ភ្នំពេញ៖ អណ្ដើកសមុទ្ទ (ល្មិច) ចំនួន២ក្បាល ដែលកម្លាំងខណ្ឌរដ្ឋបាលជលផលខេត្តកែប ទទួលបានពីបងប្អូនប្រជានេសាទរស់នៅកោះពោធិ៍ ស្ថិតក្នុងទឹកដីខេត្តកែប ត្រូវបានមន្រ្តីរដ្ឋបាលជលផលដោះលែងចូលទៅក្នុងសមុទ្ទវិញ ដើម្បីចូលរួមអភិរក្សធនធានសមុទ្ទដ៏កម្រមួយនេះ។
សត្វកម្រទាំង២ត្រូវបានលែងចូលសមុទ្ទ ក្រោមអធិបតីភាព ឯកឧត្ដមឧបនាយករដ្ឋមន្រ្តី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកែប កាលពីរសៀលថ្ងៃទី១៨ ខែវិច្ឆិកា ឆ្នាំ ២០២៥ ។
មន្រ្តីខណ្ឌរដ្ឋបាលជលផល នៃមន្ទីរកសិកម្មខេត្តកែប បានឱ្យដឹងថា អណ្ដើកសមុទ្ទ ជាប្រភេទសត្វកម្រ សុទ្ធតែត្រូវបានកឹបស្លាកលេខមុនត្រូវបានលែង។ អណ្តើកសមុទ្ទទី១ ភេទញី មានទម្ងន់៦០គីឡូក្រាម និងមានបណ្ដោយប្រវែង៧១សង់ទីម៉ែត្រ ទទឹងប្រវែង៣៨សង់ទីម៉ែត្រ បានកឹបស្លាកលេខ KH 2088 និងអណ្ដើកសមុទ្ទទី២ ភេទឈ្មោល ទម្ងន់១៤គីឡួក្រាម មានបណ្ដោយប្រវែង៥១សង់ទីម៉ែត្រ ទទឹងប្រវែង៤៨សង់ទីម៉ែត្រ បានកឹបស្លាកលេខ KH 2089។
សូមជម្រាបថា មួយរយ:ចុងក្រោយនេះ បងប្អូនប្រជានេសាទតែងប្រទះ និងចាប់បានដោយចៃដន្យនូវពពួកសត្វសមុទ្ទកម្រៗច្រើនប្រភេទ ហើយពួកគាត់បានស្ម័គ្រចិត្តប្រគល់ជូនកម្លាំងជំនាញដើម្បីដោះលែងចូលក្នុងសមុទ្ទវិញ។ កាយវិការនេះ សបញ្ជាក់ពីការយល់ដឹងរបស់ប្រជានេសាទ ជាពិសេស ប្រជានេសាទនៅក្នុងខេត្តកែបផ្ទាល់ ក្នុងការចូលរួមអភិរក្សធនធានសមុទ្ទកម្រជាមួយអាជ្ញាធរ៕
