វ៉ាស៊ីនតោន៖ បើតាមការចេញផ្សាយដោយទីភ្នាក់ងារសារព័ត៌មាន Reuters ក្រសួងយុត្តិធម៌អាមេរិក បានឱ្យដឹងនៅថ្ងៃទី២៥ ខែកញ្ញាថា ខ្លួនបានចោទប្រកាន់អតីតនាយក FBI លោក James Comey ពីបទល្មើសព្រហ្មទណ្ឌ ពាក់ព័ន្ធនឹងការធ្វើសេចក្ដីថ្លែងការណ៍ក្លែងក្លាយកុហកសភា និងបង្កឧបសគ្គដល់ការស្វែងរកយុត្តិធម៌ ខណៈប្រធានាធិបតីអាមេរិក លោក ដូណាល់ ត្រាំ កំពុងបង្កើនការធ្វើយុទ្ធនាការ សងសឹកអ្នកដែលបានស៊ើបអង្កេត ឬរិះគន់រូបលោក។
តាមរយៈបទចោទខាងលើ ប្រសិនបើលោក James Comey ត្រូវបានរកឃើញថាមានពិរុទ្ធភាពពិតមែន នោះលោកអាចនឹងត្រូវជាប់ពន្ធនាគារ៥ឆ្នាំ។ ការចោទប្រកាន់ប្រឆាំងលោក Comey ពីបទធ្វើសេចក្ដីថ្លែងការណ៍ក្លែងក្លាយ និងបង្កឧបសគ្គដល់ការស្វែងរកយុត្តិធម៌ ធ្វើឡើងតែប៉ុន្មានថ្ងៃប៉ុណ្ណោះបន្ទាប់ពីលោក ត្រាំ បានជំរុញជាសាធារណៈឱ្យនាយក FBI លោកស្រី Pam Bondi ចោទប្រកាន់លោក Comey និងមនុស្សជាច្រើននាក់ទៀត។
នៅក្នុងការបង្ហោះលើបណ្ដាញទំនាក់ទំនងសង្គម X ដោយមិននិយាយពីឈ្មោះ Comey លោកស្រី Bondi បានលើកឡើងថា «គ្មាននរណាម្នាក់អង្គុយលើច្បាប់នោះទេ?ហើយការចោទប្រកាន់នៅថ្ងៃនេះបានឆ្លុះបញ្ចាំងពីការប្ដេជ្ញាចិត្តរបស់ក្រសួងយុត្តិធម៌អាមេរិក ក្នុងការនាំ អ្នកដែលរំលោភអំណាច ឬតួនាទីរបស់ខ្លួនដោយនិយាយកុហកបោកប្រាសប្រជាជនអាមេរិកឱ្យទទួលខុសត្រូវចំពោះមុខច្បាប់»។
គួរបញ្ជាក់ថា លោក ត្រាំ បានបណ្ដេញលោក James Comey ចេញពីតំណែងកាលពីឆ្នាំ២០១៧ អំឡុងកាន់តំណែងជាប្រធានាធិបតីអាមេរិកកាលពីអាណត្តិទី១។
ចាប់តាំងពីពេល នោះមក លោក ត្រាំ បានរិះគន់លោក Comey ជារឿយៗជុំវិញការស៊ើបអង្កេតរបស់ FBI ក្នុងសំណុំរឿងដែលគេចោទប្រកាន់ថារុស្ស៉ីបានលូកលាន់ក្នុងកិច្ចការបោះឆ្នោត ប្រធានាធិបតីអាមេរិកកាលពីឆ្នាំ២០១៦ ដើម្បីជួយឱ្យលោក ត្រាំ ទទួលបានជ័យជម្នះ។ ប៉ុន្តែ ក្រោយត្រូវបានចោទប្រកាន់កាលពីថ្ងៃព្រហស្បតិ៍ អតីតនាយក FBI រូបនេះបានអះអាងថារូបលោកជាជនស្លូតត្រង់មិនបានប្រព្រឹត្តទោសកំហុសដូចការចោទប្រកាន់នោះឡើយ៕
