រឹក្សាខេត្ត អភិបាលរងខេត្ត ប្រធានសាលាដំបូងខេត្ត ព្រះរាជអាជ្ញាអមសាលាដំបូងខេត្ត នាយក នាយករងរដ្ឋបាលខេត្ត មន្ត្រីរាជការនៃរដ្ឋបាលខេត្ត ប្រធាន អនុប្រធាន មន្ទីរ-អង្គភាពជុំវិញ កងកម្លាំងប្រដាប់អាវុធ ប្រធានក្រុមប្រឹក្សាក្រុង ស្រុក អភិបាលក្រុង ស្រុក មេឃុំចៅសង្កាត់ ស្មៀនឃុំ សង្កាត់ នាយប៉ុស្តិ៍នគរបាលឃុំ សង្កាត់ និងមន្ត្រីរាជការ។

ឯកឧត្តម វ៉ា ថន អភិបាលខេត្តក្រចេះ បានធ្វើរបាយការណ៍ជម្រាបជូនពីដំណើរការនៃអង្គសន្និបាត បានពិភាក្សា និងស្ដាប់បទបង្ហាញពីក្រុមពិភាក្សាទាំង៦ ដោយបានបង្ហាញ ពីស្ថានភាពនៃការអនុវត្តជាក់ស្ដែង និងបញ្ហាប្រឈមដែលនៅសេសសល់ ហើយស្វែងរក ដំណោះស្រាយ និងប្រមូលធាតុចូលសំខាន់ៗ សម្រាប់កំណត់ទិសដៅអនុវត្តនាពេលខាងមុខ ៦រួមមាន៖ ១. វឌ្ឍនភាពនៃការអនុវត្តគោលនយោបាយ “ភូមិ-ឃុំ-សង្កាត់មានសុវត្ថិភាព” ២. វឌ្ឍនភាព នៃការពង្រឹង គុណភាព ការផ្តល់សេវាសុខាភិបាល, ៣. ពង្រឹងការអនុវត្តមុខងារអប់រំ នៃរដ្ឋបាលក្រុង-ស្រុក ៤.ការគ្រប់គ្រងតំបន់ការពារអភិរក្សធនធានធម្មជាតិ និងបរិស្ថាន និងការលើកកម្ពស់វិស័យទេសចរណ៍ ៥.ប្រសិទ្ធិភាពនៃការអនុវត្តគម្រោងមូលនិធិក្រុង-ស្រុកនិង ឃុំ-សង្កាត់ ៦. ការរៀបចំប្លង់គោលប្រើប្រាស់ដីថ្នាក់ក្រុង-ស្រុក និងការគ្រប់គ្រងសណ្តាប់ធ្នាប់សំណង់និងដីចំណីផ្លូវ ។

អង្គសន្និបាតបានដាក់ចេញនូវវិធានការដោះស្រាយ ដោយខិតខំជំរុញពង្រឹងការអនុវត្តគោលនយោបាយ «ភូមិ ឃុំ-សង្កាត់មានសុវត្ថិភាព» ឱ្យកាន់តែមានប្រសិទ្ធភាព និងសំណូមពរដល់ក្រសួង-ស្ថាប័ន ពាក់ព័ន្ធ ជួយគាំទ្របណ្ដុះបណ្ដាល បំពាក់បំប៉នសមត្ថភាព ចំណេះដឹង បច្ចេកទេសបន្ថែមដល់កម្លាំងសមត្ថកិច្ចជំនាញ និងការផ្ដល់នូវមធ្យោបាយ ឧបករណ៍ សម្ភារចាំបាច់នានាសំដៅកាត់បន្ថយ និងឈានទៅលុបបំបាត់ទាំងស្រុងនូវបទល្មើសនៅទូទាំងខេត្ត។ ជាមួយគ្នានេះ អង្គសន្និបាត បានប្ដេជ្ញាយ៉ាងមុតមាំក្នុងការទប់ស្កាត់ និងបង្រ្កាបល្បែងស៊ីសងខុសច្បាប់ ល្បែងអនឡាញ និងបទល្មើសឆបោក តាមប្រព័ន្ធអនឡាញ (ONLINE SCAMS)គ្រប់ទម្រង់ដើម្បីលុបបំបាត់មិនឱ្យមាននៅក្នុងខេត្ត។

សម្រាប់ទិសដៅអនុវត្តការងារឆ្នាំ២០២៦ អង្គសន្និបាតបានប្តេជ្ញាចិត្តរួមគ្នាបន្តពង្រឹង ស្មារតី សាមគ្គីភាព របៀបរបបធ្វើការងារ លើកកម្ពស់ស្មារតីទទួលខុសត្រូវតាមតួនាទីភារកិច្ច និង ការចាត់តាំង ដើម្បីពុះពារ ដោះស្រាយរាល់បញ្ហាប្រឈមនានា សំដៅបន្តរក្សាសុខសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សាធារណៈ និងខិតខំបន្តជំរុញការអភិវឌ្ឍខេត្តលើគ្រប់វិស័យស្របតាមកម្មវិធីនយោបាយយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ដើម្បីកំណើន ការងារ សមធម៌ ប្រសិទ្ធភាព ចីរភាព និងអាទិភាពគន្លឹះទាំង៥ មនុស្ស ផ្លូវ ទឹក ភ្លើង និងបច្ចេកវិទ្យាឌីជីថល ជាពិសេសការចូលរួម អនុវត្ត សម្រេចឱ្យបានជោគជ័យតាមផែនការ អភិវឌ្ឍខេត្ត រយៈពេល ៥ឆ្នាំ កម្មវិធីវិនិយោគបីឆ្នាំរំកិលខេត្ត និងការដាក់ចេញនូវការអភិវឌ្ឍ វិស័យអាទិភាពសំខាន់ៗរបស់ខេត្ត៕