យោធាកូរ៉េខាងត្បូង៖ កូរ៉េខាងជើងបានបាញ់រ៉ុក្កែតផ្លោងជាច្រើនគ្រាប់ មួយម៉ោងមុនពេល រដ្ឋមន្រ្តីការពារជាតិអាមេរិកបំពេញទស្សនកិច្ចទៅកាន់តំបន់ព្រំដែនអន្តរកូរ៉េ

ព្យុងយ៉ាង៖ បើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអង្គារនេះ យោធាកូរ៉េខាងត្បូង បានឱ្យដឹងថា កូរ៉េខាងជើងបានបាញ់រ៉ុក្កែតផ្លោងជាច្រើនគ្រាប់ មួយម៉ោងមុនពេល រដ្ឋមន្រ្តីការពារជាតិអាមេរិក លោក Pete Hegseth បានបំពេញទស្សនកិច្ចទៅកាន់តំបន់ព្រំដែនអន្តរកូរ៉េ កាលពីថ្ងៃចន្ទ អំឡុងទស្សនកិច្ចនៅក្នុង ប្រទេសកូរ៉េខាងត្បូង។

យោធាកូរ៉េខាងត្បូង បានប្រាប់ថា ទីក្រុងព្យុងយ៉ាង ក៏បានបាញ់អាវុធស្រដៀងគ្នា ត្រឹមប៉ុន្មាននាទីមុនពេល ប្រធានាធិបតីកូរ៉េខាងត្បូង លោក Lee Jae Myung បានបើកកិច្ចពិភាក្សាជាមួយ ប្រធានាធិបតីចិន លោក ស៉ី ជីនពីង កាលពីចុងសប្តាហ៍មុនផងដែរ។

សរុបមក យោធាកូរ៉េខាងត្បូងអះអាងថា ប្រទះឃើញសញ្ញានៃការបាញ់រ៉ុក្កែតផ្លោងចំនួនប្រហែល១០គ្រាប់ ចូលទៅផ្នែកខាងជើងនៃសមុទ្រខាងលិច កាលពីខ្ទង់ម៉ោង៣រសៀលថ្ងៃសៅរ៍ និងខ្ទង់ម៉ោង៤រសៀលថ្ងៃចន្ទ។

គួរបញ្ជាក់ថា ទស្សនកិច្ចរបស់លោក Hegseth នៅកូរ៉េខាងត្បូង គឺបន្ទាប់ពីប្រធានាធិបតីអាមេរិក លោក ដូណាល់ ត្រាំ បានបំពេញ ទស្សនកិច្ចមកកាន់តំបន់អាស៉ី រួមមានទាំងនៅកូរ៉េខាងត្បូង កាលពីសប្តាហ៍មុន ហើយបានបង្ហាញបំណងចង់ជួបមេដឹកនាំកូរ៉េខាងជើង លោក គីម ជុងអ៊ុន ប៉ុន្តែមិនទទួលបានការឆ្លើយតបជាសាធារណៈពីទីក្រុងព្យុងយ៉ាង។ ទោះជាបែបនេះក្តី លោក ត្រាំ បាននិយាយថា រូបលោកនៅតែមានឆន្ទៈវិលត្រឡប់មកវិញ សម្រាប់ជំនួបនាពេលអនាគត ជាមួយលោក គីម៕