ប្រធានាធិបតីបារាំង នឹងធ្វើដំណើរទស្សនកិច្ចទៅកាន់ប្រទេសចិន ក្នុងសប្ដាហ៍នេះ ដែលជាដំណើរទស្សនកិច្ចផ្លូវរដ្ឋលើកទី៤

ប៉ារីស៖ បើតាមការចេញផ្សាយដោយទីភ្នាក់ងារសារព័ត៌មាន Reuters ប្រធានាធិបតីបារាំង លោក Emmanuel Macron នឹងធ្វើដំណើរទស្សនកិច្ចទៅកាន់ប្រទេសចិន ក្នុងសប្ដាហ៍នេះដែលជាដំណើរទស្សនកិច្ចផ្លូវរដ្ឋលើកទី៤របស់លោក ខណៈ អឺរ៉ុបកំពុងព្យាយាមរក្សាតុល្យភាពសេដ្ឋកិច្ច និងទំនាក់ទំនងជាមួយមហាអំណាចសេដ្ឋកិច្ចលេខទី២របស់ពិភពលោកដែលជាគូប្រជែងផង និងជាដៃគូផង ក្នុងគ្រាមួយនៃភាពចលាចលពាណិជ្ជកម្មសកល។

ក្រុមអ្នកវិភាគបាននិយាយថាលោក Macron កន្លងមកបានព្យាយាមបង្ហាញពីភាពខ្លាំងរបស់អឺរ៉ុបប្រឈមមុខនឹងចិន ហើយប្រុងប្រយ័ត្នកុំធ្វើឱ្យទីក្រុងប៉េកាំងខឹងសម្បា។

លោក Macron ដែលនឹងត្រូវចាប់ផ្ដើមបំពេញទស្សនកិច្ចរបស់លោកទៅកាន់ទីក្រុងប៉េកាំង នៅថ្ងៃពុធសប្ដាហ៍នេះ នឹងត្រូវជួបប្រធានាធិបតីចិន លោក ស៊ី ជីនពីង នៅថ្ងៃព្រហស្បតិ៍ ក្នុងរដ្ឋធានីប៉េកាំង ហើយ នៅថ្ងៃសុក្រសប្ដាហ៍នេះលោកប្រធានាធិបតីបារាំងនឹងធ្វើដំណើរទៅកាន់ទីក្រុង Chengdu នៃខេត្ត Sichuan។

ដំណើរទស្សនកិច្ចរបស់លោក Macron ធ្វើឡើងបន្ទាប់ពីប្រធានគណៈកម្មការអឺរ៉ុប លោកស្រី Ursula von der Leyen បានធ្វើទស្សនកិច្ចទៅកាន់ទីក្រុងប៉េកាំង កាលពីខែកក្កដា កន្លងទៅ ជាពេលដែលលោកស្រីបាននិយាយថាទំនាក់ទំនងរវាងសហភាពអឺរ៉ុប និងចិនកំពុងស្ថិតក្នុងការផ្លាស់ប្ដូរគួរឱ្យកត់សម្គាល់។ ក្រៅពីលោក Macron នាយករដ្ឋមន្ត្រីអង់គ្លេស លោក Keir Starmer និងអធិការបតីអាល្លឺម៉ង់ លោក Friedrich Merz ក៏គ្រោងនឹងធ្វើទស្សនកិច្ចទៅកាន់ប្រទេសចិននៅដើមឆ្នាំក្រោយផងដែរ៕