ឯកឧត្តម ស៊ុន ចាន់ថុល អញ្ជើញក្នុងពិធីលៀងសាយភោជន ឱកាសនៃការអបអរសាទរខួបលើកទី៣០ ទិវារត់ប្រណាំងពាក់កណ្តាលម៉ារ៉ាតុងអន្តរជាតិអង្គរ “១៩៩៦-២០២៥”

សៀមរាប៖ នាល្ងាចថ្ងៃសៅរ៍ ទី៦ ខែធ្នូ ឆ្នាំ២០២៥ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា តំណាងដ៏ខ្ពង់ខ្ពស់ សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីក្នុងពិធីលៀងសាយភោជន ឱកាសនៃការអបអរសាទរខួបលើកទី៣០ ទិវារត់ប្រណាំងពាក់កណ្តាលម៉ារ៉ាតុងអន្តរជាតិអង្គរ “១៩៩៦-២០២៥” ដែលបានប្រារព្ធឡើងយ៉ាងមនោរម្យនៅបរិវេណប្រាសាទក្រវ៉ាន់ ក្នុងទឹកដីនៃខេត្តសៀមរាប។

ពិធីនេះមានការអញ្ជើញចូលរួមពី ឯកឧត្តមឯកអគ្គរាជទូតវិសាមញ្ញ និងពេញសមត្ថភាពជប៉ុនប្រចាំកម្ពុជា, ឯកឧត្តមរដ្ឋមន្ត្រីក្រសួងទេសចរណ៍, លោកជំទាវរដ្ឋមន្ត្រី ប្រតិភូអមនាយករដ្ឋមន្ត្រី ទទួលបន្ទុកកិច្ចការព្រំដែននិងទេសចរណ៍, ឯកឧត្តមរដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា, លោកស្រីប្រធានអង្គការបេះដូងមាស និងជាសហប្រធានរៀបចំទិវារត់ប្រណាំងពាក់កណ្តាលម៉ារ៉ាតុងអន្តរជាតិអង្គរ, លោកស្រីអភិបាលក្រុង Tsuchiura City ប្រធាន Kasumigaura Marathon ព្រមទាំង ឯកឧត្តម លោកជំទាវ លោក លោកស្រី កីឡាករ កីឡាការិនីជាច្រើនរូប។

ក្នុងរយៈពេល ៣០ឆ្នាំ កន្លងមកនេះ ព្រឹត្តិការណ៍រត់ប្រណាំងពាក់កណ្តាលម៉ារ៉ាតុងអន្តរជាតិអង្គរ បានក្លាយជាព្រឹត្តិការណ៍កីឡាទេសចរណ៍ដ៏ធំមួយប្រចាំឆ្នាំ ដែលមានអ្នកចូលរួមជាតិ និងអន្តរជាតិមកពីគ្រប់ទិសទីជុំវិញពិភពលោករាប់ម៉ឺននាក់ មកជួបជុំគ្នារត់ប្រណាំងកម្សាន្តសប្បាយផង និងបានចំណាយពេលវេលាទស្សនាស្វែងយល់ពីសិល្បៈវប្បធម៌ដ៏ផូរផង់របស់ជាតិយើង ជាពិសេសតំបន់រមណីយដ្ឋានអង្គរ ជាសម្បត្តិបេតិភណ្ឌពិភពលោក ដែលបានចាត់ថ្នាក់ដោយអង្គការ UNESCO ផងដែរ។

ថ្លែងក្នុងឱកាសនេះ ឯកឧត្តមឧបនាយករដ្ឋមន្ត្រី ក្នុងនាមរាជរដ្ឋាភិបាលកម្ពុជា បានបង្ហាញពីមោទនភាពក្នុងនាមជាម្ចាស់ផ្ទះ ចំពោះវឌ្ឍនភាពគួរជាទីកត់សម្គាល់ នៃព្រឹត្តិការណ៍កីឡាទេសចរណ៍ដ៏ធំនេះ ដែលចាប់ផ្តើមដំបូងជាមួយអ្នករត់មិនលើសពី ៥០០នាក់ នៅក្នុងឆ្នាំ១៩៩៦ រហូតដល់អ្នករត់កើនឡើងដល់ទៅ ១៦,០០នាក់ ក្នុងខួប៣០ឆ្នាំ នាពេលនេះ។ ឯកឧត្តមបានបន្ថែមថា ការរីកចម្រើននេះ គឺជាសក្ខីភាពជាក់ស្តែងបញ្ជាក់ពីការដឹកនាំដ៏ត្រឹមត្រូវរបស់ សម្តេចតេជោ អតីតនាយករដ្ឋមន្ត្រី និងជាប្រធានព្រឹទ្ធសភាបច្ចុប្បន្ន និងការបន្តដឹកនាំប្រកបដោយចក្ខុវិស័យច្បាស់លាស់ ថាមពលខ្លាំងក្លា និងប្រាជ្ញាឈ្លាសវៃរបស់ សម្តេចធិបតី នាយករដ្ឋមន្ត្រី ដែលបានធ្វើឱ្យកម្ពុជា ក្លាយជាគោលដៅទេសចរណ៍មួយពោរពេញដោយស្ថិរភាព សុវត្ថិភាព និងភាពស្វាគមន៍រាក់ទាក់ ដែលការណ៍នេះ បានក្លាយជាកម្លាំងចលករជំរុញថាមពលសេដ្ឋកិច្ចកម្ពុជា កាន់តែរីកចម្រើនរឹងមាំបន្ថែមទៀត ក្រោមម្លប់នៃសុខសន្តិភាព។

មុននឹងបញ្ចប់សុន្ទរកថា ឯកឧត្តមឧបនាយករដ្ឋមន្ត្រី បានសម្តែងនូវអំណរគុណដល់ អង្គការបេះដូងមាស “Heart of Gold” ជប៉ុន, ស្ថានទូតនៃចក្រភពជប៉ុនប្រចាំកម្ពុជា, Kasumigaura Marathon ជប៉ុន ដែលជាដៃគូជាមួយ Angkor Wat International Half Marathon និងអរគុណដល់គណៈកម្មាធិការជាតិអូឡាំពិកកម្ពុជា អាជ្ញាធរខេត្តសៀមរាប អាជ្ញាធរជាតិអប្សរា គ្រឹះស្ថានអង្គរ កងកម្លាំង និងមន្ទីរពាក់ព័ន្ធរបស់រដ្ឋបាលខេត្ត ដែលតែងតែរួមគ្នាកសាងគុណតម្លៃ និងប្រសិទ្ធភាព ក្នុងការរៀបចំព្រឹត្តិការណ៍រត់ប្រណាំងនេះ ឱ្យកាន់តែមានប្រជាប្រិយភាព និងជោគជ័យ ពីមួយឆ្នាំ ទៅមួយឆ្នាំ៕