វិទ្យាស្ថានពហុបច្ចេកទេសខេត្តកំពង់ស្ពឺប្រកាសផ្ដល់ការបណ្ដុះបណ្ដាលវិជ្ជាជីវៈកម្រិត១ដោយឥតបង់ថ្លៃ ៧៧៥កន្លែង ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ រួមទាំងប្រាក់ឧបត្ថម្ភ

ភ្នំពេញ៖ វិទ្យាស្ថានពហុបច្ចេកទេសខេត្តកំពង់ស្ពឺបានប្រកាសផ្ដល់ជូនអាហារូបករណ៍ ១០០% សម្រាប់ការបណ្ដុះបណ្ដាលជំនាញវិជ្ជាជីវៈកម្រិត១ ចំនួន៧៧៥កន្លែង ដល់ក្រុមយុវជនមកពីគ្រួសារក្រីក្រ និងគ្រួសារងាយរងហានិភ័យ ព្រមទាំងមានប្រាក់ឧបត្ថម្ភប្រចាំខែថែមទៀតផង។

ការផ្ដល់ជូនអាហារូបករណ៍នេះ គឺជាការអនុវត្តកម្មវិធីគោលនយោបាយបណ្ដុះបណ្ដាលបច្ចេកទេសនិងវិជ្ជាជីវៈ (TVET) ១.៥លាននាក់ របស់រាជរដ្ឋាភិបាលនីតិកាលទី៧ នៃរដ្ឋសភា ក្រោមអាណត្តិដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងទិសដៅលើកកម្ពស់ជីវភាពយុវជនមកពីគ្រួសារក្រីក្រ និងគ្រួសារងាយរងហានិភ័យ តាមរយៈផ្ដល់ឱ្យពួកគេនូវជំនាញជាក់លាក់មួយ និងមានលទ្ធភាពទទួលបានចំណូលសមរម្យ។

សិក្ខាកាមចំនួន៧៧៥នាក់ក្នុងផែនការជ្រើសរើសសម្រាប់វគ្គបណ្ដុះបណ្ដាលនេះ នឹងត្រូវបែកចែកទៅតាមមុខជំនាញដែលមានតម្រូវការខ្ពស់ក្នុងទីផ្សារចំនួន១៤ រួមមាន៖ (១).ជំនាញការងារកំបោរ ចំនួន២០០នាក់ (២).ជំនាញដំឡើងបណ្ដាញបំពង់ទឹក ចំនួន២៥នាក់ (៣).ជំនាញបណ្ដាញអគ្គិសនីក្នុងអគារ ចំនួន១៩០នាក់ (៤).ជំនាញដំឡើងពុម្ភ ចំនួន២៥នាក់ (៥).ជំនាញផ្សារអគ្គិសនី ចំនួន៣៥នាក់ (៦).ជំនាញថែទាំនិងជួសជុលម៉ាស៊ីនត្រជាក់រថយន្ត ចំនួន៣០នាក់ (៧).ជំនាញថែទាំនិងជួសជុលអគ្គិសនីរថយន្ត ចំនួន២៥នាក់ (៨).ជំនាញថែទាំនិងជួសជុលរថយន្តចំនួន ចំនួន៣៥នាក់ (៩).ជំនាញរចនាក្រាហ្វិកដោយកុំព្យូទ័រ ចំនួន២៥នាក់ (១០).សេវាកម្មកុំព្យូទ័រ ចំនួន២៥នាក់ (១១).សេវាកម្មរដ្ឋបាល ចំនួន២៥នាក់ (១២).ជំនាញដំឡើងនិងអនុវត្តបច្ចេកវិទ្យាឌីជីថល ចំនួន២៥នាក់ (១៣).ជំនាញផ្ដល់សេវាកម្មបរិក្ខារត្រជាក់ក្នុងគេហដ្ឋាន ចំនួន៦០នាក់ និង(១៤).ជំនាញធុរកិច្ចភេសជ្ជៈ ចំនួន៥០នាក់។

លោក កែម ជាក់នី នាយកវិទ្យាស្ថានពហុបច្ចេកទេសខេត្តកំពង់ស្ពឺ បានបញ្ជាក់ថា វិទ្យាស្ថាននឹងចាប់ផ្ដើមជ្រើសរើសសិក្ខាកាមសម្រាប់វគ្គសិក្សាថ្មី ចាប់ថ្ងៃទី១ ខែមិថុនា ឆ្នាំ២០២៥ តទៅ។ ការចូលសិក្សានឹងចាប់ផ្ដើមនៅថ្ងៃទី១ នៃខែនីមួយៗ រហូតដល់ខែតុលា ឆ្នាំ២០២៥។

សម្រាប់យុវជនគោលដៅទាំងពីរក្រុមខាងលើដែលចាប់អារម្មណ៍ក្នុងការដាក់ពាក្យ សូមទាក់ទងមកកាន់វិទ្យាស្ថានពហុបច្ចេកទេសខេត្តកំពង់ស្ពឺ ដែលមានទីតាំងនៅភូមិទំពូង ឃុំកាហែង ស្រុកសំរោង ខេត្តកំពង់ស្ពឺ ឬទំនាក់ទំនងតាមរយៈទូរស័ព្ទលេខ៖ ០១២ ៩៩៥ ៩៥២ / ០៨១ ៩៩៥ ៩៥២ / ០១៥ ៣០៥ ៤៣៥។

គួរបញ្ជាក់ថា ក្រៅពីក្រុមយុវជនគោលដៅមកពីគ្រួសារក្រីក្រ និងគ្រួសារងាយរងហានិភ័យ វគ្គបណ្ដុះបណ្ដាលពិសេសនេះក៏បើកចំហសម្រាប់យុវជន និងប្រជាពលរដ្ឋទូទៅ រួមទាំងកម្មករ-កម្មការិនីផងដែរ ដែលអាចដាក់ពាក្យចូលសិក្សាជំនាញបច្ចេកទេសវិជ្ជាជីវៈនេះបានដោយឥតបង់ថ្លៃដូចគ្នា គ្រាន់តែមិនទទួលបានប្រាក់ឧបត្ថម្ភប្រចាំខែពីរាជរដ្ឋាភិបាល៕