ប្រកាសដាក់ឱ្យដំណើរការជាផ្លូវការ ការិយាល័យតំណាងអាជ្ញាធរជាតិដោះស្រាយវិវាទក្រៅប្រព័ន្ធតុលាការប្រចាំខេត្តចំនួន៤ នៅភូមិភាគឦសាន

ភ្នំពេញ៖ ពិធីនេះត្រូវបានប្រារព្ធធ្វើឡើងនៅទីតាំការិយាល័យតំណាងអាជ្ញាធរជាតិដោះស្រាយវិវាទក្រៅប្រព័ន្ធតុលាការប្រចាំខេត្តរតនគិរី ស្ថិតនៅ ជិតវិមានឯករាជ្យ ក្នុងសង្កាត់ឡាបានសៀក ក្រុងបានលុង នាព្រឹកថ្ងៃទី១៥ ខែសីហា ឆ្នាំ២០២៥ ក្រោមអធិបតីភាពឯកឧត្តមបណ្ឌិត ជិន ម៉ាលីន អនុប្រធានប្រចាំការនៃ អ.ជ.ក និងជាតំណាងដ៏ខ្ពង់ខ្ពស់ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធាន អ.ជ.ក។

ឯកឧត្តម ញ៉ែម សំអឿន អភិបាលខេត្តរតនគិរី តំណាងអោយខេត្តទាំង៤ នៅភូមិភាគឦសាន ដែលរួមមាន ខេត្តរតនគិរី ខេត្តមណ្ឌលគិរី ខេត្តក្រចេះ និងខេត្តស្ទឹងត្រែង បានសម្តែង សេចក្តីសោមនស្សរីករាយជាពន់ពេក និងជាកិត្តិយស ដ៏ឧត្តុង្គឧត្តមក្រៃលែង ដែលខេត្តរតនគិរីមាន ភ័ព្វសំណាងខ្ពស់ ដោយក្រសួងយុត្តិធម៌ កំណត់យកជាទីតាំងខេត្តរតនគិរី ធ្វើជាចំណុចកណ្តាលរវាងខេត្តទាំង៤ ក្នុងភូមិ ភាគឦសាន សម្រាប់ការរៀបចំប្រកាសដាក់ឱ្យដំណើរ
ការការិយាល័យតំណាង អ.ជ.ក ។

ឯកឧត្តមអភិបាលខេត្តរតនគិរី បានបន្តថា ដំណាក់កាលទី១ គោលនយោបាយអាទិភាព០៦ចំណុច និងវិធានគន្លឹះ០៥ចំណុច នៅក្នុងនីតិកាលទី៧ នៃរដ្ឋសភា ដែល មាន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជាប្រមុខដឹកនាំប្រកបដោយ ថាមពល និងភាពប៉ិនប្រសប់ បានយកចិត្តទុកដាក់ខ្ពស់ក្នុងការធ្វើកំណែទម្រង់ឱ្យកាន់តែស៊ីជម្រៅបន្ថែមទៀតលើគ្រប់វិស័យ ជាពិសេស វិស័យយុត្តិធម៌ តាមរយៈក្រសួងយុត្តិធម៌ ។ ជាការកត់សម្គាល់សម្រាប់រយៈពេលថ្មីៗកន្លងទៅនេះ ឯកឧត្តម កើត រិទ្ធិ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានខិតខំរិះរកគ្រប់មធ្យោបាយធ្វើយ៉ាងណាឱ្យការដោះស្រាយវិវាទ ទាំងក្នុង និងក្រៅប្រព័ន្ធតុលាការ ទទួលបាននូវប្រសិទ្ធភាពខ្ពស់ មានការគាំទ្រ និងទទួលបាននូវទំនុកចិត្តពីប្រជាពលរដ្ឋ មកលើវិស័យនេះ ។

ជាក់ស្តែង ដោយមើលឃើញអំពីបញ្ហាប្រឈម ឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានបើកយុទ្ធនាការដោះស្រាយពាក្យបណ្តឹងជុំវិញ ភាពមិនប្រក្រតី ការកកស្ទះនៃសំណុំរឿងនៅតាមសាលាជម្រះក្តីគ្រប់ ជាន់ថ្នាក់ គឺជាសក្ខីភាពមួយឆ្លុះបញ្ចាំងពីការទទួលខុសត្រូវខ្ពស់ក្នុងការរកភាពយុត្តិធម៌ជូនគូភាគី និងជាការបំពេញមុខងារ ជាកាតព្វកិច្ចក្នុងការផ្តល់សេវាសាធារណៈជូនមុខប្រជាពលរដ្ឋក្នុងនាមម្ចាស់ឆ្នោត ។ដូច្នេះដើម្បីបង្ខិតសេវាឱ្យកាន់តែ កៀកជិតប្រជាពលរដ្ឋ និងដើម្បីជួយរំលែកការលំបាករបស់តុលាការ ក្រសួងយុត្តិធម៌ ក៏បានបង្កើតច្រកថ្មីមួយទៀត ដើរទន្ទឹមគ្នាជាមួយយន្តការដែលមានស្រាប់ គឺអាជ្ញាធរជាតិដោះស្រាយវិវាទ ក្រៅប្រព័ន្ធតុលាការ ដែលហៅកាត់ថា អ.ជ.ក ជាផ្នែកមួយដែលជួយសម្របសម្រួលដោះស្រាយករណីវិវាទរឿងរដ្ឋប្បវេណី (មិនមែនព្រហ្មទណ្ឌ) ក្នុងន័យជួយបង្កើនប្រសិទ្ធភាព ស័ក្តិសិទ្ធិភាព និងការកាត់បន្ថយការកកស្ទះសំណើរឿងនៅតុលាការ។

ថ្លែងក្នុពិធីនេះ ឯកឧត្តម ជិន ម៉ាលីន បានសំណូមពរដល់រដ្ឋបាលខេត្តទាំង ៤ សូមបន្តផ្តល់នូវការគាំទ្រ ជួយសម្របសម្រួល និងសហការឱ្យបានជិតស្និទ្ធជាមួយការិយាល័យតំណាង អ.ជ.ក. ដែល មានទីតាំងស្ថិតនៅក្នុងខេត្តរបស់ខ្លួននីមួយៗ ក្នុងការដោះស្រាយវិវាទជូនប្រជាពលរដ្ឋក្នុង មូលដ្ឋាន សំដៅបង្ខិតសេវានៃការដោះស្រាយវិវាទ ឱ្យមានលក្ខណៈងាយស្រួល សម្បូរបែប ឆាប់រហ័ស និងកាន់តែខិតជិតប្រជាពលរដ្ឋ ដោយធានាបាននូវបរិយាកាសសន្តិភាពនិយម និងភាពសុខដុមរមនាក្នុងសង្គមជាតិ។

ឯកឧត្តម បញ្ជាក់បន្ថែមថា ការដោះស្រាយវិវាទនៅការិយាល័យតំណាង អ.ជ.គ. គឺពុំមានគិតកម្រៃ ហើយនីតិវិធី និងបែបបទនៃការដាក់ពាក្យបណ្តឹង និងការដោះស្រាយវិវាទ ក៏មានលក្ខណៈសាមញ្ញ ងាយស្រួល និងឆាប់រហ័ស។ ដូច្នេះ សូមលើកទឹកចិត្តដល់ ពុកម៉ែ បងប្អូនប្រជាពលរដ្ឋរស់នៅក្នុងខេត្តទាំង ៤ ឬបណ្តាខេត្តដែលនៅក្បែរខាងនេះ ដែលមាន វិវាទ សូមងាកមកសាកល្បងប្រើប្រាស់សេវាសម្រុះសម្រួលផ្សះផ្សាវិវាទក្រៅប្រព័ន្ធតុលាការ នៅការិយាល័យតំណាង អ.ជ.ក. ដែលនៅជិតមូលដ្ឋានរស់នៅរបស់ខ្លួន៕