អ្នកស្រាវជ្រាវអាមេរិក២នាក់ និងប្រភពសន្តិសុខលោកខាងលិចមួយថា រុស្ស៉ីទំនងជាកំពុងត្រៀមលក្ខណៈធ្វើតេស្ដមីស៊ីលគ្រូសនុយក្លេអ៊ែរស៊េរីថ្មីរបស់ខ្លួន

វ៉ាស៊ីនតោន៖ បើតាមការចេញផ្សាយដោយទីភ្នាក់ងារសារព័ត៌មាន Reuters អ្នកស្រាវជ្រាវអាមេរិក២នាក់ និងប្រភពសន្តិសុខលោកខាងលិចមួយ បានឱ្យដឹងថារុស្ស៉ីទំនងជាកំពុងត្រៀមលក្ខណៈធ្វើតេស្ដមីស៊ីលគ្រូសនុយក្លេអ៊ែរស៊េរីថ្មីរបស់ខ្លួន ខណៈ ប្រធានាធិបតីរុស្ស៉ី លោក វ្ល៉ាឌីមៀ ពូទីន ត្រៀមចូលរួមកិច្ចប្រជុំកំពូលជាមួយប្រធានាធិបតីអាមេរិក លោក ដូណាល់ ត្រាំ នៅរដ្ឋ Alaska នៅថ្ងៃសុក្រសប្ដាហ៍នេះ។

លោក Jeffrey Lewis ជាអ្នកស្រាវជ្រាវម្នាក់មកពីវិទ្យាស្ថាន Middlebury Institute of International Studies មានមូលដ្ឋានក្នុងរដ្ឋ California និងលោក Decker Eveleth មកពីស្ថាប័ន ស្រាវជ្រាវ និងវិភាគ CNA ក្នុងរដ្ឋ Virginia បានឈានដល់ការសន្និដ្ឋានដាច់ដោយឡែកពីគ្នាតាមរយៈការសិក្សាលើរូបភាពផ្កាយរណបរបស់ក្រុមហ៊ុន Planet Labs កាលពីប៉ុន្មានសប្ដាហ៍ថ្មីៗនេះ រហូតដល់ថ្ងៃអង្គារសប្ដាហ៍នេះ។

តាមអ្នកស្រាវជ្រាវទាំង២រូប រូបភាពផ្កាយរណបបានបង្ហាញពីសកម្មភាពយ៉ាងសកម្មនៅឯទីតាំងធ្វើតេស្ដអាវុធ នៅឯសមុទ្រ Barents Sea នៃទីប្រជុំកោះ Novaya Zemlya ក្នុងនោះរួមមានទាំងការកើនឡើងចំនួនមនុស្ស និងបរិក្ខារ ព្រមទាំងនាវាចម្បាំង និងយន្ដហោះចម្បាំងដែលធ្លាប់បានចូលរួមក្នុងការធ្វើតេស្ដមីស៊ីល 9M730 Burevestnik កន្លងមក។

ចំណែក ប្រភពពីសន្តិសុខលោកខាងលិចមួយ ក្នុងលក្ខខណ្ឌមិនបញ្ចេញឈ្មោះក៏បានទទួលស្គាល់ដែរថារុស្ស៉ីកំពុងត្រៀមលក្ខណៈធ្វើតេស្ដមីស៊ីល Burevestnik។ បើតាមលោក Lewis ការធ្វើតេស្តអាចនឹងធ្វើឡើងនៅក្នុងសប្ដាហ៍នេះក៏ថាបាន។

គួរបញ្ជាក់ថា លោក Lewis លោក Eveleth និងអ្នកជំនាញខាងអាវុធ២នាក់ផ្សេងទៀត បាននិយាយថាការអភិវឌ្ឍមីស៊ីល Burevestnik គឺពិតជាមានសារៈសំខាន់បំផុតសម្រាប់រុស្ស៉ី ជាពិសេស ក្រោយលោក ត្រាំ កាលពីខែមករាកន្លងទៅបានប្រកាសពីការអភិវឌ្ឍប្រព័ន្ធខែលប្រឆាំងមីស៊ីល Golden Dome។ លោក ពូទីន វិញបានចាត់ទុកថាមីស៊ីល Burevestnik ដែលអង្គការ NATO ដាក់ឈ្មោះឱ្យថា SSC-X-9 Skyfall គឺជាអាវុធគ្មានគូប្រៀបដែលគ្មានប្រព័ន្ធការពារដែនអាកាសណាមួយក្នុងពេលបច្ចប្បន្នអាចទប់ស្កាត់បាន៕