មន្ទីរទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ចខេត្តសៀមរាប ផ្សព្វផ្សាយច្បាប់ អំពើហិង្សាក្នុងគ្រួសារ និកិច្ចការពារជនរងគ្រោះ

នាព្រឹកថ្ងៃទី០១ កក្កដា ឆ្នាំ២០២២នេះ មន្ទីរទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ចខេត្ត ជាមួយអាជ្ញាធរស្រុកបន្ទាយស្រី និងមន្ទីរកិច្ចការនារីខេត្ត បានផ្សព្វផ្សាយច្បាប់ ស្តីពីការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ ធ្វើយ៉ាងណារួមគ្នាទប់ស្កាត់ឱ្យបាន ដើម្បីភាពសុខសាន្តក្នុងគ្ួសារនិងសង្គមជាតិ។

លោក លឹម ភក្តី ប្រធានមន្ទីរទំនាក់ទំនងជាមួយរដ្ឋសភាខេត្ត បានលើកឡើងថា មន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច គឺជាវិស័យដែលមិនអាចខ្វះបាន ដែលធ្វើជាសេនាធិការឲ្យរាជរដ្ឋាភិបាល សំដៅដល់ការទប់ស្កាត់បាតុភាពអសកម្ម អំពើពុករលួយ និងការរំលោភដោយអំណាច ដើម្បីបំរើប្រជាពលរដ្ឋ និងបង្កើនជំនឿជឿជាក់មកលើរាជរដ្ឋាភិបាល ជាពិសេស តម្រូវឲ្យមន្ត្រីអធិការកិច្ចត្រូវបន្តពង្រឹងសមត្ថភាព ក្នុងការផ្តល់សេវាប្រកបដោយប្រសិទ្ធភាព ជំរុញឱ្យមានតម្លាភាព និងគណនេយ្យភាព និងរៀបចំអនុវត្តយុទ្ធសាស្ត្រអភិវឌ្ឍសមត្ថភាពឱ្យបានទូលំទូលាយ ដោយឈរលើគោលការណ៍ស្មោះត្រង់ និងយុត្តិធម៌ ធានានូវប្រសិទ្ធភាព នៃសេវាសាធារណ:ឱ្យកាន់តែប្រសើរឡើងថែមទៀត។ លោក បន្តថា កន្លងមកមានប្រជាពលរដ្ឋមួយចំនួន មានបញ្ហាឈ្លោះទាស់ទែងគ្នា ហើយបង្កជាហិង្សាមិនចេះចប់មិនចេះហើយ ហេតុនេះការផ្សព្វផ្សាយច្បាប់នាពេលនេះ វាមានសារ:សំខាន់ខ្លាំងណាស់ សម្រាប់ប្រជាពលរដ្ឋទូទៅនៅក្នុងខេត្ត ព្រោះធ្វើឡើងក្នុងគោលបំណង ដើម្បីបង្កើនការយល់ដឹងអំពីច្បាប់ និងកាត់បន្ថយភាពក្រីក្រ ដើម្បីចូលរួមចំណែកក្នុងការលើកកម្ពស់សន្តិសុខ សុវត្ថិភាព និងសុខុមាលភាពសង្គម ព្រមទាំងធ្វើឲ្យជីវភាពរស់នៅរបស់ប្រជាពលរដ្ឋក្នុងសហគមន៍ឲ្យបានល្អប្រសើរថែមទៀត។

លោកលឹម ភក្តី បានស្នើសុំដល់អាជ្ញាធរភូមិ ឃុំ និងអង្គភាពពាក់ព័ន្ធទាំងអស់ មេត្តាជួយរកដំណោះស្រាយជូនដល់បងប្អូនប្រជាពលរដ្ឋ នៅពេលដែលពួកគាត់មានបញ្ហាកើតឡើងក្នុងគ្រួសារក្តី ឬក៏ជាមួយអ្នកដទៃក្តី ត្រូវរកដំណោះស្រាយជូនពួកគាត់ឱ្យបានទាន់ពេលវេលា ដោយមិនចាំបាច់ទៅប្តឹងឯណេះ ទៅប្តឹងឯណោះទេ ព្រោះថា វានឹងធ្វើឲ្យខាតទាំងពេលវេលា និងខាតបង់ទាំងលុយកាក់ថែមទៀត សំដៅជួយដល់ការលំបាកដល់ជីវភាពប្រជាពលរដ្ឋ៕