កុមារ និងក្រុមគ្រួសារកុមារគោលដៅ ដែលបានទប់ស្កាត់ពីការប្រើប្រាស់ពលកម្មកុមារ នៅស្រុកចំការលើ និងស្រុកបាធាយ ទទួលបានសម្ភារៈសិក្សា មធ្យោបាយធ្វើដំណើរ និងកញ្ចប់បំណិនជីវិត

កំពង់ចាម)៖ “ការវិនិយោគលើកុមារថ្ងៃនេះ គឺជាការវិនិយោគលើអនាគត” ដោយឡែកការលុបបំបាត់ទម្រង់ធ្ងន់ធ្ងរនៃពលកម្មកុមារ គឺជាបញ្ហាអាទិភាពដែលត្រូវមានការប្តេជ្ញាចិត្តរួមគ្នា និងទាមទារនូវការចូលរួមយ៉ាងសកម្មពីគ្រប់ភាគីពាក់ព័ន្ធ។ នេះជាការលើកឡើងរបស់ឯកឧត្តម វ៉េង ហៀង អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ និងជាប្រធានគណៈ:កម្មាធិការជាតិប្រឆាំងពលកម្មកុមារ ក្នុងកម្មវិធីចែកសម្ភារៈសិក្សា មធ្យោបាយធ្វើដំណើរ និងពូជបន្លែ ជូនដល់កុមារ និងក្រុមគ្រួសារគោលដៅ ដែលបានទប់ស្កាត់ និងការពារពីការប្រើប្រាស់ពលកម្មកុមារ នៅស្រុកចំការលើ និងស្រុកបាធាយ ខេត្តកំពង់ចាម នាថ្ងៃទី៥ ខែធ្នូ ឆ្នាំ២០២៥។

ឯកឧត្តមអនុរដ្ឋលេខាធិការ ក៏បានផ្ដល់អនុសាសន៍ណែនាំសំខាន់ៗ ដូចជា ស្នើសុំឪពុកម្ដាយ អាណាព្យាបាល និងអ្នកពាក់ព័ន្ធជំរុញការអប់រំដល់កុមារយ៉ាងហោចណាស់ដល់ថ្នាក់ទី៩ និងអាចបន្តចូលរៀនជំនាញបច្ចេកទេស និងវិជ្ជាជីវៈ។ មន្ទីរការងារ និងបណ្ដុះបណ្ដាលវិជ្ជាជីវៈ ត្រូវធ្វើអធិការកិច្ចការងារជាប្រចាំលើលក្ខខណ្ឌការងារ ក្នុងវិស័យវាយនភណ្ឌ វិស័យសិប្បកម្មផលិតឥដ្ឋ និងវិស័យកសិ-ឧស្សាហកម្ម។ វិនិយោគលើចំណេះដឹងថ្មីៗ ដែលជាតម្រូវការនៅថ្ងៃអនាគត និងធានានិរន្តរភាពនៃការផ្សព្វផ្សាយការទប់ស្កាត់ការប្រើប្រាស់ពលកម្មកុមារ និងពង្រីកការផ្សព្វផ្សាយលើវិស័យកសិ-ឧស្សាហកម្ម និងវិស័យណាដែលចាំបាច់។ ដោយឡែកយុវជន ក្រុមគ្រួសារ នៅតាមភូមិ ឃុំ ស្រុក ដែលមានបំណងស្វែងរកការងារ សូមទំនាក់ទំនងទៅកាន់ប្រព័ន្ធ Hotline ១២៩៧ និងក្នុងករណីសង្ស័យមានការប្រីប្រាស់ពលកម្មកុមារ សូមចូលរួមផ្តល់ព័ត៌មានភ្លាមមកប្រព័ន្ធ Hotline ១២៨៦ ឬប្រអប់បណ្តឹងអនាមិក។

សូមបញ្ជាក់ថា គម្រោងកិច្ចអន្តរាគមន៍ស្នូល គឺជាកម្មវិធីមួយដែលដាក់ចេញដោយរាជរដ្ឋាភិបាលកម្ពុជា ដែលអនុវត្តដោយក្រសួងការងារ និងបណ្តុះបណ្តាលវិជ្ជាជីវៈ ក្នុងគោលបំណងដើម្បីទប់ស្កាត់ការប្រើប្រាស់ពលកម្មកុមារ និងលុបបំបាត់ទម្រង់ធ្ងន់ធ្ងរនៃពលកម្មកុមារ តាមរយៈការផ្តល់ឱកាសអប់រំ ជំរុញអោយកុមារមានឱកាសបន្តការសិក្សា ដោយការផ្តល់វគ្គបំប៉នមុនពេលចូលរៀន ការលើកកម្ពស់សុខុមាលភាពកុមារ តាមរយៈការឧបត្ថម្ភអាហារដល់កុមារ និងផ្តល់ជាសម្ភារៈសិក្សា សម្លៀកបំពាក់ ស្បែកជើង កាបូប និងមធ្យោបាយធ្វើដំណើរដល់កុមារ៕