បទវិភាគ៖ចិនផ្តួចផ្តើមឱ្យដើរតាមមាគ៌ាដ៏ត្រឹមត្រូវ សម្របទៅតាមនិន្នាការទូទៅនៃយុគសម័យនិងទទួលបានការគាំទ្រពីប្រជាជន
បើមើលពីការផ្សាយដំណឹងនៃប្រព័ន្ធផ្សព្វផ្សាយអន្តរជាតិក្នុងរយៈពេលជិតកន្លះខែមកអាចឃើញថា ”គំនិតផ្តួចផ្តើមអភិបាលកិច្ចសកល”គឺជាពាក្យពេញនិយមប្រើប្រាស់លើផ្ទៃអន្តរជាតិ ។ យោងតាមការវិភាគខាងទិន្នន័យធំបង្ហាញឱ្យឃើញថា ចាប់តាំងពីលោក Xi Jinping ប្រធានរដ្ឋចិនបានលើកឡើងគំនិតផ្តួចផ្តើមមួយនេះនៅក្នុងកិច្ចប្រជុំកំពូលនៃអង្គការសហប្រតិបត្តិការសៀងហៃក្រុង Tianjin កាលពីថ្ងៃទី ១ ខែកញ្ញា មក បរិមាណស្វែងរកពាក្យគន្លឹះពាក់ព័ន្ធតាមបណ្តាញអ៊ីនធឺណេតបានឡើងដល់កម្រិតកំពូលនៅថ្ងៃបន្ទាប់ ហើយបន្ទាប់មក ក៏បន្តទទួលការយកចិត្តទុកដាក់យ៉ាងខ្លាំងដែរ ។
តើមានមូលហេតុអ្វីខ្លះនៅពីក្រោយភាពអ៊ូអរសកលបែបនេះ ? យើងអាចសង្កេតមើលពីវិស័យចំនួន ៣ ដូចខាងក្រោម៖
វិស័យទីមួយ គឺ ចំពេលដ៏សមរម្យ។
បច្ចុប្បន្ននេះ បម្រែបម្រួលនិម្មាបនកម្មពិភពលោកដែលពុំធ្លាប់មានក្នុងមួយសតវត្សរ៍កំពុងវិវត្តយ៉ាងលឿន ប្រទេសមួយចំនួនតូចបាននិងកំពុងអនុវត្តអនុត្តរភាពនិយមនិងគាំពារនិយមដែលបានប៉ះពាល់យ៉ាងធ្ងន់ធ្ងរដល់សណ្តាប់ធ្នាប់អភិបាលកិច្ចអន្តរជាតិដែលបានកកើតឡើងស្របពេលនឹងការបង្កើតឡើងនៃអង្គការសហប្រជាជាតិបន្ទាប់ពីសង្គ្រាមលោកលើកទីពីរ ។
បើមើលពីទស្សនៈគន្លឹះនៃគំនិតផ្តួចផ្តើមអភិបាលកិច្ចសកលអាចឃើញថា វាផ្តោតលើទិសដៅដំណោះស្រាយបញ្ហា ។ ឧទាហរណ៍ដូចជា គំនិតផ្តួចផ្តើមនេះចាត់ទុក”ការប្រកាន់ខ្ជាប់សមភាពនៃអធិបតេយ្យភាព”ជាបុរេលក្ខខណ្ឌដ៏សំខាន់បំផុតដោយសង្កត់ធ្ងន់ថា បណ្តាប្រទេសនានាមិនថាតូចឬធំ ខ្លាំងឬខ្សោយ ក្រឬមានក៏ដោយ ក៏សុទ្ធតែមានសិទ្ធិស្មើគ្នាក្នុងការចូលរួមកិច្ចការអន្តរជាតិ សង្កត់ធ្ងន់ពី”ការគោរពច្បាប់អន្តរជាតិ”និង”ការអនុវត្តពហុភាគីនិយម” ក៏ដូចជាសង្កត់ធ្ងន់ពី”ការផ្តោតលើទិសដៅប្រតិបត្តិ” ។
វិស័យទីពីរ គឺ សម្របទៅតាមនិន្នាការទូទៅនៃយុគសម័យ។
នាពេលបច្ចុប្បន្ននេះ តុល្យភាពនៃកម្លាំងអន្តរជាតិបាននិងកំពុងកើតមានបម្រែបម្រួលយ៉ាងស៊ីជម្រៅ ។ ប្រទេសទីផ្សារងើបឡើងថ្មីនិងប្រទេសកំពុងអភិវឌ្ឍន៍ជាច្រើនបានងើបឡើងជាក្រុមដែលជាបម្រែបម្រួលដ៏មានលក្ខណៈបដិវត្តន៍ខ្លាំងបំផុតក្នុងចំណោមតុល្យភាពនៃកម្លាំងអន្តរជាតិគិតចាប់ពីចូលសហសម័យមក ។ គំនិតផ្តួចផ្តើមអភិបាលកិច្ចសកលដែលផ្តោតលើទស្សនៈសំខាន់ដូចជា ”ការប្រកាន់ខ្ជាប់នូវសមភាពនៃអធិបតេយ្យភាព” ”គោរពច្បាប់អន្តរជាតិ”និង”អនុវត្តពហុភាគីនិយម”ជាដើមក្នុងគោលបំណងធ្វើឱ្យបណ្តាប្រទេស”សកលខាងត្បូង”បញ្ចេញសំឡេងកាន់តែខ្លាំងក្លា ។ ហេតុនេះហើយ គំនិតផ្តួចផ្តើមនេះទទួលបានការចាប់អារម្មណ៍និងប្រតិកម្មតបខ្លាំងជាពិសេសពីបណ្តាប្រទេស”សកលខាងត្បូង” ។
វិស័យទីបី គឺ ទទួលបានការគាំទ្រពីប្រជាជន។
គំនិតផ្តួចផ្តើមអភិបាលកិច្ចសកល”ផ្តួចផ្តើមឱ្យតម្កល់ទុកប្រជាជនជាចម្បង”ដោយសង្កត់ធ្ងន់ថា ប្រជាជននៃបណ្តាប្រទេសនានាគឺជាអ្នកចូលរួមនិងជាអ្នកទទួលបានផលប្រយោជន៍ជាមូលដ្ឋាននៃអភិបាលកិច្ចសកល ។ ទស្សនៈគុណតម្លៃមួយនេះបានផ្តល់នូវជំនឿចិត្តនិងក្តីរំពឹងទុកដ៏នឹងនរសម្រាប់ប្រជាជននៃបណ្តាប្រទេសនានា ដែលប្រាកដជាទទួលបានការគាំទ្រយ៉ាងទូលំទូលាយជាមិនខានហើយនឹងដំណើរការប្រកបដោយប្រសិទ្ធភាព ។
ក្នុងរយៈពេល ៤ ឆ្នាំកន្លងមកនេះ ប្រទេសចិនបានលើកឡើងគំនិតផ្តួចផ្តើមសកលទាំងបួនដោយឡែកពីគ្នាដោយផ្តោតលើវិស័យចំនួន ៤ ដូចជា ការអភិវឌ្ឍ សន្តិសុខ អរិយធម៌និងអភិបាលកិច្ច ។ នេះបានបំពេញបន្ថែមនូវស្ថិរភាពនិងភាពប្រាកដប្រជាសម្រាប់ពិភពលោកដែលមានភាពរង្គោះរង្គើខ្លាំង ក៏ដូចជាបង្ហាញពីទំនួលខុសត្រូវរបស់ប្រទេសធំ ។ គំនិតផ្តួចផ្តើមទាំងនេះទទួលបានការកោតសរសើរនិងការស្វាគមន៍យ៉ាងទូលំទូលាយដែលបានបញ្ជាក់ពីការពិតជាក់ស្តែងដែលថា ប្រទេសចិនផ្តួចផ្តើមឱ្យដើរតាមមាគ៌ាដ៏ត្រឹមត្រូវ សម្របទៅតាមនិន្នាការទូទៅនៃយុគសម័យនិងទទួលបានការគាំទ្រពីប្រជាជន ។
រំពឹងទុកពីអនាគត មិនថាស្ថានការណ៍អន្តរជាតិមានការប្រែប្រួលយ៉ាងណាក៏ដោយ ក៏ចិននឹងប្រកាន់ខ្ជាប់យ៉ាងមុតមាំនូវការឈរនៅម្ខាងនៃភាពត្រឹមត្រូវនៃប្រវត្តិសាស្ត្រ ធ្វើការជាមួយបណ្តាភាគីនានាដើម្បីរួមគ្នាជំរុញប្រព័ន្ធអភិបាលកិច្ចសកលឱ្យអភិវឌ្ឍទៅរកទិសដៅល្អនិងវិជ្ជមាន ក៏ដូចជាជំរុញការកសាងសហគមន៍រួមវាសនារបស់មនុស្សជាតិ ដើម្បីធ្វើកិច្ចខិតខំប្រឹងប្រែងឥតឈប់ឈរក្នុងការជំរុញបុព្វហេតុដ៏ខ្ពង់ខ្ពស់ស្តីពីសន្តិភាពនិងការអភិវឌ្ឍរបស់មនុស្សជាតិ ៕
