លោក ហ្សេលេនស្គីថា ជិត៦០ភាគរយនៃអាវុធដែលកងទ័ពអ៊ុយក្រែនកំពុងប្រើប្រាស់គឺជាអាវុធផលិតនៅក្នុងស្រុក

កៀវ៖ លោក វ៉ូឡួឌីមៀ ហ្សេលេនស្គី ប្រធានាធិបតីអ៊ុយក្រែន កាលពីថ្ងៃសៅរ៍ ទី៦ ខែកញ្ញា បាននិយាយថាជិត៦០ភាគរយនៃអាវុធដែលកងទ័ពអ៊ុយក្រែនកំពុងប្រើប្រាស់គឺជាអាវុធផលិតនៅក្នុងស្រុក ដែលអត្រានេះខ្ពស់ជាងគោលដៅដែលលោកបានកំណត់កាលពីជាង២ខែមុន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅក្នុងសុន្ទរកថាវីដេអូមួយកាលពីយប់ថ្ងៃសៅរ៍ លោក ហ្សេលេនស្គី បានបញ្ជាក់ថា «អំឡុងសង្រ្គាមនេះ អ៊ុយក្រែនបានឈានដល់ចំណុចមួយដែលជិត៦០ភាគរយនៃអាវុធដែលយើងមាន និងទាហាន របស់យើងកំពុងប្រើ គឺជាអាវុធផលិតដោយអ៊ុយក្រែន ហើយជាអាវុធដ៏មានថាមពល និងបំពាក់ដោយបច្ចេកវិទ្យាទំនើបៗ»។

លោក ហ្សេលេនស្គី និងក្រុមមន្ត្រីអ៊ុយក្រែនបានសង្កត់ធ្ងន់ជាយូរមកហើយពីការជំរុញឧស្សាហកម្មផលិតអាវុធនៅក្នុងស្រុក ជាធាតុផ្សំមួយដ៏សំខាន់ដើម្បីអនាគតយោធារបស់អ៊ុយក្រែន។ ក្នុងសុន្ទរកថានោះ មេដឹកនាំអ៊ុយក្រែនក៏បានបង្ហើបដែរថាគម្រោងរួមមួយកំពុងធ្វើឡើងដើម្បីអាវុធនៅក្នុងប្រទេសដាណឺម៉ាក។

គួរបញ្ជាក់ថា កាលពីខែកក្កដាកន្លងទៅ លោក ហ្សេលេនស្គី បានឱ្យអំពាវនាវឱ្យរដ្ឋាភិបាលរបស់លោកដាក់ចេញវិធានការជំរុញការផលិតអាវុធនៅក្នុងស្រុកឱ្យដល់ ៥០ភាគរយ ជាពិសេសគឺផ្តោតលើ ការផលិតដ្រូន និងប្រព័ន្ធការពារដែនអាកាសទប់ទល់នឹងការវាយប្រហារដោយមីស៊ីល និងដ្រូនរបស់រុស្ស៉ី៕