បណ្ឌិត ទូច វិសាលសុខ អញ្ជើញជាអធិបតីបើកសន្និបាតបូកសរុបលទ្ធផលការងារឆ្នាំ២០២៥ និងទិសដៅការងារឆ្នាំ២០២៦ របស់សាលាជាតិរដ្ឋបាលមូលដ្ឋាន ក្រសួងមហាផ្ទៃ
ភ្នំពេញ៖ នៅព្រឹកថ្ងែទី១៥ ខែមករា ឆ្នាំ២០២៦ សាលាជាតិរដ្ឋបាលមូលដ្ឋាន ក្រសួងមហាផ្ទៃ បានរៀបចំពិធីបើកសន្និបាតបូកសរុបលទ្ធផលការងារឆ្នាំ២០២៥ និងទិសដៅការងារឆ្នាំ២០២៦ របស់សាលាជាតិរដ្ឋបាលមូលដ្ឋាន ក្រសួងមហាផ្ទៃ ក្រោមអធិបតីភាពឯកឧត្តមបណ្ឌិត ទូច វិសាលសុខ រដ្ឋលេខាធិការក្រសួងមហាផ្ទៃ។
ពិធីនេះមានការអញ្ជើញចូលរួមពីសំណាក់ ឯកឧត្តមអនុរដ្ឋលេខាធិការ លោកជំទាវ អនុរដ្ឋលេខាធិការ ឯកឧត្តមនាយកសាលា លោក លោកស្រី នាយករងសាលា ថ្នាក់ដឹកនាំនិងមន្ត្រីរបស់សាលាជាតិរដ្ឋបាលមូលដ្ឋាន ព្រមទាំងតំណាងអគ្គនាយកដ្ឋាននានាចំណុះក្រសួងមហាផ្ទៃ និងតំណាងអង្គការដៃគូ សរុបប្រមាណ ១២៦រូប នៅសណ្ឋាគារកាំបូឌីយ៉ាណា រាជធានីភ្នំពេញ។
ថ្លែងក្នុងកម្មវិធីបើក ឯកឧត្តមបណ្ឌិត រដ្ឋលេខាធិការ បានថ្លែងកោតសរសើរដល់ថ្នាក់ដឹកនាំ និងមន្ត្រីសាលាជាតិរដ្ឋបាលមូលដ្ឋាន ដែលបានខិតខំប្រឹងប្រែងយកចិត្តទុកដាក់បំពេញការងារ និងសម្រេចបានសមិទ្ធផលយ៉ាងច្រើនក្នុងឆ្នាំកន្លងមក។
ជាមួយគ្នានោះ ឯកឧត្តមបណ្ឌិត ក៏បានផ្តល់អនុសាសន៍ណែនាំមួយចំនួនដល់សាលាជាតិរដ្ឋបាលមូលដ្ឋាន ជាពិសេសការរៀបចំកម្មវិធីបណ្ដុះបណ្ដាលដែលអាចឆ្លើយតបទៅនឹងតម្រូវការជាក់ស្ដែងរបស់ក្រុមគោលដៅ ព្រមទាំងពង្រឹងសមត្ថភាពរបស់គ្រូបង្គោលសាលាជាតិបន្ថែម ដើម្បីអាចផ្តល់ការបណ្តុះបណ្តាលប្រកបដោយប្រិសិទ្ធភាព និងមានគុណភាព៕
