ភ្នំពេញ÷ឯកឧត្តម ឈាង វុន ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា នាព្រឹកថ្ងៃទី៤ ខែកញ្ញា ឆ្នាំ២០២៥ បានដឹកនាំកិច្ចប្រជុំ នៅវិមានរដ្ឋសភា ដើម្បីបញ្ចប់ការងារពិនិត្យខ្លឹមសាររបស់ គណៈកម្មាធិការសេដ្ឋកិច្ច (Committee on Economic Matters) នៃមហាសនិ្នបាតអន្តរសភាអាស៊ាន (AIPA) លើកទី៤៦។
គណៈកម្មាធិការសេដ្ឋកិច្ច AIPA គឺជាគណៈកម្មាធិការមួយនៅក្នុងមហាសន្និបាតអន្តរសភាអាស៊ាន (AIPA) ដែលប្រជុំពិភាក្សាផ្តោតលើការជំរុញកិច្ចសហប្រតិបត្តិការសភាដើម្បីលើកកម្ពស់កំណើនសេដ្ឋកិច្ចប្រកបដោយនិរន្តរភាព និងបរិយាប័ន្ន សមាហរណកម្មសេដ្ឋកិច្ចឌីជីថល និងការអភិវឌ្ឍសមត្ថភាពរបស់សហគ្រាសធុនមីក្រូ តូចនិងមធ្យម (MSMEs) ដើម្បីដោះស្រាយបញ្ហាប្រឈមក្នុងតំបន់ដូចជាការងើបឡើងវិញសេដ្ឋកិច្ចនិងការគំរាមកំហែងតាមអ៊ីនធឺណិតឆ្លងដែន។
សូមបញ្ជាក់ថា មហាសន្និបាតអន្តរសភាអាស៊ានលើកទី៤៦ នឹងប្រារព្ធធ្វើឡើងនៅប្រទេសម៉ាឡេស៊ី ចាប់ពីថ្ងៃទី១៦ ដល់ថ្ងៃទី២២ ខែកញ្ញា ឆ្នាំ២០២៥។ គណៈប្រតិភូជាន់ខ្ពស់សភាកម្ពុជា ដែលនឹងត្រូវចូលរួមមហាសន្និបាតនេះ ដឹកនាំដោយសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា៕
