អាជ្ញាធរខេត្តសៀមរាប បង្ហាញការងាររយ:ពេល ៦ខែឆ្នាំ២០២២ ពីការិយាល័យប្រជាពលរដ្ឋ រាជធានី ខេត្ត

សាលាខេត្តសៀមរាប នៅព្រឹកថ្ងៃទី០១ ខែកក្កដា ឆ្នាំ២០២២នេះ មានកិច្ចប្រជុំឆ្លុះបញ្ចាំង ស្តីពី ការអនុវត្តការងាររយ:ពេល ៦ខែដើមឆ្នាំ២០២២ របស់ការិយាល័យប្រជាពលរដ្ឋ នៃរាជធានី ដើម្បី ជាតិបំពេញការងារប្រកបដោយគណនេយ្យភាព តម្លាភាព និងឆ្លើយតប ក្នុងការផ្តល់សេវាសាធារណ:សម្រាប់ការអភិវឌ្ឍមូលដ្ឋាន ដើម្បីរួមចំណែកអភិវឌ្ឍន៍សង្គម និងសេដ្ឋកិច្ចជាតិប្រកបដោយចីរភាព។

1

លោក នាក់ ណេរ៉ុន អភិបាលរងខេត្ត បានគូសបញ្ជាក់ថា ចាប់តាំងពីការអនុវត្តនូវកម្មវិធីកំណែទម្រង់វិមជ្ឈការ និងវិសហមជ្ឈការមក រាជរដ្ឋាភិបាលកម្ពុជា បានដាក់ចេញជាបន្តបន្ទាប់នូវការងារកំណែទម្រង់ធំៗជាច្រើនដល់រដ្ឋបាលថ្នាក់ក្រោមជាតិ តួយ៉ាងតាមរយ:កាលបន្តពង្រឹង និងអភិវឌ្ឍន៍ធនធានមនុស្ស ការផ្ទេរមុខងារ ធនធានថវិកា និងទ្រព្យសម្បត្តិ សំដៅធានាឲ្យរដ្ឋបាលគ្រប់ថ្នាក់នៅថ្នាក់ក្រោមជាតិបំពេញការងារប្រកបដោយគណនេយ្យភាព តម្លាភាព និងឆ្លើយតប ក្នុងការផ្តល់សេវាសាធារណ:សម្រាប់ការអភិវឌ្ឍមូលដ្ឋាន ដើម្បីរួមចំណែកអភិវឌ្ឍន៍សង្គមឲ្យមានការរីកចំរើន។ សមិទ្ធផលនៃកំណែទម្រង់ខាងលើនេះ បានលើកកម្ពស់នូវគុណភាពសេវា និងបានលើកទឹកចិត្ត ឲ្យមន្រ្តីរាជការនៅរដ្ឋបាលថ្នាក់ក្រោមជាតិ បន្តកិច្ចខិតខំប្រឹងប្រែងបោះជំហានកាន់តែស៊ីជម្រៅថែមទៀត ក្នុងការផ្តល់សេវាជូនប្រជាពលរដ្ឋឱ្យកាន់តែមានប្រសិទ្ធភាព និងប្រសិទ្ធផល ឆ្លើយតបទៅនឹងគោលការណ៍អភិបាលកិច្ចល្អ។

មានប្រសាសន៍នោះដែរ ឯកឧត្តម ប្រាក់ សំអឿន ក៏បានលើកពីគោលបំណងនៃកិច្ចប្រជុំ គឺដើមី្បពង្រឹងប្រសិទ្ធភាពនៃការអនុវត្តតួនាទី ភារកិច្ចរបស់ការិយាល័យប្រជាពលរដ្ឋរាជធានី ខេត្ត និងធ្វើកិច្ចពិភាក្សាគ្នាស៊ីជម្រៅទៅលើបញ្ហាប្រឈមនានា ដែលបានជួបប្រទះ និងលើកពីដំណោះស្រាយ ក្នុងការបំពេញការងាររបស់ការិយាល័យប្រជាពលរដ្ឋ ព្រមទាំងធ្វើការផ្សព្វផ្សាយគោលការណ៍ណែនាំ ស្តីពីដំណើរការវាយតម្លៃ លើការបំពេញការងាររបស់ការិយាល័យប្រជាពលរដ្ឋ រាជធានី ខេត្ត ។

ឯកឧត្តម ក៏បានបញ្ជាក់ផងដែរថា ការបង្កើតការិយាល័យប្រជាពលរដ្ឋ នៅរដ្ឋបាលថ្នាក់ក្រោមជាតិ ក្នុងគោលបំណងលើកកម្ពស់អភិបាលកិច្ចល្អ ក្នុងការផ្តល់សេវា និងការអភិវឌ្ឍសេដ្ឋកិច្ចមូលដ្ឋាន តាមរយ:ការពង្រឹងតួនាទី ភារកិច្ចរដ្ឋបាលថ្នាក់ក្រោមជាតិ លើការទទួល សម្រុះសម្រួលដោះស្រាយពាក្យបណ្តឹងនៅក្រៅប្រព័ន្ធតុលាការ ដែលពាក់ព័ន្ធនឹងការផ្តល់សេវាសាធារណ: និង ការគ្រប់គ្រងរដ្ឋបាលនៅថ្នាក់ក្រោមជាតិ ប្រកបដោយតម្លាភាព គណនេយ្យភាព និងប្រសិទ្ធភាព សំដៅបង្កើនជំនឿទុកចិត្តពីប្រជាពលរដ្ឋនៅមូលដ្ឋាន។ ឯកឧត្តម អគ្គនាយក បានបញ្ជាក់ថា កិច្ចប្រជុំឆ្លុះបញ្ចាំង ស្តីពីលទ្ធផលការអនុវត្តការងារប្រចាំឆមាសទី១ ឆ្នាំ២០២២ របស់ការិយាល័យប្រជាពល រដ្ឋរាជធានី ខេត្ត គឺជាសកម្មភាពមួយដែលឆ្លើយតបទៅនឹងការអនុវត្តផែនការ សកម្មភាពប្រចាំឆ្នាំ២០២២ របស់នាយកដ្ឋានមុខងារ និងធនធាន ក្រោមកិច្ចប្រតិបត្តិការជាមួយអង្គការតម្លាភាពកម្ពុជា។ ក្នុងនោះដែរឯកឧត្តម ក៏បានលើកសំណួរចំនួន៤ មកធ្វើកិច្ចពិភាក្សា ព្រមទាំងសូមឲ្យសមាជិកកិច្ចប្រជុំទាំងមូល ចូលរួមមតិលើកជាយោបល់លើការងារអនុវត្តនៅតាមមូលដ្ឋានរបស់ខ្លួន ព្រមទាំងបានលើកនូវសូចនាករសំខាន់ៗមួយចំនួន ដែលពាក់ព័ន្ធទៅនឹងការបំពេញតួនាទី ភារកិច្ចរបស់ការិយាល័យប្រជាពលរដ្ឋរាជធានី ខេត្ត ។

ក្នុងកិច្ចពិភាក្សានោះដែរ កិច្ចប្រជុំបានទទួលនូវចំណុចល្អៗ និងបញ្ហាប្រឈមមួយចំនួន ដែលធាតុរួមបញ្ចូលមួយសម្រាប់ឱ្យការិយាល័យប្រជាពលរដ្ឋរាជធានី ខេត្ត យកទៅអនុវត្តនៅឆមាសទី២បន្ត ឲ្យទទួលបានលទ្ធផលល្អ ក្នុងការប្រឡងប្រណាំងយកជ័យលាភីប្រចាំឆ្នាំទៀតផង ៕