រដ្ឋមន្ត្រីក្រសួងវប្បធម៌ថ្មីលោកស្រី ផែថងថាន ឈិនៈវ័ត អះអាងថា ប្រទេសថៃនឹងពន្យារពេលប្រគល់វត្ថុបុរាណចំនួន២០មកកម្ពុជាវិញ

បាងកក៖ បើតាមការចុះផ្សាយរបស់សារព័ត៌មាន Thai PBS រដ្ឋមន្ត្រីក្រសួងវប្បធម៌ទើបប្រសូត្រថ្មីថ្មោង គឺលោកស្រី ផែថងថាន ឈិនៈវ័ត បានអះអាងកាលពីថ្ងៃទី៤ ខែកក្កដាថា ប្រទេសថៃនឹងពន្យារពេលប្រគល់វត្ថុបុរាណចំនួន២០មកកម្ពុជាវិញ ដោយសារតែការកើនឡើងខ្លាំងនៃភាពតានតឹងព្រំដែនរវាងប្រទេសទាំងពីរ គាប់ជួនក្រសួងវប្បធម៌ថៃ ក៏ជួបបញ្ហាខ្វះថវិកាថែមទៀត។

លោកស្រី ផែថងថាន បានអះអាងថា៖«ក្រសួងវប្បធម៌បានសម្រេចចិត្តពិនិត្យមើលឡើងវិញនូវការប្រគល់វត្ថុបុរាណទាំងនោះទៅកម្ពុជាវិញ ដោយពិចារណាលើទំនាក់ទំនងទ្វេភាគី ដែលកំពុងតែតានតឹងខ្លាំង។ ដូច្នេះហើយ មិនមាន[ការបញ្ជូនវត្ថុបុរាណទៅកម្ពុជា]វិញទេ នៅពេលនេះ»។ ការអះអាងក្តែងៗរបស់លោកស្រី ផែថងថាន គឺធ្វើឡើងក្នុងថ្ងៃដំបូងតែម្តង ដែលលោកស្រីឈានជើងចូលកាន់តំណែងជារដ្ឋមន្ត្រីក្រសួងវប្បធម៌ ក្រោយតំណែងនាយករដ្ឋមន្ត្រីរបស់លោកស្រីត្រូវបានព្យួរដោយតុលាការធម្មនុញ្ញ រង់ចាំចេញសេចក្តីសម្រេចចុងក្រោយ។

តាមពិតទៅ កម្ពុជា-ថៃ គ្រោងនឹងរៀបចំពិធីមួយនៅរាជធានីបាងកកប្រទេសថៃ នាចុងខែកក្កដានេះ ស្តីពីការប្រគល់វត្ថុបុរាណមកឱ្យកម្ពុជា ហើយឈានចូលខែសីហា ភាគីថៃនឹងចាប់ផ្តើមបញ្ជូនមកកម្ពុជា។

សូមរំឭកថា គណៈរដ្ឋមន្ត្រីក្រោមការដឹកនាំរបស់អតីតនាយករដ្ឋមន្ត្រីថៃ លោក សេដ្ឋា ថាវីស៊ីន បានអនុម័តការប្រគល់វត្ថុបុរាណទាំង ២០មកកម្ពុជាវិញ កាលពីថ្ងៃទី២១ ខែឧសភា ឆ្នាំ២០២៤ តាមសំណើរបស់ក្រសួងវប្បធម៌កម្ពុជា។ សេចក្តី សម្រេច នេះ ផ្អែក លើ ការ វាយ តម្លៃ ខ្ពស់ដោយស្ថាប័នវិចត្រសិល្បៈ និងអ្នកជំនាញឯករាជ្យ ដែលបាន បញ្ជាក់ ថា  វត្ថុ ទាំង នោះ មាន ប្រភព មកពី កម្ពុជា។

យ៉ាង ណា ក៏ ដោយ ពេលនេះស្រាប់តែថៃប្តូរចិត្តលឿនដូចរន្ទះ ដោយរដ្ឋមន្រ្តីក្រសួងវប្បធម៌ថ្មីគឺលោកស្រី ផែថងថាន បានអះអាង ថា ដំណើរការ នេះ ត្រូវ បាន ផ្អាក ទៅវិញ ដោយ សារ តែ ការ រឹតត្បិតថវិកា ចំពេលមានភាពតានតឹងនៅតាមតំបន់ព្រំដែន។

លោកស្រីនាយករដ្ឋមន្រ្តី សង្កត់ធ្ងន់ថា៖« បញ្ហា នេះ កំពុង ស្ថិត ក្នុង ដំណាក់កាល បញ្ហាថវិកា ក្រោម នាយកដ្ឋាន វិចិត្រសិល្បៈ ប៉ុន្តែ ខ្ញុំ បាន ទទួល ដំណឹង ថា ថវិកា ឆ្នាំ នេះមិន គ្រប់គ្រាន់ទេ ហើយ ដោយសារ វា មិន ត្រូវ បាន គេ ចាត់ ទុក ជា រឿង បន្ទាន់ នោះ ក្រសួង មិន អាច ស្នើសុំ ថវិកា បាន ទេ ។ យើងនឹងត្រូវពិនិត្យមើលបញ្ហានេះឡើងវិញ។ វាប្រហែលជាចាំបាច់ក្នុងការដាក់សំណើថវិកាថ្មីតាមរយៈក្រសួង ហើយរាយការណ៍ទៅគណៈរដ្ឋមន្ត្រី ដើម្បីគាំទ្រដំណើរការនេះ»។ គួរបញ្ជាក់ថា វត្ថុបុរាណចំនួន២០នោះ ភាគច្រើនជាចម្លាក់តូចៗ ក្នុងចំណោមវត្ថុបុរាណចំនួន៤៣ ដែលត្រូវបានរត់ពន្ធចេញពីប្រទេសកម្ពុជា ប៉ុន្តែវត្ថុបុរាណចំនួន២៣បានប្រគល់មក កម្ពុជា វិញហើយ កាលពី ឆ្នាំ ២០០៨ និង ២០១៥៕