លោក Anwar ៖ កម្ពុជា និងថៃបានស្នើសុំឱ្យម៉ាឡេស៊ី បន្តធ្វើជាអ្នកសម្របសម្រួលនៅក្នុងជម្លោះព្រំដែនរវាង ប្រទេសទាំង២ ទោះនៅបន្ទាប់ពីម៉ាឡេស៊ីបញ្ចប់តួនាទីជាប្រធានអាស៊ានប្ដូរវេននៅឆ្នាំក្រោយក៏ដោយ

គូឡាឡាំពួ៖ លោក Anwar Ibrahim នាយករដ្ឋមន្ត្រីម៉ាឡេស៊ី បាននិយាយថាកម្ពុជា និងថៃបានស្នើសុំឱ្យម៉ាឡេស៊ី បន្តធ្វើជាអ្នកសម្របសម្រួលនៅក្នុងជម្លោះព្រំដែនរវាង ប្រទេសទាំង២ ទោះនៅបន្ទាប់ពីម៉ាឡេស៊ីបញ្ចប់តួនាទីជាប្រធានអាស៊ានប្ដូរវេននៅឆ្នាំក្រោយក៏ដោយ។ នេះបើតាមការចេញផ្សាយដោយសារព័ត៌មាន Malay Mail។

លោក Anwar ធ្វើការកត់សម្គាល់បែបនេះនៅឯសម័យប្រជុំរដ្ឋសភាម៉ាឡេស៊ី នៅថ្ងៃអង្គារ ទី៥ ខែសីហា។ តាមលោក Anwar ម៉ាឡេស៊ីនឹងបន្តដើរតួនាទីជាអ្នកសម្របសម្រួល រហូតទាល់តែជម្លោះត្រូវបានដោះស្រាយទាំងស្រុង។

លោកនាយករដ្ឋមន្ត្រីម៉ាឡេស៊ី បានគូសបញ្ជាក់ដូច្នេះថា «ទំនួលខុសត្រូវនេះមិនកំណត់នៅត្រឹមតំណែងជាប្រធានអាស៊ាន របស់យើងនោះទេ។ ប្រទេសទាំង២បានស្នើឡើងថាម៉ាឡេស៊ីបន្តតួនាទីរបស់ខ្លួន រហូតទាល់តែដំណោះស្រាយមួយត្រូវបានសម្រេចឡើង»។

លោក Anwar ក៏បានសង្កត់ធ្ងន់ផងដែរពីសារៈសំខាន់នៃតួនាទីស្នូលរបស់អាស៊ាន ក្នុងការគ្រប់គ្រងជម្លោះនៅក្នុងតំបន់ ជាមួយការព្រមានប្រឆាំងនឹងការលូកដៃ ឬចូលរួមដោយផ្ទាល់ពីមហាអំណាចខាងក្រៅ៕