១០ខែ អង្គភាពស៉ីម៉ាក់បានបោសសម្អាតផ្ទៃដីចម្ការមីន និងសំណល់ជាតិផ្ទុះពីសង្គ្រាមបានទំហំ ១៤ ៣៩៧ ហិកតា
ភ្នំពេញ៖ ឯកឧត្ដម ហេង រតនា ជាប្រតិភូរាជរដ្ឋាភិបាល ទទួលបន្ទុកជាអគ្គនាយកមជ្ឈមណ្ឌលកម្ចាត់មីនកម្ពុជា (ស៊ីម៉ាក់) នៅថ្ងៃទី១៥ ខែវិច្ឆិកា ឆ្នាំ២០២៥នេះ បានឱ្យដឹងថា ក្នុងរយៈពេល១០ខែ គិតចាប់ពីខែ មករា ដល់ខែតុលា ឆ្នាំ២០២៥ អង្គភាពស៉ីម៉ាក់បានបោសសម្អាតផ្ទៃដីចម្ការមីន និងសំណល់ជាតិផ្ទុះពីសង្គ្រាមបានទំហំ ១៤ ៣៩៧ ហិកតា និងរកឃើញគ្រាប់មីន និងគ្រាប់យុទ្ធភណ្ឌមិនទាន់ផ្ទុះ សរុបចំនួន ៤៣ ៩១៦ គ្រាប់។
ឯកឧត្ដម ហេង រតនា បានបញ្ជាក់ថា ប្រតិបត្តិការបោសសម្អាតមីន និងសំណល់យុទ្ធភណ្ឌសង្គ្រាម ក្នុងរយៈពេល ១០ខែ (មករា-តុលា) ឆ្នាំ២០២៥ របស់អង្គភាព CMAC សម្រេចបាននូវសមិទ្ធិផលសំខាន់ៗមួយចំនួនដូចខាងក្រោម៖
ទី១៖ លទ្ធផលសម្រេចបានលើផែនការប្រតិបត្តិការទូទៅ៖ បោសសម្អាតផ្ទៃដីចម្ការមីនបានទំហំ ១៤ ៣៩៧ ហិកតា, រកឃើញគ្រាប់មីន និងគ្រាប់យុទ្ធភណ្ឌមិនទាន់ផ្ទុះសរុបចំនួន ៤៣ ៩១៦ គ្រាប់។ លទ្ធផលអប់រំការយល់ដឹងពីគ្រោះថ្នាក់ដោយសារគ្រាប់មីន/គ្រាប់ មិនទាន់ផ្ទុ ះដោយបើកវគ្គអប់រំបានចំនួន ២១ ៧៨៨លើក អប់រំតាមខ្នងផ្ទះបានចំនួន ១ ០៥២ ៤៣៨ ខ្នងផ្ទះ និងមានអ្នកចូលរួមទទួលព័ត៌មានអប់រំសរុបចំនួន ២ ២២០ ៩៥០នាក់។
ទី២៖ ដោយឡែកលទ្ធផលសង្ខេបនៅតំបន់រងផលប៉ះពាល់ ដោយសារសង្រ្គាមសៀមឈ្លានពាន នៃទិសខេត្តឧត្តរមានជ័យ និងខេត្តព្រះវិហារមានដូចខាងក្រោម៖
-លទ្ធផលការងារអប់រំការយល់ដឹងពីគ្រោះថ្នាក់ ដោយសារសំណល់យុទ្ធភណ្ឌសង្គ្រាម (ជនភៀសឹក) បើកវគ្គផ្សព្វផ្សាយអប់រំជាង ២៣០ លើក និងអ្នកចូលរួមស្តាប់មានចំនួនជិត ៤០០,០០០នាក់។
-លទ្ធផលការងារស្រាវជ្រាវ និងដាក់ស្លាកសញ្ញា៖ បានចុះស្រាវជ្រាវបញ្ចប់ភូមិគោលដៅចំនួន ៦៦ភូមិលើ៧៧ ភូមិ ដែលរងផលប៉ះពាល់ (ភូមិនៅជួរមុខចំនួន ១១ទៀត បានស្រាវជ្រាវផ្នែកខ្លះៗ និងកំពុងស្រាវជ្រាវបន្ត)។ សរុបរកឃើញទីតាំងភស្តុតាងចំនួន ៣ ៥៨៦ករណី (ជាគ្រាប់ ឬទីតាំង ) និងរកឃើញតំបន់ចម្ការគ្រាប់ចំនួន ១ ៧៥៤ ពហុកោណ (ប្លង់) ស្មើនឹងផ្ទៃដីទំហំសរុបចំនួន ១ ០៩៣គីឡូម៉ែត្រក្រឡា៕
