ឯកឧត្តម សួស ប្រាថ្នា អញ្ជើញចូលរួមពិធីបើកសិក្ខាសាលាពិគ្រោះយោបល់លើកទី២ស្តីពីការរៀបចំយុទ្ធសាស្រ្តជាតិអភិវឌ្ឍន៍ទីក្រុងឆ្លាត

ភ្នំពេញ៖ នៅព្រឹកថ្ងៃទី១២ ខែធ្នូ ឆ្នាំ២០២៥ ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ អញ្ជើញចូលរួមពិធីបើកសិក្ខាសាលាពិគ្រោះយោបល់លើកទី២ស្តីពីការរៀបចំយុទ្ធសាស្រ្តជាតិអភិវឌ្ឍន៍ទីក្រុងឆ្លាត ក្រោមអធិបតីភាព ឯកឧត្តម អ៊ុំ ម៉ារ៉ា រដ្ឋលេខាធិការក្រសួងមហាផ្ទៃ និងជាប្រធានគណៈកម្មការសម្របសម្រួលនិងដឹកនាំការងារទីក្រុងឆ្លាត ព្រមទាំងមានការចូលរួមពីឯកឧត្តម លោកជំទាវតំណាងក្រសួង ស្ថាប័ន តំណាងរដ្ឋបាលរាជធានី ខេត្ត ដៃគូអភិវឌ្ឍន៍ អង្គការមិនមែនរដ្ឋាភិបាល និងមន្រ្តីពាក់ព័ន្ធជាច្រើនរូប នៅសណ្ឋាគារ Fairfield by Marriott ភ្នំពេញ។

សិក្ខាសាលាពិគ្រោះយោបល់លើកទី២នេះរៀបចំឡើងដោយក្រសួងមហាផ្ទៃ និងដោយមានការគាំទ្រពី UNESCAP, UN-HABITAT, UNOPS ក្នុងគោលបំណងសំខាន់៣ រួមមាន៖ ទី១. ការប្រមូលធាតុចូលសម្រាប់ជាមូលដ្ឋានកែលម្អខ្លឹមសារសំខាន់ៗនៃសេចក្តីព្រាងយុទ្ធសាស្រ្តជាតិអភិវឌ្ឍន៍ទីក្រុងឆ្លាត ទី២. ពិនិត្យ និងធ្វើឱ្យមានសង្គតិភាពនូវផែនការសកម្មភាពទីក្រុងឆ្លាតជាមួយនឹងសកម្មភាពអាទិភាព និងតួនាទីភារកិច្ចរបស់អ្នកពាក់ព័ន្ធ និង ទី៣. លើកកម្ពស់កិច្ចសហការជាមួយអ្នកពាក់ព័ន្ធក្នុងការអភិវឌ្ឍទីក្រុងឆ្លាត និងបរិវត្តកម្មឌីជីថល។ ទន្ទឹមនេះ អង្គសិក្ខាសាលាក៏នឹងពិភាក្សាទៅលើចក្ខុវិស័យ គោលបំណង និងគោលដៅ នៃយុទ្ធសាស្រ្តជាតិស្តីពីការអភិវឌ្ឍទីក្រុងឆ្លាត៕