ឯកឧត្តម ឈា ប៊ុនរិទ្ធ ដឹកនាំកិច្ចប្រជុំពិនិត្យវឌ្ឍនភាពការងារចុះបញ្ជីអាងស្តុកទឹក និងអាងទឹកនៃប្រព័ន្ធធារាសាស្រ្ត នៅទូទាំងប្រទេស
ភ្នំពេញ៖នារសៀលថ្ងៃចន្ទ ១១រោច ខែអាសាឍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២១ ខែកក្កដា ឆ្នាំ២០២៥ នេះ ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការ និងជាប្រធានក្រុមការងារដឹកនាំ និងជំរុញការងារចុះបញ្ជីអាងស្តុកទឹក និងទំនប់អាងទឹកនៃប្រព័ន្ធធារាសាស្ត្រ ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំ ដើម្បីជំរុញ និងតាមដានវឌ្ឍនភាពការងារចុះបញ្ជីអាងស្តុកទឹក និងអាងទឹកនៅទូទាំងប្រទេស តាមប្រព័ន្ធវីដេអូ នៅទីស្តីការក្រសួងធនធានទឹក និងឧតុនិយម ។
សូមជម្រាបជូនថា កិច្ចប្រជុំនាពេលនេះ មានការអញ្ជើញចូលរួមពីឯកឧត្តមអនុរដ្ឋលេខាធិការ អគ្គនាយក អគ្គនាយករងនៃអគ្គនាយកដ្ឋានកិច្ចការបច្ចេកទេស នាយកដ្ឋានជំនាញពាក់ព័ន្ធ សមាជិកនៃក្រុមការងារ និងមន្ទីរធនធានទឹក និងឧតុនិយមទាំង២៥ រាជធានីខេត្ត។
ឯកឧត្តមរដ្ឋលេខាធិការប្រចាំការ បានមានប្រសាសន៍ថា គោលបំណងនៃកិច្ចប្រជុំ គឺដើម្បីពិនិត្យវឌ្ឍនភាព និងជំរុញការងារចុះបញ្ជីអាងស្តុកទឹក និងទំនប់អាងទឹកនៃប្រព័ន្ធធារាសាស្រ្តនៅទូទាំងប្រទេសឱ្យបានលឿន ស្របតាមយុទ្ធសាស្ត្របញ្ចកោណដំណាក់កាលទី១ ក៏ដូចជាកម្មវិធីនយោបាយរបស់រាជរដ្ឋាភិបាល នីតិកាលទី៧ នៃរដ្ឋសភា សម្រាប់ការកសាង និងការការពារមាតុភូមិ ឆ្នាំ២០២៣-២០២៨។
ជាចុងក្រោយ ឯកឧត្តមរដ្ឋលេខាធិការប្រចាំការ បានថ្លែងនូវការកោតសរសើរ និងវាយតម្លៃខ្ពស់ ចំពោះក្រុមការងារ ជាពិសេសមន្ទីរធនធានទឹក និងឧតុនិយមរាជធានីខេត្តដែលបានខិតខំប្រឹងប្រែងអនុវត្តការងារចុះបញ្ជីអាងស្តុកទឹក និងអាងទឹកកន្លងមក និងបានណែនាំឱ្យមន្ទីរបន្តយកចិត្តទុកដាក់ពន្លឿនការងារចុះបញ្ជីអាងស្តុកទឹក និងអាងទឹកឱ្យបានឆាប់ ចៀសវាងនូវការទន្រ្ទានកាន់កាប់ដីទាំងនេះដោយខុសច្បាប់៕
