សម្តេចរដ្ឋសភាធិបតី ឃួន សុដារី សម្តែងការសោកស្តាយជាខ្លាំងចំពោះមរណភាពរបស់ លោក សេង សុបញ្ញា ដែលជាមន្រ្តីដ៏ល្អរបស់អគ្គលេខាធិការដ្ឋានរដ្ឋសភា
ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃចន្ទ ទី១៩ ខែមករា ឆ្នាំ២០២៦ បានអញ្ជើញចូលរួមពិធីបុណ្យសពលោក សេង សុបញ្ញា ប្រធានការិយាល័យទំនាក់ទំនងទូទៅ នាយកដ្ឋានពិធីការនៃអគ្គលេខាធិការដ្ឋានរដ្ឋសភា នៅគេហដ្ឋានសពស្ថិតនៅសង្កាត់ច្រំាងចំរៈ១ ខណ្ឌឬស្សីកែវ រាជធានីភ្នំពេញ។
លោក សេង សុបញ្ញា បានទទួមមរណភាពនៅថ្ងៃអាទិត្យទី១៨ ខែមករា ឆ្នាំ២០២៦ ក្នុងជន្មាយុ៤៣ឆ្នាំ ដោយរោគាពាធ។
ក្នុងបរិយាកាសដ៏សែនវិយោគសោកសង្រេងស្រណោះអាឡោះអាល័យនេះ សម្តេចប្រធានរដ្ឋសភា បានចូលរួមរំលែកនូវមរណទុក្ខដ៏មហាក្រៀមក្រំជាមួយក្រុមគ្រួសារសព និងបានចាត់ទុកមរណភាព លោក សេង សុបញ្ញា គឺជាការបាត់បង់នូវស្វាមី ឪពុក បងប្អូន ជាទីគោរពស្រឡាញ់ដ៏ជ្រាលជ្រៅ និងប្រកបដោយព្រហ្មវិហារធម៌ សង្គហធម៌ដ៏បវរប្រពៃមួយរូប។
រមណភាពរបស់លោកក៏ជាការបាត់នូវធនធានដ៏ល្អរបស់អគ្គលេខាធិការដ្ឋានរដ្ឋសភា ដែលមានការតស៊ូ លះបង់ខ្ពស់និងមានការព្យាយាមក្នុងការបំពេញតួនាទី ភារកិច្ច សម្រេចបានស្នាដៃធំៗជាច្រើន ជូនស្ថាប័ននិងថ្នាក់ដឹកនាំ។
សម្តេចប្រធានរដ្ឋសភា បានបួងសួងដល់វត្ថុស័ក្តិសិទ្ធិក្នុងលោក និងតេជះបារមីនៃព្រះពុទ្ធ ព្រះធម៌ ព្រះសង្ឃ តាមជួយបីបាច់ថែរក្សាដល់ដួងវិញ្ញាណក្ខន្ធ លោក សេង សុបញ្ញា បានចាប់បដិសន្ធិក្នុងសុគតិភពគ្រប់ៗជាតិ កុំបីឃ្លៀងឃ្លាតឡើយ៕
