ហ៊្សេរុយសាឡិម៖ បើយោងតាមការចេញផ្សាយដោយទីភ្នាក់ងារសារព័ត៌មាន AFP រដ្ឋមន្រ្តីការពារជាតិអ៉ីស្រាអែល បានប្រាប់ក្រុមហាម៉ាស នៅថ្ងៃទី៨ ខែកញ្ញា ឱ្យទម្លាក់អាវុធចុះ ឬប្រឈមមុខនឹងការកម្ទេច ក្រោយលោកប្រធានាធិបតីអាមេរិក ដូណាល់ ត្រាំ និយាយថា ហាម៉ាសត្រូវតែទទួលយកកិច្ចព្រមព្រៀង ដើម្បីដោះលែងចំណាប់ខ្មាំង។
លោក Israel Katz បានផ្ញើសារតាមបណ្តាសង្គម X យ៉ាងដូច្នេះថា «នេះគឺជាការព្រមានចុងក្រោយ ចំពោះឃាតករហាម៉ាស និងជនរំលោភសេពសន្ថវៈនៅហ្កាហ្សា ក៏ដូចជាក្នុងសណ្ឋាគារប្រណីតៗនៅបរទេស ឱ្យដោះលែងចំណាប់ខ្មាំង ហើយទម្លាក់អាវុធ បើមិនដូច្នេះទេហ្កាហ្សានឹងត្រូវបំផ្លាញ ហើយក្រុមអ្នកនឹងត្រូវវិនាស»។
គួរបញ្ជាក់ថា សង្រ្គាមនៅក្នុងតំបន់ហ្កាហ្សា ផ្តើមចេញពីការវាយឆ្មក់របស់ក្រុមហាម៉ាស ចូលទឹកដីអ៉ីស្រាអែល កាលពីខែតុលា ឆ្នាំ ២០២៣។ អ៉ីស្រាអែល បាន បង្កើនប្រតិបត្តិ ការរបស់ខ្លួន ដោយវាយប្រហារលើ អគារ ខ្ពស់ៗ ក្នុង ទីក្រុង Gaza ជាមួយការ ប្តេជ្ញា ថា នឹងចាប់យកបានទោះ ជាមានសម្ពាធពី អន្តរជាតិ ឱ្យបញ្ឈប់សង្គ្រាមក៏ដោយ៕
